Jawb41
1Thurai plan tek mih, “Leviathan kowi kuai hown en nowng küng kown bow?Now aia kowh nawr kowi leng hown en nowng tawm kown bow?2Aia kowh nakawng kowi en nowng phawk pe napha kown bow?Now kuai hown aia kowh awm ueng kowi en nowng uowk kown bow?3Aia kowi en nachangah naklak pakowh en tut-e aia nalü lawt kown bow?Now aia kowi en napeah arau pakowh asamchow aia naklang en kown bow?4Chowngchowng saksakma aia kowi en nachangla nar kownkowaia mih en hown natatow sangbowk laitawm kown bow?5Uakling hown ngawk iawng aia hown en nowng ngawk kown bow?Now en chauüa nangawkla kownkow aia kowi en nowng khuowk pe kown bow?6Aia kowh asung rakowi dam pawk miuüa nataüa prungrung kown bow?Now aia kowh nga nacham sumah kownkow kun chang miuüa nataret kown bow?7Dam hür müa reh hown aia kowh pik en nowng plawn kown bow?Now aia kowh lu kowi happhe hown en nowng uowk kown bow?8Aia kowi che en krawi khüm hanow katpaw nowng tamata dowi mih tasen naphaw kown;nami hownia dow aia kowi nakrawi khüm kownkow katpaw en nacham tarü kown nadowi bowt.9Aia kowi naia khüm kown mih sakowmra dow tawngpaw mrawk dowi;aia kowi dow khi hown krowksang maru kowh sakkraingra khowk reng chekhai.10Aia kowi uam chang naklak mih maru miapaw uowi dowi chekhai;naiawng now ang pur kowi uam iowng mih mia chow uowi?11Rik pe ang rakowi ang napeah lai kown takla pami mia chow uowi?Mukuang dak kowi kowh uowi mih srui dow ang kowh taih chekhai.12“Leviathan kowh buk lawnguan kowi ang natek en kown;aia kowh kür hai aia kowh kow lawnguan kowi ang natek en kown.13Aia buk kowi kowh pik mia chow nowng kleu mih uowi?Now aia towkala buk mih pik nowng thek mih mia chow uowi?14Aia kowh nawr dow kramra uowima mih iüng kangowh tavir lut chekhai,naiawng iüng kangowh mih nawr uam ai kown mih mia chow uowi?15Aia kumlawng kowi kowh lip dow kawngma talüp hüah mih iawng taih;naiawngün lip dow akhawtma tatawm bowk mih chekhai.16Now naiawngün lip dow abingma talüp mih chekhai;naiawngün lip takra hownia li khowm nowng kup dowi chekhai.17Naiawngün lip dow lowkkowlowk tachawp bowk chekhai;naiawngün lip dow lowk chowchi nowng krüaah dowi chekhai.18“Aia che sik hanow anowi uang lawt reng,now amik dow rau-e kowh sat nowi iawng tawk pluplup reng.19Aia nawr hownia dow maih lün bia laplap reng,now mairing maiiang rown prawn rawn reng chekhai.20Aia kowh nakawng hownia dow maikhük lawt iualua reng,nami maikhük dow towk pram mung khe kowh maikhük iawng chekhai.21Aia hü sak khe kowh li hown dow mairing khowm lün reng,now aia kowh nawr hownia dow maih lün bia laplap reng chekhai.22“Aia kowh ngawngtung kowi dow lainowmma kür uowi chekhai,aia kowi khi miuüa dow lainowmma kram rakowi powt reng chekhai.23Aia buk kowi kowh nga dow akhawtma tachek kowk mih chekhai;nami dow khawt lai bowt kowh tawngpaw chuk dowi bowt chekhai.24Aia kowh sak-uih dow huaklu iawng akhawtma chekhai.Nami dow kawm küa müa huaklu iawng akhawtma chekhai.25Aia che awr rü hanow akürma miuüa paw kram reng;amatni dow kram lai kowh tawng chow achang takla mih tuk dowi chekhai.26Aia kowi dow saidawng hown sawtah chepaw tawngpaw own dowi chekhai,now akeng mih rutchün khawkleng achukma mih hown hürah chepaw aia dow tawngpaw own dowi chekhai.27Aia tut-e dow lawngha mih chahau iawng anümchow taih chekhai,now kri paw aia tut-e dow amawma mih singh iawng taih chekhai.28Aia kowi dow tawng iawng mih leba sek paw nowng prütah dowi;iaiba hown kowh ap-ah mih huaklu kowi ngam tawngpaw aia klowkah dowi chekhai.29Lawngha dung hown bawpah chepaw aia dow ren lawt reng chekhai;lawngha dung hown bawpah mih aia tut-e chida kawng keu hown bawpah mih iawng taih chekhai.30“Aia mu pra kowh lip dow chuk krang nimrua sek iawng taih chekhai.Naiawng rakowi neng dawng kowi cham mang now laih thawn ia iawng phaw reng chekhai.31Sata tui paw aia dow puh kowi kowh tuisa klawk burlur mih iawng changah reng,now sata tui mih apawphupma aia changah reng chekhai.32Aia mang kung kowi dow tawk pluplup tiama ta tachak rawkrawk reng,nami aia mang kung kowi kowh tiama dow amük powm sam pau iawng chekhai.33Lusa kowi kowh uowi mih chap maten aia hown tale mih tawngpaw uowi dowi,aia kowi dow towla pe kramra dowi kowi thawpah mih chekhai.34Aia dow uanh thawp maiow kowi kowh lang bawri mih chekhai;aia dow kaurawng uaramchak maten kowh mang chekhai,” pakhai.
The Seed Company