Jawb10
1Jawb plan tek pe mih, “Ang kowh chownglawng kowi ang sui khai bowt;naiawng rakowi ang kowh kawmkrat laiklow aprawngma ang natek kown,now ang sakdawng kowi kowh laiklow Thurai kowi ang natek pe kown.2Aw Thurai, hauang tang ang angak diah;ang kowh angak phai tüng ang rowt diah.3En towk ang ngare mih tawng chow mrawkra uowi?En thawpah mih uanh kowi dow khawk daw kowi en towah khai,now maru ngakuüa kowi en khowngah mih taka khai bow?4En kowh mik lusa maru mik iawng chekhai bow?Lusa maru khi iawng bow en paw khi?5Lusa maru chownglawng khowt chowtaih bow en kowh chownglawng?En kowh chownglawng paw atownchow chekhai bow?6Tawngplawng kowchow ang kowh angak en krawi cham ang rengreng?Tawngplawng kowchow ang kowh atawi ama en dowk ang rengreng?7Ang kowh aprek uowi dowi mih dow en tuk towbowt,now en rut hownia miapaw nowng lawng ang dowi mih paw en tuk towbowt.8“En matia rut hown en thawp ang khai;kawmat dow en piakta ang kown bow?9Bawn hown kowh en thawp ang mih sam tuak madiah;kawmat bawn kowi en nape plan ang iawk kown mih bow?10Nathawpla ang kown mih kür apa kowi en peah khai,now au mu lak kowi ang kowh buk kow mih en thawp ang khai.11Ang kowh hut maten dow klikle kowi en tawm ang khai,now naiawngün dow nga hai pik hown en bawm ang khai.12En pe ang singra hai en kowh achur uowi dowi mih sakraura en tüng ang khai;en mingkhet ang hanow buk iung kow iungma en tow ang khai.13Tawkche en sakdawng kowi en kamrütta hüah mih uowi lowk tak chekhai;nami dow en natowk ang ngare kown mih chekhai.14Ang chang ngak tak chünchü pami khi kownkow en tang mü ang mih chekhai;nahanow en narip ang kownkow chekhai.15Ang che changta angak khai hanow ang luk kowi ripra nauang ting ngengche kown.Ang chang angak dowi chepaw ang nowng rowng lu dowi bowt chekhai;tawngplawng kowchow panow rukrai hai ngare hown atekma ang uowi khai bowt.16Ang che rowng lu hanow krangsi iawng en nachawm ang kown,now kramra uowima mih kür en natüng ang iawk kown chekhai.17Nakingküala ang kownkow aplan aplan en naiowng ang saksi sar kown,now ang luk kowi kowh sak-hiara mih en nape huah ngamlam kown chekhai;nauang sen ang kownkow aplan aplan en nauang pawla siphai sar kown chekhai.18“Tawngplawng kowchow au mu lak hownia en uang tuk lawtla ang khai?Miapaw khi ang dowi rawn tawngplawng kowchow ang kowng prang dowi?19Ang uang tawi dia dowi panü lang iung kown chowdiah,nadowi now uang dia hown krowksang cham dupta ang prang panü.20Ang kowh chownglawng atownchow mih khowk kown chowbowt;kawmat dow ang nowng piawla nawngchow kownkow lawtta ang bowt.21Iiu chamang iiu mih pren kowi ang lüa mang kown chowbowt;tawng khe paw ang nauang plan kown nadowi bowt chekhai.22Nami pren dow iiu chamang iiu mih pren chekhai;nakowi dow sat downg khe kowh nowi paw uar dawng khe kowh iiu iawng chekhai,” pakhai.
The Seed Company