Jawb42
1Nakhowk khe CHAKRAMANG kowi Jawb klangah mih,2“En dow lowra sia nowng chang pami ang tuk;en kowi dow miapaw nowng hang en dowi chekhai.3En lünta ang mih, ‘Nami maru mia chow?Ang kowh sangkrangra tuk dowi matchang tawng chow tek naklak?’ pakhai.Ang tukah dowi mih lawnguan kowi ang tek naklak chekhai nowm.Tawngplawng kowchow panow naiawngün dow ang tut-e awdara uowima chekhai.4En tek ang mih, ‘Kawmat dow sünta diah, ang natek tak;ang nalünta en kown, now en mih naklang ang kown,’ pakhai.5Alai khe dow en lawnguan kowi ta chowtaih ang ta.Nachenganchepaw kawmat dow ang matia mik hown ang khi en khai bowt.6Naiawng rakowi ang lai tawi mih maten rakowi ang uang lü alawt,now ang tarip mih natüngla kownkow dinchow hai plawi dawng kowi ang chowm khowk,” pakhai.7Naiawngün laiklow maten Jawb ki tek kung kowi Teman chenchap Elifaz kowi CHAKRAMANG tek pe mih, “Ang kowh nar Jawb tek iawng en hai en auiuauüa dow ang lawnguan kowi anowmma tek dowi chekhai; naiawng rakowi enni luk kowi dow ang kowh kunmaraura mih lün pluplup khai.8Naiawng rakowi kawmat mih chiala ranit pum hai ruapurla ranit pum pawla hanow Jawb tut-e kowkowi büa diah, now enni matia vüi kowchang tikah mih uanap büa diah. Ang kowh nar Jawb mih enni vüi ang tut-e nauang lü lawt hanow ang nasünta pe kown, now enni buala mih sung ang nape enni kown nadowk. Tawngplawng kowchow panow enni dow ang lawnguan kowi ang kowh nar Jawb tek iawng enni tek dowi chekhai,” pakhai.9Nakhowk khe Teman chenchap Elifaz, Suhite chenchap Bildad hai Namathite chenchap Zofar büah dow CHAKRAMANG tek iawng rowprowp chang khai, now Jawb awr lü awr leng mih maten CHAKRAMANG hawt sünta pe khai.10Aia auiuauüa vüi ki chup Thurai kung kowi CHAKRAMANG dow alai kowh aia chownglawng iawng Jawb kowi plan towah khai iawk; lowra chap kowi aia kowi dow alai kowh lak-e pre dungna CHAKRAMANG peah khai.11Aia kowh tainau-uüa, tuamowuüa hai aia hown tatuk miuüa maten mih aia kim kowi uang hanow aia hown taiua cha chakkham khai. Amatni dow aia luk kowi kowh CHAKRAMANG uang pawla pe akawm akratra mih maten rakowi aia kowi peah sakklamra khai. Amatni bowkbowk dow tai aklu chi hai kuh ramseng atawng chi aia kowi peah khai.12CHAKRAMANG dow Jawb kowi rik klenta mih chownglawng kowi kowh lak-e nami kung kowi kowh chownglawng kowi lang peah prasi khai. Aia kowh tawncher uowi mih dow ruapur 14,000 pum, ut 6,000 pum, chiala 2,000 pum hai kawrngaramchük 1,000 pum chekhai.13Aia dow plankut ka kachakuüa ranit ia hai masiuüa sum ia tak chekhai.14Aia kowh chama ata mih ming dow Jemima, adawng mih ming dow Kezia, now asawi mih ming dow Keren-Hapuk chekhai.15Nami khin khe dow nami pren kowi mih Jawb kowh chamauüa iawng klangiung mih masiuüa miapaw uowi dowi chekhai. Amatni kowi dow amatni kowh rakmauüa kowi iawng apa retla pe dawngthawnguan khai.16Nami kung kowi paw Jawb dow singla 140 ning tak chekhai. Aia dow aia kowh chapa chamauüa kowh chu chah kowi tali chowng mowr tak khila khai.17Naiawng hai Jawb dow ning huma sing uowila now lawngtangma khowk khe kowng khai.
The Seed Company