Joel1
1Pethuel kowh chapa Joel tut-e mih CHAKRAMANG kowh laiklow uang ting khai.2Joel tek mih, “Enni aluchowuüa low, sünta büa diah,Juda prenchakuüa low, enni bowkbowk sünta büa diah.Enni chownglawng kowi maiawng mih enni uan kakat khowk bow?Enni pipu-uüa chownglawng kowi paw maiawng mih uanla kakat tak bow?3Mami lawnguan dow atungma lawpah büah reng diah,enni dow enni kowh chauüa kowi lawp pe diah.Enni kowh chauüa paw amatni kowh chauüa kowi pacham lawp pe lah,amatni kowh chauüa paw amatni kowh chauüa kowi pacham lawp pe lah.4Plawng hawmh dow aplan aplan uang piak pren khai;ahawmsang mih plawng kremta mih kung kowi dow krawi piak mih plawng uang ta cha khai.Ahawm sang mih plawng ta lawtta mih dow chet mih plawng uang chata khai,chet mih plawng ta lawtta mih dow apiak mih plawng hawmh uang chata khai.5Pua miuüa low, rü büa diah, now kar büa diah;Arak kham miuüa low, grep tui sar hown kowh arak vüi kar büah nguk büa diah.Tawngplawng kowchow panow nami dow enni ka kown nadowi bowt.6Plawng siphai hawmh dow nauang sen ang pren kownkow uang khai,amatni dow akürma hai akawm krang paw ia rüaah dowi mowr chekhai.Amatni kowh iüng dow krangsila kowh iüng iawng achukma chekhai,amatni kowh sah paw krangsima kowh sah iawng achukma chekhai.7Amatni dow ang kowh grep ruih maten kremta ang büah khai,ang kowh uidut singh maten paw phukta ang büah khai.Uidut singh pik maten klawngta ang büah khai;naiawng rakowi amia ün dow akawdawkma kangowh ta uowi khai.8“Ang maru-uüa low, kar hown nguk hown uowi büa diah;ahua kham kowng khe khup sala uanh hanow malauüa dow kar reng chekhai.Nami iawng dow enni paw khup sala uanh hanow kar büa diah.9CHAKRAMANG chup kim kowi kowh uanap pawi rim khai bowt;kawmdi uanap hai khamah mih uanap pawi chang büah dowi bowt.Naiawng rakowi CHAKRAMANG kowh lup chang mih uamowuüa kar hai nguk khai bowt.10Uih-ien pantawn dow tapiak khai bowt,now grep tui sar paw kang khai bowt.Kanrawn sau dow khowk kown chowbowt;üa maten dow tapiak bowk khowk.Naiawng rakowi krawng dow kar hai nguk hown uowi khai bowt.11“Aw üa lup chang miuüa, sak nga kowh kar büa diah;grep krum khet miuüa low, tuak krat churma hown uowi büa diah,now püm hai iakmow rakowi kar hai nguk hown uowi büa diah.Tawngplawng kowchow panow üa kowi kowh uih-ien pantawn maten piak bowk khowk.12Grep ruih dow keu khai bowt,now uidut singh paw kowng khai bowt.Chekmarawng, dalim hai apel uih paw piak bowk khowk,now krum kowi kowh singh maten paw piak bowk khowk,Maru-uüa tut-e kowh awmrawmra mih chur khai bowt nowm.13“Aw uamowuüa low, khup sala uan büah hanow taprüa taiia mih tüng büa diah;phuchuara kowi kowh chintak miuüa low, kar hai nguk hown uowi büa diah,ang kowh Thurai chintak miuüa low, uang khupla sala uan hanow krü uar büa diah,Tawngplawng kowchow panow enni kowh Thurai chup kim kowi kowh pawi dow taingta khai bowt,kan hap phuchuara hai khamah mih phuchuara pawi dow taingta khai bowt.14Chimsaima mih hawm khang khin phuangah büa diah;nauang takua talawm kownkow maru-uüa kowi hawah büa diah.Aluchowuüa hai prenchakuüa maten kowi hawah büa diah;amatni kowi dow enni kowh CHAKRAMANG Thurai kim kowi pe uangah diah,now CHAKRAMANG tut-e pe nguk pe karah diah.15Uh! Kramra uowi lai kowbow!Tawngplawng kowchow panow CHAKRAMANG kowh ni dow uang tawn khai bowt.Nami piakra ni dow CHAKRAMANG hownia kowh uang ting mih chekhai.16“A-i kowh chakkham uowi dowi bowt mih i khi khowk nadowi bow?CHAKRAMANG kim kowi kowh piawra tama khowk mih i khi khowk nadowi bow?17Sawtah mih liu dow krawng kangma kowi su khai bowt;naiawng rakowi tawng iawng mih luprak paw phaw dowi bowt chekhai.Uih-ak liu krümra kim dow tapiak khai bowt,now uih-ak towk rah kim paw piakta khai bowt.18Tawncher hawmh dow lainowmma kar khai;ka taw rah dowi rakowi amatni dow ngare khai.Chia hawmh dow cham mang panglang se pu khai,now ruapur hawmh paw lainowmma kawm khai.19“Aw CHAKRAMANG, khowng ang kownkow ang haw en khai.Tawngplawng kowchow panow taw rah süng ün dow maih kamta bowk khowk,now kaurawng kowi kowh singh kau maten paw maih kamta bowk khowk.20Naiawng rakowi kaurawng uaramchak khowm padow en tut-e uang kar khai bowt;tawngplawng kowchow panow amatni kowh tui khamra awchawng dow kang khai bowt,kaurawng kowi kowh chak rah kham rah dow maih kamta bowk khowk,” pakhai.
The Seed Company