Tara chet miuüa12
1Akung kowi Efraim krungchakuüa mih amatni kowh siphai hawmh kowi hawah khai. Now amatni mih haipown Jawrdan aw hanow Zafawn marow kowi kowkowi büah khai. Nakowi amatni tek pe Jeftha mih, “Amawnuüa hown tasen khe tawngplawng kowchow en hawla anging dowi? En hailawm en kowh kim mih anging natowkta en kown,” pakhai.2Nakhowk khe amatni kowi Jeftha tek pe mih, “Amawnuüa hown ang hai ang kowh maru-uüa lainowmma pusa mih khin khe uang khowng ang kown mih ang haw enni khowk chowdiah. Nachenganchepaw Amawnuüa rut hownia enni uang lawng ang dowi chekhai.3Enni uang khowng ang dowi tham pami ang tuk hanow ang dow singsing kowngkowng Amawnuüa hown kowtasen khai. Now CHAKRAMANG tawi khowng ang rakowi amatni kowi mih ang nowngta khai. Kawmat tawngplawng kowchow ang hown tasen kownkow enni uang tuk uang khai?” pape khai.4Nami kung kowi dow Jeftha mih Gilead kowi kowh maru-uüa maten kowi kuala now Efraimuüa hown kowtasen khai. Tawngplawng kowchow panow Efraim krungchakuüa tek mih, “Aw Gileaduüa, enni dow Efraim hai Manase krungchakuüa hownia kowh cham powt mih maru chekhai,” pakhai. Nami tasen kowi Gileaduüa dow Efraimuüa kowi nowngta khai.5Now Gileaduüa dow Efraim süng prakowi haimangla kown mih Jawrdan aw khawk hown nowng pownah mih arah maten krawi powngta pe khai. Ta sing uowi mih Efraim krungchakuüa mih, “Pe pown ang aw diah,” pahai tek mih khin khe Gileaduüa dow aia kowi lüntaah mih, “En Efraim maru bow?” pakhai. Aia che, “Ang Efraim maru nadowi,” pahai tek khai hanow6amatni tek pe mih, “‘Shibbawlet,’ pahai tek madiah,” pakhai. Nakhowk khe aia che klangiungma tuk tek dowi kowh “Sebbawlet” pahai tek khai hanow amatni dow naiawng mih maru kowi Jawrdan aw pown rah re-e hing saita büah khai. Nami khin khe amatni dow Efraimuüa kowi 42,000 ia hawt saita khai.7Israeluüa kowi mih taruk ning mowr Jeftha kruitownla khai. Aia dow Gilead krungchak chekhai. Aia kowng hanow aia kowi dow Gileaduüa süng kowi kowh marow kowi dupah khai.8Jeftha kowng kung kowi dow Israeluüa kowh tara chet mih Ibzan chekhai. Aia dow Bethlehem marow kowi kowh uowi mih maru chekhai.9Ibzan kowh dow chapa uowi 30 ia, now achama paw uowi 30 ia chekhai. Aia dow achamauüa kowi akeng chen kowi cham pe mangah khai, now achapauüa kowh masi paw akeng chen malauüa kowi cham paw pe khai. Aia dow ranit ning mowr Israeluüa kowi kruitownla khai.10Ibzan kowng hanow aia kowi dow Bethlehem marow kowi dupah khai.11Ibzan kowng kung kowi dow hamüt ning mowr Israeluüa kowi Elawn kruitownla khai. Aia dow Zebulun krungchak chekhai.12Aia kowng hanow aia kowi dow Zebulun süng kowi uowi mih Aijalawn marow kowi dupah khai.13Elawn kowng kung kowi dow Israeluüa kowh tara chet mih Hilel kowh chapa Abdawn chekhai. Aia dow Pirathawn marow kowi kowh uowi mih maru chekhai.14Aia kowh dow chapa uowi 40 ia, now chu uowi 30 ia chekhai. Achapa hai achu-uüa kowh dow lowk ia e lowk chi kawrngaramchük uowi bowk chekhai. Abdawn dow Israeluüa kowi raiat ning mowr kruitownla khai.15Aia kowng hanow aia kowi dow Pirathawn kua kowi dupah khai. Pirathawn kua uowi mih dow Amalekuüa kowh hungma mawngma süng kowi Efraimuüa kowh süng kowi chekhai.
The Seed Company