Josua10
1Josua mih Ai marow kowi nowngta kowh asaima piakta khai. Jeriko marow hai mang kowi kowh changah iawng Ai marow hai mang kowi paw aia changah khai. Nami satang dow Jerusalem marow mang Adoni-Zedek tawi ta khai. Nami klen kowi Gibeawnuüa dow Israeluüa hown tatow taking tasangra sangbowk laitawm khai bowt, now Israeluüa hown tawi taiua uowi khai bowt pami paw Jerusalem marow mang tawi ta khai.2Naiawngün ta rakowi Jerusalem marow mang hai aia kowh maru-uüa dow lainowmma kram khai. Tawngplawng kowchow panow Gibeawnuüa kowh marow dow marow kri iawng aiukma chekhai. Kowbüah kowh marow dow Ai marow lak-e paw lang iuk chekhai, now nami marow kowi kowh kachakuüa hawmh paw akürma kangowh chekhai.3Naiawng rakowi Jerusalem mang Adoni-Zedek mih Hebrawn marow mang Hoham, Jarmut marow mang Piram, Lakhis marow mang Jafia hai Eglawn marow mang Debir büah kowi krawi peah satang khai. Aia krawi tek pe mih,4“Gibeawnuüa mih Josua hai Israeluüa hown tatow taking tasangra sangbowk laitawm khai bowt. Naiawng rakowi Gibeawnuüa kowh marow kowsen kown mih uang tawi khowng ang büa diah,” pakhai.5Nami laiklow tata hanow Amawruüa kowh mang tanga ia dow — Jerusalem marow mang, Hebrawn marow mang, Jarmut marow mang, Lakhis marow mang hai Eglawn marow mang — amatni kowh siphaiuüa kowi arasang kuaah khai. Amatni dow amatni kowh siphaiuüa kowi pawla now Gibeawn marow re-e kowkhup tangbung khai, now Gibeawn marowchakuüa kowi senah büah khai.6Nakhowk khe Gilgal kowi kowh Israeluüa tangbung khup rah kowi Josua kowi Gibeawnuüa uang phowng pe satang khai. Gibeawnuüa uang tek pe Josua mih, “Hungma mawngma süng hownia Amawruüa kowh manguüa amatni kowh siphaiuüa kowi uang pawla now uang sen anging khai. Naiawng rakowi alenma uangah now uang lawng anging diah. Hauang nuata anging diah; uang tawi khowng anging diah,” pape khai.7Nami satang tata hanow Josua mih aia kowh siphai maten kowi pawla now Gilgal hownia lawt khai. Naiawngünuüa pungmadawng kowi Israeluüa kowh tasen lang kiak mih siphaiuüa paw uowi bowk chekhai.8CHAKRAMANG tek pe Josua mih, “Amawruüa kowi hangkow kram diah. Amatni kowi dow en rut kowi ang apta mih chowbowt. Amatni dow mapaw nanowng en kown nadowi,” pakhai.9Gilgal hownia lawt hanow uar prowt mang büah kung kowi Josua mih aia kowh siphaiuüa hown mingmang dowi khe Amawruüa kowh siphaiuüa kowi kowsenah khai.10CHAKRAMANG mih Amawruüa kowh siphai hawmh kowi mih Israeluüa pur kowi pe takrow takraiah khai. Naiawng rakowi Israeluüa mih Gibeawn marow kowi Amawruüa kowh siphaiuüa kowi ahuma saita khai. Amatni kowi dow Bet-Hawrawn pra kowh awr pünla mih pangchowng iawng Israeluüa mih kawikrawiah khai. Amatni kowi dow Azeka hai Makeda marow kowi ting dowi mowr patiama rawng Israeluüa krawi saiah khai.11Now Israeluüa pur kowi Bet-Hawrawn hownia powt kowh Azeka pra kowh tiasun kowi iu sun thüm khe amatni luk kowi mih mukuang hownia aiuk aiukma mih ria CHAKRAMANG iu pe klaah khai. Amatni dow Israeluüa hown tasen khe kowh kowng mih lak-e nami ria kuakah mih hown lang kowng hu khai.12Israeluüa rut kowi Amawruüa kowi CHAKRAMANG apta mih khin khe Israeluüa pur kowi CHAKRAMANG tut-e Josua awr tek mih,“Aw CHAKRAMANG, sat kowi Gibeawn marow luk kowi pe iowngah hüah diah,lama kowi dow Aijalawn lawngrawi luk kowi pe iowngah hüah diah,” pakhai.13Naiawng rakowi ransu-uüa kowi Israeluüa nowngta dowi mowr dow sat mih Gibeawnuüa kowh marow luk kowi arasang iowng phülü khai, now lama paw Aijalawn lawngrawi luk kowi iowng phülü khai. Naiawng phaw mih lawnguan dow Jasar kowh bowih kowi arui uowi chekhai. Nakhowk khe sat mih kuang dawnglang kowi arasang uowi phülü khai. Nakow ni dow sat kup mih lang kra pani ngia chekhai.14Nami ni khe kowh lusa maru kowh laiklow iawng CHAKRAMANG chang mih nami dowi rawn hai nami kung kowi paw katpaw uowi dowi chekhai. Nami ni dow Israeluüa vüi kowi CHAKRAMANG dowk pe tasen khai.15Nami kung kowi Josua mih Israeluüa maten kowi pawla now Gilgal kowi kowh tangbung khup rah kowi kowplan khai.16Amawruüa kowh mang tanga ia mih dow powt now Makeda marow re-e kowh puk uowi lowk mih kowi kowtapet khai.17Nachenganchepaw nakowi amatni tapet mih satang dow Josua tata khai.18Nami tata now Josua tek pe aia kowh siphaiuüa mih, “Nami puk plawt kowi hua aiukma kangowh mih kowlün pe sangrum diah, now towla pe achawng mih ne diah.19Tawkchedow nakowi mih hangkow uowi büah bowk diah; enni kowh ransu-uüa kowi kung hownia krawi senah büah reng diah. Amatni kowi dow amatni kowh marow prakowi enni nape powtah kown nadowi. Tawngplawng kowchow panow CHAKRAMANG enni kowh Thurai mih amatni kowi enni rut kowi apta enni mih chowbowt,” pape khai.20Naiawng hown Josua hai Israeluüa dow Amawruüa kowh siphai hawmh kowi chumta ngia khai. Nachenganchepaw ia plai ne miuüa dow amatni kowh tap uowi mih marow lak kowi kowkup khai.21Nami kung kowi dow Israel siphai maten mih Makeda kowi kowh tangbung khup rah kowi thaulangma hown Josua tut-e uang plan khai bowt. Nami hownia bowt now Israeluüa kowi kingküala mih laiklow Kanan pren kowi kowh maru-uüa miapaw uam tek dowi bowt chekhai.22Now Josua tek pe aia kowh siphaiuüa mih, “Puk plawt mih kowuowah now paimi mang tanga ia kowi ang tut-e uang pawla büa diah,” pape khai.23Naiawng rakowi aia kowh siphaiuüa dow puk lak kowi kowh tapet mih mang tanga ia kowi uang lawtla now Josua tut-e uang pawla khai. Naiawngün manguüa dow Jerusalem marow mang, Hebrawn marow mang, Jarmut marow mang, Lakhis marow mang hai Eglawn marow mang chekhai.24Naiawngün manguüa kowi Josua tut-e Israel siphaiuüa uang pawla kung kowi Israeluüa maten kowi Josua hawah khai. Now aia hown kowh tawi tarü tasen mih siphai aluchowuüa kowi Josua tek pe mih, “Mami re-e uang büah now mami manguüa kowi uang nün pe ngawngtung büah madiah,” pape khai. Naiawng rakowi siphai aluchowuüa dow nami manguüa kowi kownün pe ngawngtung khai.25Aia kowh siphaiuüa kowi Josua tek pe mih, “Hangkow kram büah. Hangkow sak nen büah. Akürma hai sakkraingma uowiah büa diah. Enni nacham senah kown mih ransu-uüa maten kowi maiawng CHAKRAMANG nachangah reng kown taih,” pape khai.26Nami kung kowi dow Josua mih nami mang tanga ia kowi nasaita bowk hanow singh tanga klüng kowi natarta hüah kown mih aia maru-uüa kowi peah ana khai. Nami manguüa uak dow sat kup dowi mowr singh plawng kowi tatar hüah khai.27Sat kup khowk khe dow Josua ana hown nami manguüa uak mih singh plawng hownia maru kowklaah khai, now amatni tapetla mih puk lak kowi kowkuakah khai. Now nami puk dow hua aiuk aiukma mih hown büngla khai. Naiawngün dow kawmat pat nakowi uowi reng chekhai.28Nami ni khe Josua mih Makeda marow dow powngta khai bowt. Nami marow kowi kowh mang hai sing uowi mih maru maten kowi dow aia saita bowk khai. Aia dow amia kowi paw asak pe plaiah dowi chekhai. Jeriko marow mang kowi aia changah iawng Makeda marow mang kowi paw aia changah khai.29Nami kung kowi dow Makeda marow hownia Israeluüa maten kowi Josua pawla now Libna marow prakowi tarü khai, now Libna marowchakuüa kowi kowsen büah khai.30CHAKRAMANG mih nami marow hai nakowi kowh mang kowi dow Israeluüa rut kowi ap pe khai. Nami marow mang hai sing uowi mih maru maten kowi dow Josua saita bowk khai. Aia dow amia kowi paw asak pe plaiah dowi chekhai. Jeriko marow mang kowi aia changah iawng Libna marow mang kowi paw aia changah khai.31Nami kung kowi dow Libna hownia Israeluüa maten kowi Josua pawla now Lakhis marow prakowi tarü khai, now Lakhis marowchakuüa kowi kowsen büah khai. Amatni dow Lakhis marow kowi umta lut now senah khai.32CHAKRAMANG mih Lakhis marow kowi paw Israeluüa rut kowi ap pe khai. Nami marow dow pre ni kowh ni khe Josua powngta khai. Nami khin khe Gezer marow mang Horam mih Lakhis marow mang kowi uang tawi khowngah tasen chowdiah. Nachenganchepaw amatni bowkbowk kowi Josua nowngta khai. Libna marow kowi iawng rowprowp Lakhis marow mang hailawm marowchakuüa maten kowi paw Josua saita bowk khai; mia kowi paw towah sing dowi chekhai.34Nami kung kowi dow Lakhis hownia Israeluüa maten kowi Josua pawla now Eglawn marow prakowi kowtarü khai. Amatni dow Eglawn marow kowi umta lut now marowchakuüa kowi senah khai.35Nami marow dow amatni senah kowh ni khe Josua hing powngta khai. Lakhis marow kowi iawng rowprowp Eglawn marow mang hailawm marowchakuüa maten kowi paw Josua saita bowk khai.36Nami kung kowi dow Eglawn hownia Israeluüa maten kowi Josua pawla now Hebrawn marow prakowi tarü khai, now nami marowchakuüa kowi senah büah khai.37Amatni dow Hebrawn marow powngta now nakowi kowh mang hai maru maten kowi saita bowk khai. Nami klen kowi nami marow riaret kowi kowh kua kowi kowh maru maten paw saila bowk khai. Eglawn marow kowi iawng rowprowp Hebrawn marowchakuüa maten kowi paw Josua saita bowk khai; mia kowi paw towah sing dowi chekhai.38Nami kung kowi dow Hebrawn hownia Israeluüa maten kowi Josua pawla kowh cham takuila now Debir marow prakowi tarü khai, now nami marowchakuüa kowi senah büah khai.39Amatni dow Debir marow hai aria aret kowi kowh kua maten powngta now nakowi kowh mang hai maru maten kowi saita bowk khai. Libna hai Hebrawn marow kowi iawng rowprowp Debir marow hai mang kowi paw Josua saita bowk khai; mia kowi paw towah sing dowi chekhai.40Naiawng hai Josua mih Kanan pren kowi kowh mrawkphak pra kowh süng maten krawi powngta bowk khai. Aia krawi powngah mih süng dow hungma mawngma süng ün, Negeb süng ün, awkaw hai rep ün chekhai. Aia dow naiawngün süng kowi kowh manguüa hai sing uowi mih maru maten kowi saita bowk khai; mia kowi paw towah sing dowi chekhai. Josua dow CHAKRAMANG Israeluüa kowh Thurai ana pek iawng rowprowp naiawngün süng kowi kowh uowi miuüa luk kowi changah khai.41Josua dow Kades-Barnea marow hownia Gaza marow mowr, now Gawsen süng maten hownia Gibeawn marow mowr nowngta khai.42Naiawng hai CHAKRAMANG Israeluüa kowh Thurai mih amatni vüi kowi dowk pe tasen khai. Naiawng rakowi Josua dow cham dowk tasen mih pakat tarü sang mrawkphak pra kowh mang hai marow maten kowi nowngta khai.43Nami kung kowi dow Israeluüa maten kowi Josua pawla now Gilgal kowi kowh amatni tangbung khup rah kowi kowplan khai bowt.
The Seed Company