Jawb9
1Nami kung kowi Bildad kowi Jawb klangah mih,2“Naiawngün en tekah mih laiklow maten dow aching pami ang tuk.Tawkche Thurai mik kowi dow maru mih achinawmma nadowi chekhai.3Thurai hown dow amiapaw nowng taüa dowi chekhai,aia kowi 1,000 kat Thurai lünta e anawrchow khowm aia ia klang dowi tham.4Tawngplawng kowchow panow Thurai dow prengiama hai akürma chekhai,aia kowi kingküa mih maru dow amiapaw nowng plai dowi chekhai.5Maru mingmang dowi khe aia dow hungma mawngma kowi sütah reng chekhai,naiawngün hungma mawngma kowi dow aia kowh kunmaraura hown aia piakah reng chekhai.6Aia dow lusa mih nachüah kownkow uang chin pe lihowng reng,now lusa chüng ün pat aia dow chüah reng chekhai.7Sat kowi aia peah ana dowi now sat mih uang lawt dowi chekhai,now krek ün kowi aia pe nowiah dowi now krek ün uang nowi dowi chekhai.8Mukuang thawp miia dow aia chowtaih,now sata tuilowng luk kowi mang mih paw aia chowtaih.9Aia dow tawngphak pra kowh krek ün thawp mih chekhai,aia dow kuang dawnglang kowi kowh krek ün thawp mih chekhai,now mrawkphak pra kowh krek ün thawp mih paw aia chekhai.10Aia dow maru tukah dowi pat mih kri kraingma mih lup ün chang reng,aia changah mih awdara lup ün dow nowng rüaah dowi mowr chekhai.11Thurai dow ang pur iawng uang mang reng chowdiah.Tawkche aia kowi dow ang khi-ah dowi chekhai.Aia dow ang ria iawng uang mang reng chowdiah.Tawkche aia kowi dow ang tuk matah dowi chekhai.12Aia nau mih uanh aia paw khai e dow aia kowi amia chow nowng hangah kown?‘Tawng chow en chang,’ padow aia kowi amia chow nowng tek pe kown?13“Thurai dow aia kowh kunmaraura mih taingah naklak dowi chekhai;aia kunmarau khe sata nammow Rahab kowh khowng miuüa khowm kram kowh chür reng chekhai.14Nami kowi tawng iawng chow aia kowi ang naklangah kown?Aia kowi naklangla kown mih laiklow tawng kowi chow ang cham ka kown?15Kowmatia kowi achinawmma pahai ang tatuak chepaw aia kowi ang nowng klang dowi chekhai,ang kowh tara chet mih tut-e dow nasaksing sanala ang kown mih towbowt ang nowng lü.16Ang hawah mih khin khe aia klang ang khai chepaw,ang laiklow aia nasünta ang kown mih ang owm dowi chekhai.17Tawngplawng kowchow panow aia dow liku uangchak hown piak ang khai,now aiawnglowma plan plan aia dow pe ang ngarau khai.18Aia dow pe hü ang sak dowi chekhai,pe hü ang sak lak dow akrat kangowh tow ang khai.19Mami che kür lawnguan chekhai hanow aia dow akürma chekhai;now tara chet lawnguan chekhai hanow tara chetra kowi aia kowi mia chow napawla kown?20“Ang achinawmma chepaw ang kowh nawr mih nabek ang angak kown,ang aiungma chepaw ang kowh nawr natek ang angak kown.21Ang achinawmma chepaw tawng chow mrawkra uowi?Ang kowh chownglawng dow ang sui chekhai.22Ang tuak kowi dow Thurai tut-e achinawmma mih maru hai angakma mih maru katsang chekhai.Naiawng rakowi ang tek mih, ‘Achinawmma mih maru hai angakma mih maru kowi Thurai piakah reng,’ pakhai.23Kramra uowima mih rawka hown achinawmma mih maru kowng khe Thurai dow ren reng chekhai.24Aia dow nakruitown lusa kown mih maru ngakuüa kowi peah khai,now tara chet miuüa kowh mik dow aduma Thurai chang pe khai.Naiawng chang mih aia nadowi now naiawng chang mih amia chow?25“Ang kowh chownglawng dow iowm mih maru lak-e chur lang len khai bowt,nami chownglawng dow khila iungra dowi kowi chur khai bowt.26Ang kowh chownglawng dow lawng sanh mih iawng alenma kowi khai.Nami dow uamu khüm chak khe kowh iawng alenma kowi khai.27Ang kowh kawm kratra ang natamata kown pahai ang tek chepaw,krat pusara ang kuakta hanow ang naren bowt kown pahai ang tek chepaw,28ang kowh ngarera maten kowi dow ang kram reng chekhai.Tawngplawng kowchow panow ang achinawmma pahai en nadowk ang dowi kown mih ang tuk chekhai.29Ang kowi dow Thurai mih tang ang aprek khai bowt;naiawng now ang kowh aprek uowi mih natüng kown tawngpaw mrawk dowi bowt.30Ang che kowmatia kowi dua hown tasau chepaw,ari powtla mih chap hown ang sia rut chepaw,31en dow suplawk dawng kowi nakuak ang kown;nahanow ang kowh tawnguat dow nasui ang kown.32“Thurai che ang iawng mih maru chekhai panü aia kowi ang ia klang diah,now angching kowh tara naia kala kownkow tara chetra kowi angching kowia kowi diah.33Thurai angching takra kowi ria mang mih maru uowi lowk ia dit panü,nauang chet angching tara kown mih maru uowi lowk ia dit panü,34ang luk kowi kowh Thurai kowh ripra aia nahenta ang diah,now Thurai kowh ripra ang nakram kown nadowi bowt diah.35Nahanow kram dowi kowi aia kowi ang naklangah bowt diah.Tawkche ang matia dow naiawng ang nowng chang dowi chekhai,” pakhai.
The Seed Company