Tara chet miuüa11
1Nami khin khe Gilead kowi kowh Jeftha dow tasen akiakma chekhai. Jeftha kowh u dow chawkkrawma chekhai, now a-pa ming dow Gilead chekhai.2Gilead kowh masi mih ka chapa sangrum khai. Now naiawngün chauüa awr iuk kung kowi Jeftha kowi prütta hanow tek pe mih, “Anging kimchak kowh dawngthawnguan bak en natawi ka kown nadowi. Tawngplawng kowchow panow en dow akeng mih masiuüa kowh chah chekhai,” pakhai.3Naiawng rakowi Jeftha dow atainau-uüa hownia powt now Tawb pren kowi kowuowi khai. Nakowi uowi khe aia dow maru ngakuüa kowi kuaah lawmah hanow chowng aluchow khai.4Naiawng Jeftha cham uowi pre sum ning kung kowi Israeluüa kowi Amawnuüa uang senah khai. Nakhowk khe dow Gilead süng kowi kowh lawngtang aluchowuüa mih Tawb pren kowi kowh cham uowi mih Jeftha kowi kowkrawi hawah khai.6Jeftha kowi tek pe büah mih, “Amawnuüa hown anging tasen kown. Naiawng rakowi en mih uang tawi chowng anging kowh siphai aluchow diah,” pakhai.7Nakhowk khe Jeftha klangah mih, “Enni sui ang kowh apa kim hownia enni prüt ang mih chowbowt nadowi bow? Kawmat dow enni kla phih now tawngplawng kowchow ang tut-e enni uang khai?” pape khai.8Now aluchowuüa tek pe iawk mih, “Anging prütta en khowk chepaw kawmat dow anging uang plan paw en iawk mih chowbowt. Anging hown uang tawi now Amawnuüa hown uang tawi dowk tasen diah. Nahanow Gilead kowi kowh anging uowi mih maten luk kowi en nachowng aluchow kown,” pakhai.9Nakhowk khe Jeftha tek pe mih, “Laiuan kowi, Amawnuüa hown tasen kownkow enni hown ang tawi now ang tawi tasen khai, now CHAKRAMANG paw Amawnuüa kowi ang rut kowi apta ang khai. Naiawng e dow nakhowk khe enni kowh aluchow enni pe chowng ang nowm kown bow?” pakhai.10Nakhowk khe aluchowuüa klangah mih, “En tek iawng anging chang en kown taih. Nami lawnguan kowi CHAKRAMANG mih a-i kowh saksi pana lah,” pape khai.11Naiawng hai Jeftha dow Gilead kowi kowh lawngtang aluchowuüa hown kowtawi khai. Now maru-uüa dow Jeftha kowi amatni kowh aluchow hai siphai aluchow thawpah khai. Aia dow Mizpa kowi kowkowiah now CHAKRAMANG pur kowi aluchowuüa hown kowh aia takham mih laiklow maten kowtek khai.12Nami kung kowi dow Jeftha mih Amawnuüa kowh mang tut-e kowchin maru khai. Now aia krawi lüntaah mih, “Tawng rakowi chow en uang tuk sen anging khai?” pakhai.13Jeftha kowchinah mih maru-uüa kowi Amawnuüa kowh mang krawi tek pe mih, “Aigupta pren hownia uang lawt now enni Israeluüa mih Jawrdan aw ria kowi kowh Arnawn aw hownia Jawrdan aw ria rowkrowk panow Jabawk aw mowr ang kowh süng maten enni powngta ang khai. Kawmat mih naiawngün süng maten aiungma hown planta anging diah,” pakhai.14Amawnuüa kowh mang tut-e Jeftha krawi plan chin pe maru hanow krawi tek pe iawk mih, “Anging Israeluüa mih Moab pren paw powngta dowi, now Amawnuüa kowh pren paw anging powngta dowi chekhai.16Aigupta pren hownia uang lawt kung kowi anging Israeluüa mih süngrüp süngkangma iawng panow sata Rik mowr kowkowi khai, now nami kung kowi dow Kades marow kowi anging kowkowi khai.17Nami kung kowi Edawmuüa kowh mang tut-e kowchin maru now anging tek pe mih, ‘En kowh pren iawng pe mang anging diah,’ pakhai. Nachenganchepaw Edawmuüa kowh mang mih anging kowh laiklow nauta dowi. Now Moabuüa kowh mang tut-e paw anging kowchin maru now aia pren iawng pe mang anging kown mih laiklow anging kowtek pe khai. Nachenganchepaw Moabuüa kowh mang paw anging kowh laiklow nauta dowi chekhai. Naiawng rakowi anging Israeluüa mih Kades marow kowi anging hing uowi khai.18Nami kung kowi dow süngrüp süngkangma iawng panow Edawmuüa hai Moabuüa kowh pren riala khai, now Moab pren satlawt pra iawng panow Arnawn aw paipra pown kowi anging kowkhup tangbung khai. Nakhowk khe Moab pren kowi anging Israeluüa kupla dowi chekhai. Tawngplawng kowchow panow Arnawn aw dow Moab pren sünghi chekhai.19“Nami kung kowi dow Israeluüa mih Hesbawn marow kowi kowh uowi mih Amawruüa kowh mang Sihun tut-e kowchin maru khai. Now kowtek pe mih, ‘Anging pren kowi nakowkowi kownkow en pren iawng pe mang anging diah,’ pakhai.20Nachenganchepaw mang Sihun mih owm anging dowi chekhai. Aia dow aia pren iawng pe mang anging dowi. Pe mang anging lak dow aia kowh maru-uüa kowi kuaah now Jahaz marow kowi uang khup tangbung khai, now uang sen anging khai.21Nakhowk khe CHAKRAMANG Israeluüa kowh Thurai mih Sihun hai aia kowh maru maten kowi anging rut kowi ap-ah khai, now amatni kowi dow anging nowngta khai. Now Amawruüa kowh süng maten anging powngta pe khai.22Arnawn aw hownia Jabawk aw mowr, now süngrüp süngkangma hownia Jawrdan aw mowr Amawruüa kowh süng maten anging powngta pe khai.23“Amawruüa kowi prütta now amatni kowh süng CHAKRAMANG Israeluüa kowh Thurai pe anging khowk mih napowngta kownkow mia chow pe en alow?24En kowh Kemaws thurai pe en mih süng maten en powngta bowk nadowi bow? Nami iawng dow anging paw anging pur hownia CHAKRAMANG anging kowh Thurai prütah mih chenchapuüa kowh süng maten anging powngta mih chekhai.25Moab pren mang Zipawr kowh chapa Balak lak-e en lang iung khai bow? Aia dow Israeluüa hown katpaw taran dowi, now tasen paw tasen dowi chekhai.26Anging Israeluüa krawi uowi mih dow Hesbawn hai Aroer marow kowi chekhai, now naiawngün marow riaret kowi kowh kua hai Arnawn aw ret kowi kowh kua maten kowi paw anging krawi uowi khai. Naiawngün kowi anging krawi uowi mih dow ani mowr kowi 300 ning khowk chekhai. Nami 300 ning takra kowi naiawngün süng naka kownkow tawngplawng kowchow tawngpaw en chang dowi?27Nami lawnguan kowi dow en luk kowi ang changta angak mih mapaw uowi dowi chekhai. En sen ang mih tarapdow ang luk kowi en changta angak mih chekhai. Tara chet miia CHAKRAMANG dow anging Israeluüa hai enni Amawnuüa luk kowi pacham chet a-i tara lah,” pape khai.28Nachenganchepaw Jeftha kowchinah mih maru kowh laiklow Amawnuüa kowh mang dow sünta pe dowi chekhai.29Nakhowk khe CHAKRAMANG kowh lümla mih Jeftha kowi uang kruitownah khai. Nahanow Jeftha dow Gilead hai Manase krungchakuüa kowh süng iawng kowkowiah now Gileaduüa süng kowi kowh Mizpa marow kowi kowkowi khai. Now nami hownia Amawnuüa kowi dowkah tasen khai.30Nakhowk khe CHAKRAMANG tut-e Jeftha takham mih, “Aw CHAKRAMANG, Amawnuüa kowi che ang rut kowi en ap ang khai hanow Amawnuüa kowi nowngta kung kowi ang uang plan khe uang hawt chum ang mih maru dow en vüi naown kown. Nami maru hown dow tikah mih uanap ang nachangla kown,” pakhai.32Nami kung kowi dow Jeftha mih Amawnuüa hown kowtasen khai bowt, now CHAKRAMANG mih Amawnuüa kowi dow aia rut kowi ap pe khai.33Jeftha hai aia kowh siphai hawmh mih Aroer marow hai Minit marow takra kowi kowh uowi mih 20 marow dow piakta khai. Nami klen kowi alakma kowi kowh uowi mih Abel-Keramim marow paw piakta khai. Naiawng hai Israeluüa dow Amawnuüa kowi senah now nowngta khai.34Now Mizpa kowi kowh aia kim kowi Jeftha uang plan khe aia kowi hawt chumah mih dow aia kowh chama lowkchow mih chekhai. Aia kowh chama dow sawkchow tün hown plaila nüklük se aia kowi uang hawt chumah khai. Jeftha kowh dow nami lowk iachow klen kowi tawng iawng mih chama chapa paw uowi dowi bowt chekhai.35Jeftha dow achama uang hawt chumah mih khita now aia kowh tawnguat sekah khai. Now aia tek mih, “Aw tum ow! Tawngplawng kowchow naiawng en tuk chang ang khai. En pe kla ang phih khai. Tawngplawng kowchow panow CHAKRAMANG tut-e ang khamta mih dow mapaw ang ia piak dowi bowt chekhai,” pakhai.36Nakhowk khe Jeftha kowi achama klangah mih, “Apa, CHAKRAMANG dow en kowh ransu Amawnuüa luk kowi pe awng en khai. Naiawng rakowi CHAKRAMANG tut-e en khamta lai khai bowt chedow en kowh laikham kowi uowi iawng chang ang diah,” pape khai.37Nami klen kowi achama plan tek pe mih, “Tawkchedow ang kowh laiklow en chün ang lowk kown takla. Ang dow tawi ka changla dawngthawng dowi bowt hai tawi ka kumla nau dowi bowt chedow hungh towng cham krawi mang panglang se ang auiuauüa hown kar hai nguk hown nauowi kownkow en pe ang akhin pre la kown takla,” pakhai.38Naiawng rakowi Jeftha mih achama kowi peah akhin pre la khai. Nakhowk khe Jeftha chama dow akeng mih malauüa hawmh hown hungh towng cham krawi len hanow uowila uiting uangtak khai. Tawngplawng kowchow panow aia dow tawi ka kumla nau dowi bowt chekhai.39Now pre la chur kung kowi dow aia mih a-pa tut-e uang plan uang khai bowt. Now Jeftha dow CHAKRAMANG tut-e aia khamta lai iawng achama luk kowi changah khai. Achama dow malauüa reng tak khe kowng takla khai.
Naiawng phaw hownia bowt now Israeluüa pungmadawng kowi mih ari sar thawpah büah lowk khai.40Amatni dow Jeftha kowh chama kowi natukla reng kownkow ning towng tali ni chi Israel malauüa hawmh mih kowmatia kim hownia cham lawt hanow uowila uiting uangtak khai.
Naiawng phaw hownia bowt now Israeluüa pungmadawng kowi mih ari sar thawpah büah lowk khai.40Amatni dow Jeftha kowh chama kowi natukla reng kownkow ning towng tali ni chi Israel malauüa hawmh mih kowmatia kim hownia cham lawt hanow uowila uiting uangtak khai.
The Seed Company