Josua8
1CHAKRAMANG tek pe Josua mih, “Hangkow kram diah, now hangkow sak nen diah. En kowh siphai hawmh kowi pawla hanow kowplan sen Ai marow iawk diah. Ai marow mang, aia kowh maru-uüa, Ai marow hai nakowi kowh arah maten ang apta en mih chowbowt.2Jeriko marow hai nakowi kowh mang kowi en changah iawng Ai marow hai amatni kowh mang kowi paw en nachangah kown. Nachenganchepaw khaleng dow nami marow kowi kowh uanh hai tawncher mih enni matia vüi enni naia pawla kown. Now akung hownia nahawt dowk tasen kownkow Ai marow satkup prakowi siphai hawmh kowi en nape tapetah pathum kown,” pakhai.3Naiawng rakowi Josua dow siphai hawmh hown kowsen Ai marow kownkow kamrüt khai bowt. Aia dow tasen lang kiak mih siphai hawmh kowi lang kloah 30,000 ia hanow uar-e kowchinah khai.4Nakhowk khe amatni kowi aia krawi tek pe mih, “Sünta büa diah, Ai marow satkup prakowi enni nakowtapet kown. Tawkchedow marow hownia alakma kowi enni cham ia kowi kown nadowi. Hawt dowk tasen kownkow kamrütma hown enni nauowi kown.5Now ang tut-e kowh ta uowi mih siphai hawmh hown Ai marow kowi ang nakowkowi kown. Now nami marowchakuüa dow auown khe kowh iawng nauang sen a-i kownkow nauang lawt büah kown. Nami khin khe amatni pur hownia anging napowt pe kown.6Nakhowk khe amatni dow naka tuak kown mih, ‘Auown khe kowh iawng amatni powt mih chowbowt,’ napa büah kown. Nahanow amatni dow nakawikrawi anging kown. Now amatni kowi mih marow hownia alakma kowi anging nacham pawla kown. Naiawng alakma kowi anging cham ting mih khin khe dow tapetra hownia enni nauang lawt kown, now marow mih enni napowngta pe kown. Tawngplawng kowchow panow nami marow dow CHAKRAMANG enni kowh Thurai mih napeta enni kown chowbowt.8Nami marow dow enni kowpowng hanow enni natowkta kown. CHAKRAMANG kowh ana pek iawng enni nachang kown. Mami dow enni tut-e ang kowh ana pek chekhai,” pakhai.9Nami kung kowi dow Josua mih marow satkup prakowi nakowtapet kownkow siphai hawmh kowi kowchinah khai. Siphai hawmh kowtapetah mih arah dow Bethel hai Ai marow takra kowi chekhai. Nachenganchepaw Josua dow akeng mih siphai hawmh hown nami iak mih tangbung khup rah kowi ta iak khai.10Now auai rau murpa Josua mih siphai hawmh kowi kuaah khai. Nami kung kowi Josua hai Israel aluchowuüa mih siphai hawmh kowi Ai marow prakowi pawla khai bowt.11Now Josua hai siphai hawmh dow Ai marow re-e kowkowi khai. Now amatni dow Ai marow tawngphak prakowi kowkhup tangbung büah khai. Ai marow hai amatni kowh tangbung khup rah takra kowi dow lawngrawi uowi lowk chekhai.12Ai marow satkup prakowi dow siphai hawmh 5,000 ia ngia Josua pe tapetah khai. Naiawngün siphai hawmh tapetah mih arah dow Bethel hai Ai marow takra kowi chekhai.13Naiawng nahawt dowk tasen kownkow Israeluüa dow amatni kowh siphai hawmh kowi khowm pe uowi rah khai. Amatni kowi dow Ai marow satkup prakowi pathum, now tawngphak prakowi pathum pe uowiah büah khai. Josua dow nami iak mih lawngrawi kowi iak khai.14Tawngphak pra kowh Israel siphai hawmh kowi dow Ai marow mang khita khai. Naiawng rakowi aia hai aia kowh maru-uüa dow Israeluüa hown nakowtadowk tasen kownkow auai rau murpa awr rü büah khai. Now aia hai aia kowh maru maten dow marow hownia uang lawt hanow amatni rik tasenah mih arah Jawrdan lawngrawi re-e kowkowi büah khai. Nachenganchepaw marow satkup prakowi Israel siphai hawmh hawt tapet athum mih Ai marow mang tuk dowi chekhai.15Josua hai Israel siphai hawmh dow Ai marowchakuüa kowi chang pe sum iow hanow süngrüp süngkangma prakowi powtta pe khai.16Nakhowk khe Josua hai Israel siphai hawmh kowi nakawikrawi kownkow Ai marow kowi kowh kachakuüa maten tahaw büah khai. Now amatni dow Josua hai Israel siphaiuüa kowi kowkrawi khai. Naiawng hai Ai marowchakuüa kowi dow marow hownia alakma kowi Israel siphai hawmhuüa cham pawla khai.17Ai marow hai Bethel marow kowi kowh kachakuüa maten dow tawi krawi Israeluüa bowk chekhai; nakowi dow kachakuüa lowk iachow khowm ta lawt dowi bowt chekhai. Now amatni dow marow tapplawt paw ta hola hüah chekhai.18Nami khin khe CHAKRAMANG tek pe Josua mih, “En kowh reh mih Ai marow prakowi haiparah diah. Tawngplawng kowchow panow nami marow dow ang napeta en kown chowbowt,” pakhai. Nahanow Josua dow aia kowh reh mih Ai marow prakowi haiparah khai.19Naiawng Josua haipar reh mih dow marow satkup prakowi kowh tapet mih siphai hawmh haikhi khai. Now amatni dow tapetra hownia uang lawt hanow marow prakowi kowiowm khai. Amatni dow marow kowi kowkup hanow kowpowngta khai, now marow dow lenlenma towkta büah khai.20Now marow hownia kuang pra maikhük chai lawmlawm mih dow Josua hai siphai hawmh haikhi khai. Now amatni dow tapet mih siphai hawmh powngta marow khowk pami tuk büah khai bowt. Naiawng rakowi Josua hai siphai hawmh dow Ai marowchakuüa kowi plan senah khai bowt. Ai marowchakuüa paw kung prakowi haimü hanow amatni kowh marow hownia maikhük chai lawmlawm mih haikhita büah khai. Nachenganchepaw amatni dow tawng prakowi paw ia powt dowi bowt chekhai. Tawngplawng kowchow panow süngrüp süngkangma prakowi kowh powt mih Josua hai siphai hawmh dow Ai marowchakuüa kowi senah khai bowt.22Now tapet mih siphai hawmh paw Ai marowchakuüa kowi nauang senah kownkow marow hownia uang lawt büah khai bowt. Naiawng rakowi Ai marowchakuüa dow Israel siphai hawmh pre thum mih takra kowi takhang büah khai. Israel siphai hawmh dow amatni kowi saita bowk khai; amatni dow lowk iachow kowi paw pe plaiah dowi, now powt paw nowng powt büah dowi chekhai.23Nachenganchepaw Ai marow mang kowi dow asing khümla hanow Josua tut-e kowpawla büah khai.24Marow uat kowi kowh kawikrawi Israel siphai hawmh mih Ai marowchakuüa kowi saita büah bowk kung kowi dow Israel siphai hawmh maten mih Ai marow kowi kowplan kowi khai. Now amatni dow nami marow kowi kowh ta sing miuüa maten kowi paw saita bowk khai.25Nami ni dow Ai marow kowi kowh uowi mih maten masiuüa kachakuüa bowkbowk kowi 12,000 ia kowng khai.26Ai marow kowi kowh maru-uüa kowng bowk dowi mowr Josua dow aia kowh reh hailawm rut mih hing parta hüah chekhai.27Now marow kowi kowh tawncher hai uanh maten dow Israeluüa pawla bowk khai. Nami dow Josua tut-e kowh CHAKRAMANG ana pek iawng amatni chang mih chekhai.28Josua hai aia kowh siphai hawmh dow Ai marow mih towkah khai. Nami dow chowngchowng saksakma vüi apiakma hing uowi khai. Nami marow dow kawmat paw naiawng hai uowi reng chekhai.29Ai marow mang kowi kowngta hanow sat kup dowi mowr singh kowi natarta hüah kown mih aia maru-uüa kowi Josua peah ana khai. Now sat kup khe dow singh hownia uang klala uak hanow marow tapplawt mowr kowi aia pe kuakah khai. Nami uak luk kowi dow maru kawmuüa mih kowkrowng pe hua khai. Nami hua krowng dow kawmat paw uowi reng chekhai.30Akung kowi Josua dow CHAKRAMANG Israeluüa kowh Thurai vüi Ebal hungh kowi thawp phuchuara lowk khai.31Nami phuchuara dow Israeluüa kowi kowh CHAKRAMANG kowh nar Mosi ana pek iawng thawpah khai. Mosi kowh rirow bowih kowi kowh arui uowi iawng rowprowp Josua mih phuchuara dow thawpah khai. Nami phuchuara dow bawpah dowi mih hua hown, now rutchün khawkleng takak dowi mih hown thawpah khai. Nami phuchuara luk kowi dow Israeluüa mih CHAKRAMANG vüi tikah mih uanap hai taking tasangra uanap chang büah khai.32Ebal hungh luk kowi dow Josua mih hua luk kowi Mosi rirow plan ruiah khai. Nami khin khe Israeluüa mih tawi khi bowk chekhai.33Israeluüa maten — amatni kowh lawngtang aluchowuüa, maru iukuüa, tara chet miuüa hai amatni pungmadawng kowi kowh tawi uowi mih prenlang maru-uüa dow — iowngah pre thum khai. Pathum mih kung pra dow Gerizim hungh uowi chekhai, now alowk mih thum kung pra dow Ebal hungh uowi chekhai. Now amatni takra kowi dow CHAKRAMANG kowh sangbowk laitawm tawkpla uowi khai. Nami sangbowk laitawm tawkpla kawt mih uamowuüa dow amatni pre thum pur kowi chekhai. Naiawng nachang kown mih ana dow CHAKRAMANG kowh nar Mosi mih Israeluüa kowi peah prasi mih khin khe rik tekla khowk chekhai.34Nami kung kowi dow rirow bowih kowi kowh prasi laiklow hai piati laiklow maten arui uowi iawng rowprowp Josua phat pe khai.35Mosi ana pek kowi kowh laiklow kowi Josua dow alungchow khowm padow batla dowi chekhai. Naiawng phat mih khin khe masiuüa, ngeuüa hai amatni tut-e kowh tawi uowi mih prenlang maru-uüa hailawm Israeluüa maten uowi bowk chekhai.
The Seed Company