Josua20
1Nami kung kowi CHAKRAMANG tek pe Josua mih,2“Israeluüa kowi maiawng kowtek pe diah: Mosi kowi ang peah mih ana iawng tatung tanimra marow lang rui büah ne diah.3Lowra maru saita kown mih saktuak uowi dowi kowi rut tawi khawk tawi kowh saita maru khai hanow nami maru mih naiawngün marow kowi naia powt kown. Nahanow aia dow lu klai pawk mih maru hownia naplai kown.4Aia kowpowtah mih tatung tanimra marow kowi aia kowtowm mih khin khe aia mih marow tapplawt re-e naiowng kown. Now nakowi kowh uowi mih lawngtang aluchowuüa tut-e aia kowh lawnguan maten nalawp pe kown. Nami kung kowi dow lawngtang aluchowuüa mih amatni kowh marow kowi aia kowi nape kupah kown. Now aia kowi dow napeah uowi rah parah kown.5Now lu klai pawk mih che kowngta maru mih kung uang kawikrawi khai hanow kowngta maru mih kowi dow lu klai pawk mih maru rut kowi lawngtang aluchowuüa mih naap-ah kown nadowi. Tawngplawng kowchow panow aia dow saita kown mih saktuak uowi dowi kowi rut tawi khawk tawi kowh kowngta mih chowtaih.6Tara chetra kowi chet pe tara dowi mowr, now nami khin khe kowh uamow lang kri mih kowng dowi mowr aia dow tatung tanimra marow kowi nauowi kown takla. Nami kung kowi aia dow amatni kowh marow kowi hai aiamat kim kowi naia plan kown,” pakhai.7Naiawng rakowi Israeluüa dow Jawrdan aw satkup prakowi tatung tanimra marow lang kraah sum buk khai. Naiawngün marow dow Naptali krungchakuüa kowh Galili kowi kowh Kedes marow, Efraim krungchakuüa kowh Sekem marow hai Juda krungchakuüa kowh Kiriat-Arba marow chekhai. (Kiriat-Arba marow dow Hebrawn marow chekhai). Naiawngün marow sum buk mih dow hungma mawngma süng kowi kowh uowi mih chekhai.8Now amatni dow Jeriko marow hown tatang dowk mih Jawrdan aw satlawt prakowi paw tatung tanimra marow lang kraah sum buk khai. Naiawngün marow dow Reuben krungchakuüa kowh anaima mih süngrüp süngkangma kowi kowh Bezer marow, Gad krungchakuüa kowh Gilead kowi kowh Ramawt marow hai Manase krungchakuüa kowh Basan kowi kowh Golan marow chekhai.9Israeluüa chepaw, amatni tut-e kowh tawi uowi mih akeng chenchapuüa chepaw kowngta kown mih saktuak uowi dowi kowi rut tawi khawk tawi kowh cham saita maru khai hanow nami maru dow naiawngün khowmta bowkta mih tatung tanimra marow kowi naia powt kown. Aia kowi dow tara chetra kowi chetah dowi mowr lu klai pawk mih maru naia saita kown nadowi.
The Seed Company