Jawb5
1Elifaz plan tek mih,“Jawb, maru nauang khowng en kownkow atünma sam haw madiah,kramamu-uüa nauang khowng en ne tak chünchü sam müah madiah sik.2“Kunmaraura dow sangching uowi dowi mih maru vüi kowng müa chekhai,now irsira dow bualama mih maru vüi kowng müa chekhai.3Nawngchow vüi kowi bualama mih maru iuksown mih ang khi khowk.Tawkchedow linlanma sang aia luk kowi uang chin pe piakra khai.4Aia kowh chauüa dow thaulangma ka uowi dowi bowt chekhai;tara chetra kowi amatni kowi takhula kown mih miapaw uowi dowi chekhai.5Aia kowh luprak dow sakkrai hown uowi miuüa nachata pe bowk kown,aia kowh luprak chuh hown tavir lut towkala chepaw akhawr hown uowi miuüa nair pe kown.Tui sakkrai hown uowi miuüa dow aia kowh dawngthawnguan nair pe kown.6“Angak chap mih krawng hownia uang lawt mih nadowi chekhai,now akrat pusara paw bawn hownia kowh awr ru mih nadowi chekhai.7Maih lün hanow maikhük mih aluk prakowi atungma pün reng chekhai;nami iawng uang dia hanow lusa maru mih akrat pusa hown atungma uowi reng.8“Jawb, ang chowng en panü dow Thurai tut-e ang nalü khowng diah,now ang kowh akrat pusara lawnguan mih aia kowi ang naphowk pe diah.9Aia dow abüp nowng khaiah dowi mowr mih kraingra lup chang reng,now awdara lup paw nowng rüaah dowi mowr aia chang reng chekhai.10Aia dow krawng luk kowi uang iu chin uangchak reng,now üa hai laih luk kowi uang iu pe uang tui reng chekhai.11Aia dow maru krüa kowi uowi mih maru-uüa kowi maru luk kowi towah reng,now uowila uiting uangtak miuüa kowi dow athaulangma aia towah reng chekhai.12Aia dow prengia ngak atekma miuüa kowh sangkrangra piakta pe reng.Naiawng rakowi amatni kowh dow tawng lup paw chawn dowi chekhai.13Aia dow chanlaima miuüa kowi thawp sangkrangra ngak khe khuowkah reng,now kuanlama miuüa kowh kamrütra dow aia piakta pe reng chekhai.14Amatni luk kowi dow ni-e aiiu uang kla reng chekhai;sat downg thüm khe uar-e kowh iawng sowp rutrut krawi mang büah khai.15Nachenganchepaw akhawr hown uowi miuüa kowi dow kowngra hownia Thurai lawngah reng,now ngarai miuüa kowi dow akürma miuüa rut hownia aia lawngah reng chekhai.16Naiawng rakowi ngarai miuüa dow ka sakowmra reng,now chet tara nowm dowi miuüa kowi dow Thurai kowpta pe nawr reng.17“Thurai pring hawiah mih maru dow prasira uowima chekhai.Naiawng rakowi lang kri lang kraing mih Thurai pringhawi mih kowi nüah klowkah diah.18Tawngplawng kowchow panow aia dow aia krawi pe mih arau aia krawi iung reng;aia dow krawi pe ngarau reng, now aia rut hown krawi plan pe iungah reng chekhai.19Aia dow aplan aplan phih hownia krawi lawng reng,tawng iawng mih angak chap paw nauang ia kak en kown nadowi.20Khown kuak mih khin khe kowngra hownia aia nape plai en kown,now tasen mih khin khe paw saidawng hownia aia natakhula en kown.21Maru nabek en angak kown mih hownia aia mih nahen en reng kown.Naiawng rakowi phih uang ting chepaw en nakram kown nadowi.22Piakra hai khown kuak mih khin khe en naren kown;kaurawng uaramchak hawmh kowi paw en nakram kown nadowi.23En kowh üa hai laih kowi mih mapaw hua nauowi kown nadowi,now kaurawng uaramchak hawmh paw nauang piak en kown nadowi.24En kowh kim mih athaulangma pami en natuk kown,now en ingsap dawngthawnguan khe tawngpaw tama mih nauowi kown nadowi.25En kowh chauüa mih ahuma nauowi kown,now en kowh krungchakuüa mih dowm kowi kowh pram iawng ahuma naown kown.26Luprak dow akua khin khe kuaah reng chekhai,nami iawng dow ning huma singla kung kowi en naka tadupra kown.27Ang nowkah che maiawngün laiklow na nowm chekhai;naiawng rakowi sünta hanow en chownglawng kowi tawngah diah,” pakhai.
The Seed Company