Jawb7
1Elifaz kowi Jawb plan tek pe mih, “Lusa kowi dow maru mih kawmkrat hown lup chang takla reng chekhai,aia kowh chownglawng dow sukkri kowi mih maru iawng chekhai.2Nar lup chang mih maru dow naka tanai kownkow chawng sat kup reng,sukkri kowi mih maru paw ka sukkri kha kownkow hawt chawng reng chekhai.3Nami iawng ang dow la towng tawi chawng chepaw iungra uang ting dowi chekhai,ang dow iak towng akrat kangowh chowtaih ang ka reng.4Müi mih khin khe paw tawng khe chow ang narü kown padow ang ka tuak khai,now tawng khe chow uar nakowi kown padow ang tatuak khai?Naiawng rakowi uar thowi dowi mowr mapra lai paipra lai ang tarua kunlun khai.5Ang kowh kow kowi dow ma hai dung kangowh towbowt chekhai,now ang kowh pik dow cheng kowh mangchar tui vüng prukruk towbowt.6Ang kowh chownglawng ün dow pawngpai sowr lak-e kowi lang len khai,now naiawngün dow sakowmra uowi dowi kowi chur khai bowt,” pakhai.7Jawb plan tek mih, “Aw Thurai, ang kowh chownglawng dow kawli krowngchow towbowt;ang dow chownglawng kowi aiung nakhi kown nadowi bowt pami ka tuakah reng diah.8Kawmat dow en khi ang reng tak chekhai.Tawkche en nalüa khi ang kown nadowi bowt.En dow nakrawi cham ang kown.Tawkche ang nauowi kown nadowi bowt.9Mukuang kowi kowh uangnim dow tama reng chekhai;nami iawng maru mih kowng hanow uang plan dowi bowt chekhai.10Aia dow aia kim kowi nauang plan kown nadowi bowt,now aia kowh kuachakuüa paw aia kowi natuk matah kown nadowi bowt.11“Naiawng rakowi rarimma ang nauowi kown nadowi bowt;ang sak kowi rau mih laiklow ang natek bowt kown,now mapaw sak-ih dowi mih laiklow ang naphuang bowt kown.12Tawngplawng kowchow achawng mih krüa kowi en tuk tow ang khai?Ang sata kowi kowh dowkamang chekhai bow?13Ang kowh phangbek kowi thaulangma ang nauowi bowt kown padow ang ka tuak khai,now ang kowh kawmkrat paw müita pe hanow na-e kown padow ang ka tuak khai.14Nachenganchepaw nami khin khe mang lak kowi en krawk ang khai,mukmang hown dow lainowmma en pe kram ang khai.15Naiawng rakowi mami hut kangowh mih kow hown sing uowi mih lak-euang betta ang hanow kowngta ang mih chowbowt ang lang nau.16Ang kowh chownglawng ang sui,chowngchowng saksakma nasing kown mih ang nau dowi bowt.Ang lowk iachow kowi pe uowi ang bowt,ang kowh chownglawng dow tawngpaw auan uowi dowi chekhai.17“Tawngplawng kowchow en tut-e maru khowt pat asung uowi khai?Tawngplawng kowchow aia luk kowi khowt pat en pe ching khai?18Aia kowi dow rau towng en krawi müah reng,now aia kowi dow atungma en chaingah reng chekhai.19Ang hownia en cham dang dowi bowt tham bow?Now naiawn kria kown mih khin khowm en pe ang dowi bowt tham bow?20Aw thawngrum chawng mih, ang chang angak mih hown tawng chow en tawi own?Tawngplawng kowchow en kowh leba sek manra en tuk changla ang khai?Ang mih en kowh kurdik chekhai bow?21Tawngplawng kowchow ang kowh aprek hai angak en lawtta ang dowi?Tawngplawng kowchow panow kuam lak kowi ang nalüa uowi kown chowbowt.Nami khin khe en nakrawi cham ang kown.Tawkche ang dow nauowi kown nadowi bowt,” pakhai.
The Seed Company