Joel2
1Zaiawn hungh kowi tum baw büa diah;ang kowh hungh chimsaima mih kowi phih uang ting mih hai nadowk tasen kown mih klow tüng büa diah.Pren kowi kowh uowi mih srui kram hown pacham chür lah,Tawngplawng kowchow panow CHAKRAMANG kowh ni dow uang ting kown chowbowt;2CHAKRAMANG kowh ni dow aiiuma hai iu krang anumma mih ni chekhai,nami ni dow uangnim iawng iu krang akringma mih ni chekhai.Hungma mawngma kowi rau-e khe sat nowi uang sawt reng,nami iawng plawng siphai hawmh akürma hai akraingma mih dow uang tarü khai.Naiawng mih siphai hawmh dow alai chowng khe katpaw uowi dowi tak;naiawng mih dow nauang tale mih chowng maten kowi paw katpaw nauowi kown nadowi tham.3Amatni uang tarü mih khin khe amatni pur kowi dow maih krawi kam khai,now amatni kung kowi dow maih lün bia laplap mih krawi ta mang khai.Amatni uang towm dowi rawn dow pren mih Eden krum iawng chowdiah;amatni klenla kung kowi dow süngrüp süngkangma iawng chekhai,now tawng chap paw ta lat mih uowi dowi chekhai.4Amatni kowh powm dow kawrnga iawng chekhai;amatni dow tasen müa kawrnga iawng iowm lenma chekhai.5Amatni kowh mang klow dow tasen müa kawrnga iowm tün iawng chekhai;amatni dow hungh luk hownia uang chet büah khai.Amatni dow dowm kowi kowh kamla pram bowk mih maih iawng chekhai,amatni dow akürma mih siphai hawmh cham tarü tasen mih iawng chekhai.6Amatni kowi khi hanow prenchakuüa kowh saktuak dow lainowmma pusa khai;takrow lai rakowi amatni kowh lumowr dow müakangma kangowh chekhai.7Nami siphaiuüa dow tasen akiakma miuüa iawng iowm lenma chekhai,now siphaiuüa iawng dow tap kowi paw nowng pün büah khai.Amatni dow atanma mang lawmlawm chekhai;amatni dow amatni kowh mangra tiama hownia süt büah dowi chekhai.8Amatni dow lowkkowlowk taet büah dowi;amatni dow pur prakowi atengma mang büah khai.Lowra mih akrat pusara uang ting chepaw thüa büah khai;amatni dow tan piak dowi kowi atengma mang büah khai.9Amatni dow marow lak kowi uang krawi chet khai,now tap luk kowi ün uang krawi iowm büah khai.Amatni dow kim kowi ün krawi pün khai,kuk mih iawng dow tawngpawk hownia krawi kup büah khai.10Amatni pur kowi dow mukuang hai lusa khowm padow chür khai,now sat, lama hai krek ün khowm padow nowi dowi chekhai.11CHAKRAMANG dow aia kowh siphaiuüa pur kowi rik mang reng,now aia kowh siphaiuüa kowi dow atünma peah ana reng chekhai.Aia kowh siphaiuüa dow maru iun nowng rüaah dowi mowr chekhai;aia kowh ana pek chün miuüa maten dow akürma kangowh chekhai.Tawngplawng kowchow panow CHAKRAMANG kowh ni dow akraingma hai kramra uowima chekhai;amia iawng mih paw nami ni dow nowng kham dowi chekhai.12CHAKRAMANG tek mih,“Nachenganchepaw kawmat paw akhin uowi tak,enni kowh saktuak maten hown ang tut-e uang plan büa diah.Khang hawm büa diah, kar hai nguk hown uowi büa diah,now enni kowh sak kowi rau mih tüngah büa diah,” pakhai.13Naiawng rakowi enni kowh tawnguat nadowi kowi enni kowh saktuak phai sekah diah,enni kowh CHAKRAMANG Thurai tut-e uang plan büa diah.Tawngplawng kowchow panow aia kowh dow saksing sanara atekma chekhai;aia dow kunmarau naklak dowi,now aia kowh achur uowi dowi mih sakraura dow akraingma chekhai.Aia dow maru kowi rip kown nau dowi;aia dow nape lawt kownkow atungma kamrüt hown uowi reng.14Aia dow leta saktuak iawk chepaw naia kown,now aia dow nape enni prasi iawk chepaw naia kown.CHAKRAMANG tut-e alai kowh iawng enni naia chang uanap iawk chepaw naia kown;enni kowh Thurai tut-e kawmdi uanap hai hüngah mih uanap enni naia chang iawk chepaw naia kown.15Zaiawn hungh kowi tum baw büa diah;chimsaima mih hawm khang khin phuangah büa diah,now nauang takua talawm kownkow maru-uüa kowi hawah büa diah.16Chimsaima mih takua khin vüi maru kawmuüa kowi pe kamrütah diah;lawngtang hownia kham iawn reng tak mih ngeuüa hawmh mowr kuaah diah.Chang dawngthawng sar mih masi huaiu khowm padow amatchi kowh kim lak hownia nauang lawt kown takla.17CHAKRAMANG pur kowi kowh chintak mih uamowuüa dow pacham kar lah,amatni dow Thurai chup kim kimpuk hai phuchuara takra kowi pacham kar lah.Amatni dow, “Aw CHAKRAMANG, en maru-uüa luk kowi sanaah diah;en kowh dawngthawnguan kowi hangkow changah maru prawng renra diah,now akeng prenchakuüa tut-e amatni kowi mih hangkow pe chowngah rensi küakau diah.‘Tawng kowi chow kowbüah kowh Thurai?’ padow akeng chenchapuüa hang pacham tek lah,”pahai pacham chup Thurai büah lah.18Nami khin khe CHAKRAMANG dow aia kowh pren kowi nanganah kown,now aia maru-uüa kowi dow nasaksing sanaah kown.19Aia dow aia maru-uüa kowi maiawng naklangah kown:“Uih-ak, sau hai grep tui sar ang uang chin enni khowk,nami hown dow klangiungma enni naduh bowt kown.Akeng prenchakuüa tut-e ang nachangla enni prawng renra kown nadowi bowt.20“Tawngphak hownia kowh uang mih siphaiuüa kowi alakma kowi ang naprütta enni kown;amatni kowi dow akang khawngma hai apiaknama mih süngrüp süngkangma kowi ang nachinah kown.Amatni kowi dow dawnglang mowr mih satlawt pra kowh sata kowi ang naprütah kown,now dawnglang mowr dow satkup pra kowh sata kowi ang naprütah kown.Amatni kowh su nam dow kuang prakowi napün kown,” pakhai.CHAKRAMANG dow kri kraingma mih lup chang reng chekhai.21Aw pren, hangkow kram diah,piaw diah, now awmrawm diah.Tawngplawng kowchow panow CHAKRAMANG dow kri kraingma chang lup khai.22Aw dowm kowi kowh asadua hawmh, hangkow kram büa diah,enni kowh tawkra dowm dow pram asingma uang awmh khai bowt.Singh ün dow nauih iawk kown chowbowt;uidut singh hai grep ruih paw achakma uown uih khowk.23Aw Zaiawn maru-uüa low, awmrawm büa diah,enni kowh CHAKRAMANG Thurai chang enni mih rakowi piaw büa diah.Tawngplawng kowchow panow enni lakke mowr aia dow pe enni uang khai;alai kowh iawng uang müng hai manawng uang paw aia dow pe enni khai.24Bawk ün dow uih-ak hown natek kown,now grep tui hai sau ün dow kawng hownia nave kown.25CHAKRAMANG tek mih,“Enni tut-e kowh uang mih plawng siphai hawmh dow krem mih plawng hai ahawmsang mih plawng,chet mih plawng hai krawi piak mih plawng hawmh chekhai.Nauang kingküa enni kownkow naiawngün plawng hawmh kowi uang chinah mih dow ang chekhai;naiawngün plawng hawmh piakta enni mih maten ang naplan pe enni iawk kown.26Mu tek dowi mowr duh pat enni naka cha kown;enni vüi awdara hai lakkhiara lup ahuma chang reng mihCHAKRAMANG enni kowh Thurai kowi enni narowsiah kown.Ang maru-uüa dow tawng nam khe paw narukrai kown nadowi bowt.27Nami khin khe dow ang kowh maru Israeluüa tut-e ang uowi reng pami enni natuk kown;enni kowh Thurai hai enni kowh CHAKRAMANG ang chowtaih,now ang klen kowi dow mia iawng mih thurai paw uowi dowi bowt.Ang maru-uüa dow katpaw narukrai kown nadowi bowt.28“Nami kung kowi dow maru maten luk kowi ang lümla ang nauang hüng pe kown.Enni kowh chapa chamauüa dow risi iawng natek Thurai lai kown;enni kowh lawngtang matanguüa dow ang hownia kowh mang nakhi kown,now enni kowh malauüa hown klanguüa hawmh dow nakhi mukmang kown.29Nami khin khe dow naruüa luk kowi khowm padow ang naklai pe lümla kown,now kachakuüa hai masiuüa nar luk kowi paw ang matia lümla ang naklai pe kown.30Mukuang hai lusa kowi amatra ang natüngah kown;vi, maih hai maikhük ahuma ang natüngah kown.31Sat dow naiu kown,lama paw vi iawng aringma naown kown.Nami kung kowi dow CHAKRAMANG kowh ni nauang ting kown;nami ni dow akraingma hai kramra uowima mih ni naown kown.32Ka lawngra kownkow CHAKRAMANG ming lüklau mih maten dow naka lawngra kown,now Zaiawn hungh hai Jerusalem kowi kowh maru dow naplai sangrum kown.Nami dow CHAKRAMANG tekta iawng nauang phaw kown,now naplai kown miuüa dow CHAKRAMANG lang kloah miuüa naown kown,” pakhai.
The Seed Company