Josua11
1Akung kowi Hazawr marow mang Jabin dow Israeluüa cham awng mih lawnguan tawi ta khai. Naiawng rakowi Israeluüa kowi nakowsenah kownkow aia dow aia hown tatawn taret mih manguüa kowi krawi phowng pe satang khai. Naiawngün manguüa dow Madawn marow mang Jawbab, Simrawn marow mang hai Aksaf marow mang chekhai.2Now tawngphak pra kowh hungma mawngma süng kowi kowh manguüa, Galili sata mrawkphak pra kowh Jawrdan lawngrawi kowi kowh manguüa, awkaw kowi kowh manguüa hai satkup pra kowh Nafawt-Dawr pami arah kowi kowh manguüa kowi paw aia hawla khai.3Nami klen kowi nami satang dow satlawt pra hai satkup prakowi kowh uowi mih Kananuüa kowh manguüa kowi, hungma mawngma süng kowi kowh uowi mih Amawruüa, Hituüa, Perizuüa, Jebusuüa hai Hivuüa kowh manguüa tut-e paw aia phowngla pe khai. Hivuüa dow Hermawn hungh daw kowi kowh Mizpa pami arah kowi uowi mih chekhai.4Naiawngün manguüa dow amatni kowh siphai hawmh maten hown uang khai bowt. Amatni dow kawrnga hai kawrnga kari paw ahuma uang pawla büah khai. Naiawng hai amatni dow akawm krang mih sata pang kowi kowh sema nowng rüaah dowi mih iawng chekhai.5Naiawngün mang maten dow amatni kowh siphai hawmh hown Merawm aw re-e takua talawm hanow khup tangbung büah khai. Now Israeluüa kowi senah kown mih lawnguan kowi sangkrang büah khai.6Nami khin khe CHAKRAMANG tek pe Josua mih, “Kowbüah kowi hangkow kram diah. Tawngplawng kowchow panow tharau kowh maiawng khin khe amatni kowi ang nasaita bowk kown. Amatni kowh kawrnga maten kowi enni natüngta pe uowntüng sa kown, now kawrnga kari paw enni natowkta pe kown,” pakhai.7Naiawng rakowi Josua hai aia kowh siphai hawmh dow ransu-uüa uowi rah Merawm aw re-e kowkowi büah khai. Now ransu-uüa mingmang dowi khe amatni dow kowsenah khai.8CHAKRAMANG dow Israeluüa tut-e ransu-uüa kowi pe sumah khai. Now Israeluüa mih ransu-uüa kowi tawngphak prakowi dow Misrefat-Maim marow hai Sidawn marow mowr, now satlawt prakowi dow Mizpe lawngrawi mowr senla se kowkrawiah khai. Ransu-uüa kowng bowk dowi mowr Israel siphai hawmh dow ransu-uüa kowi krawi senah rereng khai.9CHAKRAMANG ana pek iawng rowprowp Josua mih ransu-uüa kowi changah khai. Aia dow amatni kowh kawrnga kowh uowntüng sa tüngta pe bowk khai, now kawrnga kari paw towkta pe bowk khai.10Nami khin khe akeng mih manguüa luk kowi kowh chang alow mih dow Hazawr marow mang chekhai. Naiawng rakowi Josua hai aia kowh siphai hawmh dow uang plan hanow Hazawr marow uang powngta khai, now nakowi kowh mang kowi saita büah khai.11Nami marow kowi kowh uowi mih maru maten kowi paw Israel siphai hawmh saila bowk khai. Nakowi dow lowk iachow paw ta sing dowi bowt chekhai. Nami kung kowi dow marow mih towkta büah khai.12Josua hai siphai hawmh dow naiawngün manguüa kowh marow maten powngta pe bowk khai. Now manguüa maten hai marowchakuüa maten kowi paw saita bowk khai. Josua hai aia kowh siphai hawmh dow CHAKRAMANG kowh nar Mosi ana pek iawng rowprowp chang büah khai.13Nachenganchepaw piakta pakat kowh plan changah mih marow pungmadawng kowi Hazawr marow klen kowi lowkchow paw Josua hai aia kowh siphai hawmh towkla dowi chekhai.14Naiawngün marow hownia dow Israel siphai hawmh mih amatni vüi uanh hai tawncher hawmh pawla büah khai. Nachenganchepaw naiawngün marow kowi kowh uowi miuüa kowi dow asaima saila bowk khai.15Nami dow Mosi ana pek iawng rowprowp Josua chang mih chekhai. Tawngplawng kowchow panow CHAKRAMANG kowh nar Mosi dow naiawngün ana pek Josua kowi rik tekla pe khowk chekhai. Naiawng rakowi Mosi tut-e kowh CHAKRAMANG ana pek iawng rowprowp Josua ta chang khai.16Naiawng hai Josua hai aia kowh siphai hawmh dow paprenma powngta pe khai. Naiawngün dow tawngphak hai mrawkphak prakowi kowh hungma mawngma süng hai laina süng maten, Gawsen marow riaret kowi kowh uowi mih arah maten hai Jawrdan lawngrawi chekhai.17Amatni dow Seir hown atawnchow mih tawngphak pra kowh Halak Hungh hownia mrawkphak pra kowh Baal-Gad arah kowi kowh Lebanawn lawngrawi mowr krawi powngta khai. Nami lawngrawi dow Hermawn Hungh daw kowi chekhai. Josua dow naiawngün manguüa hown ning akrama dowk tasen kung kowi saita bowk khai.19Gibeawn marow kowi kowh uowi mih Hivuüa klen kowi dow mia iawng mih paw Israeluüa hown uang tatow taking tasangra sangbowk laitawm dowi chekhai. Akeng miuüa kowi dow Israel siphai hawmh mih nowngta bowk khai.20Naiawngün marowchakuüa kowh saktuak dow akhawtma CHAKRAMANG changta pe mih chekhai. Nami dow amatni kowi Israeluüa naia senah kownkow hai saksing sanara saktuak uowi dowi hown naia saiah kownkow chekhai. Tawngplawng kowchow panow naiawng nachang kown mih Mosi kowi CHAKRAMANG rik peta ana khowk chekhai.21Nami khin khe Josua dow hungma mawngma süng kowi kowh uowi mih Anakuüa kowi paw kowsaita bowk khai. Naiawngün Anakuüa uowi mih dow Hebrawn, Debir, Anab, Juda hai Israeluüa uowiah mih süng maten kowi chekhai. Aia dow Anakuüa kowi hailawm amatni kowh marow maten asaima piakta pe bowk khai.22Israeluüa pren kowi dow lowk iachow paw Anakuüa ta sing dowi bowt chekhai. Tawkche Gaza marow, Gat marow hai Asdawd marow kowi dow Anakuüa ta sing uowi ne tak chekhai.23Mosi tut-e kowh CHAKRAMANG ana pek iawng rowprowp Josua dow paprenma powngta khai. Now Israel krungchakuüa kowi dow amatni nachangla dawngthawnguan kownkow nami pren mih aia krawi ret pe khai. Nami kung kowi dow pren mih thaulang khai bowt.
The Seed Company