Jawb4
1Jawb kowh laiklow tata hanow Teman chenchap Elifaz dow Jawb kowi klangah mih,2“Jawb, ang klang en e dow en sak-hiah kown bow?Klang en dowi matchang ang nowng uowi dowi bowt chekhai.3Kung pra kowh laiklow sam tuak madiah, maru akawmma kowi en tüng en sangah khai,now kür uowi dowi miuüa kowi dow en peah kür reng chekhai.4Chownglawng kowi piakra uang ting miuüa dow en kowh laiklow hown ka sakkhawtra reng,now kür uowi dowi miuüa paw en kowh laiklow hown ka kür reng chekhai.5Tawkche kawmat dow en matia luk kowi akrat pusara uang ting khai;naiawng rakowi en tuak krat khai.Akrat pusara dow pe en arau khai;naiawng rakowi en sak nen khai.6Thurai kowi ringkawma hown en kram mih en sakowmra uowi dowi bow?En kowh tachi tanawmra dow en kowh sakowmra nadowi bow?7“Kawmat sam tuak madiah, achinawmma mih maru piak mih uowi ne khowk bow?Now aiungma mih maru-uüa piak mih uowi ne khowk bow?8Ang khi mih dow chang ngak miuüa chowtaih ka ripra reng,now sawt angak liu miuüa chowtaih ngen angak rak reng.9Naiawng mih maru-uüa kowi dow kawli hown khowm Thurai nowng piakah reng,now aia kowh kunmaraura hown amatni dow piak reng chekhai.10Maru ngakuüa dow krangsila iawng hek hai chang ran sulu reng;tawkche amatni kowi dow Thurai rimta hai klowkta pe iüng reng chekhai.11Amatni dow aiüng uowi dowi mih krangsi iawng chakkham khawr hown kowng reng,now amatni kowh chauüa paw krangsima kowh chauüa iawng taset plawt reng chekhai.12“Ang tut-e dow kukpa satang uang ting lowk,nami satang dow ang param hown ang ta khai.13Ang müi su mih khin khe nami satang dow mang kowi uang tek ang khai,now nami laiklow ang ta hanow ang müi piak khai.14Nahanow kram lai bowt kowh ang chür klukluk khai,now ang kowh hut maten paw chürla kluk khai.15Ang pur hownia dow lümla powt lowk ia khai,nahanow ang kowh pikchu dow rü hau khai.16Nami lümla dow ang pur kowi iowng khai.Tawkche aia powm dow ang tuk mat dowi chekhai.Now ririmma khe maiawng ang ta laiklow khai:17‘Maru mih CHAKRAMANG mik kowi achinawmma nowng uowi bow?Mia iawng mih maru paw Thurai pur kowi tachi tanawm dowi chekhai.18Thurai dow mukuang kowi kowh aia naruüa kowi paw owmah dowi chekhai,now aia kowh kramamu-uüa kowi paw aia khi pe atawi reng chekhai.19Dinchow hown kowh aia thawpah mih maru dow plawng iawng aiachow piak reng chekhai,naiawng mih maru kowi tawng iawng chow aia naowmah kown?20Lusa maru dow rau-e singla now sat kup dowi rawn kowng reng chekhai,amatni dow pamik klipchow hown chowngchowng saksakma vüi kowng reng chekhai.21Amatni kowi dow tangbung lut iawng lutah reng,now amatni dow chanlaira uowi dowi kowi kowng reng,’ pakhai,” pape khai.
The Seed Company