Josua18
1Kanan pren ki powngta bowk kung kowi Israeluüa mih Silo marow kowi arasang takua talawm khai, now khup taklowp taklangra te büah khai. Kanan pren maten amatni krawi powngta bowk khowk chepaw ranit krungchak mih dow nachangla dawngthawnguan kownkow tawi ka krawng bawn dowi tak chekhai.3Naiawng rakowi Josua tek pe maru kawmuüa mih, “Kanan pren dow CHAKRAMANG enni pipu-uüa kowh Thurai peta enni khowk. Tawng khe chiang chow nami pren kowi kowh krawng bawn enni nakrawi powng kown?4Enni ranit krungchak hownia pakrungchak kowi sum ia chi rui maru diah. Now paprenma kowi kowh krawng bawn nakrawi mü kownkow amatni kowi ang nachinah kown. Amatni dow nakrawi müla kaneu hanow nami süng tawng iawng chow naia tabak kown mih lawnguan kowi nauang ruila kown, now ang tut-e nauang pawla büah kown. Nahanow amatni krungchakuüa kowi ang naret pe krawng bawn kown.5Kanan pren kowi kowh bakah dowi tak mih krawng bawn kowi enni nachangah ranit bak kown. Nami ranit bak mih krawng bawn lawnguan kowi enni nauang ruila kaneu kown. Nahanow CHAKRAMANG a-i kowh Thurai pur kowi enni vüi ang nakuak plang kown. Tawkche Juda krungchak hai Josef krungchak dow nami ranit bak mih natawi ka kown nadowi bowt. Juda krungchakuüa dow mrawkphak pra kowh amatni kowh krawng bawn kowi nauowi kown, now Josef krungchakuüa dow tawngphak pra kowh amatni kowh krawng bawn kowi nauowi büah kown.7“Nachenganchepaw Leviuüa dow enni iawng natawi ka krawng bawn kown nadowi. Tawngplawng kowchow panow amatni dow CHAKRAMANG vüi chang uamow lup mih chekhai. Amatni kowh dawngthawnguan dow CHAKRAMANG pur kowi chang uamow lup mih towbowt. Now Reuben krungchak maten, Gad krungchakuüa maten hai Manase krungchakuüa dawnglang mih dow Jawrdan aw satlawt pra pown kowi rik kata krawng bawn khowk. Amatni kowi dow CHAKRAMANG kowh nar Mosi retla pe khowk chekhai,” pakhai.8Nakowkrawi mü krawng bawn kownkow lang ruiah miuüa tarü mih khin khe Josua krawi tek pe mih, “Kanan pren kowi kowh arah maten kowi krawi kowi büa hanow krawi müla kaneu büa diah. Now krawng bawn lawnguan uang ruila büah. Nami enni uang ruila mih dow mami Silo marow kowi ang tut-e uang pawla büa diah. Now enni chowlowkkow krungchakuüa naia ka krawng bawn kownkow CHAKRAMANG pur kowi ang nakuak enni plang kown,” pape khai.9Naiawng rakowi naiawngün maru-uüa dow pren kowi kowh arah maten kowi krawi kowi khai. Amatni dow pren kowi kowh krawng bawn mih changah ranit bak khai. Now pabak pabak kowi kowh marow, kua hai süng tawng iawng chow naia tabak kown mih lawnguan kowi uang ruila büah bowk khai. Nami kung kowi dow Silo marow kowi kowh amatni kowh tangbung khup rah kowi Josua tut-e uang plan büah khai.10Nahanow Josua dow Israeluüa vüi CHAKRAMANG pur kowi kuak pe plang khai, now amatni chowlowkkow krungchakuüa kowi bak pe krawng bawn khai.11Kuak plang hanow Benjamin krungchakuüa kowh ming dow uang rik tatüng khai. Amatni krungchakuüa kaah mih krawng bawn dow Juda krungchakuüa hai Josef krungchakuüa takra kowi chekhai.12Tawngphak pra kowh amatni kowh rihi dow Jawrdan aw iawng panow Jeriko marow tawngphak pra kowh rep mowr, now nami hownia satkup pra kowh hungma mawngma süng iawng panow Bet-Aven pami süngrüp süngkangma mowr kowtowm khai.13Nami hownia Luz mrawkphak pra kowh rep iawng panow Atarawt-Adar pami arah kowi kowdowh khai. (Luz dow Bethel chekhai). Atarawt-Adar uowi mih dow Adak Bet-Hawrawn mrawkphak pra kowh hungh luk kowi chekhai.14Nami kung kowi dow Bet-Hawrawn mrawkphak pra kowh hungh hownia satkup prakowi iu takui now mrawkphak pra kowh Kiriat-Bal kowi kowtowm khai. Kiriat-Bal dow Kiriat-Jearim chekhai. (Kiriat-Jearim dow Juda krungchakuüa kowh marow chekhai). Mami dow Benjamin krungchakuüa kowh satkup pra kowh rihi chekhai.15Mrawkphak pra kowh amatni kowh rihi dow satlawt pra kowh Kiriat-Jearim hownia satkup pra kowh Neftaw aw mowr chekhai.16Nami kung kowi dow nami rihi mih Ben-Hinawm lawngrawi pur kowi kowh hungh tut kowi kowdowh khai. Nami lawngrawi dow Refaimuüa süng kowi kowh lawngrawi mrawkphak prakowi chekhai. Nami kung kowi dow Ben-Hinawm lawngrawi iawng panow Jebusuüa kowh marow tawngphak pra kowh rep rowkrowk iu dowm now En-Rogel mowr kowting khai.17Nami kung kowi dow nami rihi mih tawngphak prakowi kowtakui hanow En-Semes iawng panow Adumim prakowi pangchowng pur kowi Gelilawt kowi awr pün khai. Nami hownia iu dowm hanow Reuben kowh chapa Bohan kowh huamang mowr kowting khai.18Nami kung kowi dow nami hownia Bet-Araba tawngphak pra kowh rep iawng panow Jawrdan lawngrawi kowi kowdowm khai.19Nami kung kowi dow nami rihi mih Bet-Hawgla tawngphak pra kowh rep iawng panow Sata Kowng tawngphak pra kowh sata prek kowi kowchur khai. Jawrdan aw kowmawr mih dow nami sata prek kowi chekhai. Mami dow Benjamin krungchakuüa kowh mrawkphak pra kowh süng rihi chekhai.20Satlawt pra kowh amatni kowh rihi dow Jawrdan aw chekhai.
Maiawngün dow Benjamin krungchakuüa kaah mih krawng bawn rihi chekhai.21Benjamin krungchakuüa kaah mih marow dow Jeriko, Bet-Hawgla, Emek-Keziz,22Bet-Araba, Zemaraim, Bethel,23Avim, Para, Ofra,24Chephar-Amoni, Ofni hai Geba chekhai. Maiawngün marow dow bowkbowk kowi 12 buk chekhai. Now marow riaret kowi kowh kua maten paw kala bowk büah khai.25Nami klen kowi kowh amatni kaah mih marow dow Gibeawn, Rama, Berawt,26Mizpe, Chephira, Moza,27Rekem, Irpel, Tarala,28Zela, Ha-Elef, Jebusuüa kowh Jerusalem marow, Gibeah hai Kiriat-Jearim chekhai. Naiawngün marow dow bowkbowk kowi laitali klüng chekhai. Now marow riaret kowi kowh kua maten paw kala bowk büah khai.
Maiawngün dow Benjamin krungchakuüa kaah mih krawng bawn rihi chekhai.21Benjamin krungchakuüa kaah mih marow dow Jeriko, Bet-Hawgla, Emek-Keziz,22Bet-Araba, Zemaraim, Bethel,23Avim, Para, Ofra,24Chephar-Amoni, Ofni hai Geba chekhai. Maiawngün marow dow bowkbowk kowi 12 buk chekhai. Now marow riaret kowi kowh kua maten paw kala bowk büah khai.25Nami klen kowi kowh amatni kaah mih marow dow Gibeawn, Rama, Berawt,26Mizpe, Chephira, Moza,27Rekem, Irpel, Tarala,28Zela, Ha-Elef, Jebusuüa kowh Jerusalem marow, Gibeah hai Kiriat-Jearim chekhai. Naiawngün marow dow bowkbowk kowi laitali klüng chekhai. Now marow riaret kowi kowh kua maten paw kala bowk büah khai.
The Seed Company