Jawb3
1Nami kung kowi dow Jawb mih tarowng lai tek khai bowt. Aia dow aia kowh dia ni kowi maiawng hai peah piati khai:3“Ang kowh dia ni mih pacham piak prang lah,Au apa thawp ang mih iak dow pacham piak prang lah.4Nami ni dow aiiuma pacham phaw lah;nami ni dow katpaw hang pacham ka anowi tham bowt lah,now nami ni kowi dow Thurai mih pacham tamata prang lah.5Nami ni dow iiu chamang iiu mih ni pacham chowng lah;aia kowi dow uangnim pacham mumta klum lah,now nami ni aiiuma mih kowi dow kramra pacham uowi lah.6Nami iak dow iiu chamang pacham iiu lah;ning kowi kowh ni maten pungmadawng kowi nami ni dow hang pacham klowkla lah,now la kowi kowh ni maten kowi paw nami ni dow hang pacham tawi uowi lah.7Nami iak dow ka chah dowi mih masiuüa iawng pacham chowng lah,nami iak kowi dow tawng iawng mih awmrawm meng paw hang pacham ta lah.8Ni ün nangala kownkow chang mantan miuüa dow nami ni kowi pacham pe piati lah;mantan hown Leviathan kowi nowng krüng miuüa nami ni kowi pacham peah piati lah.9Nami iak khe kowh krek maten dow pacham iiu bowk lah;nami iak hawt chawng anowi mih dow aiawnglowma pachowng lah,now rau pra kowh anowi mih nami iak hang pacham khi lah.10Tawngplawng kowchow panow nami iak dow au kowh chah ruih pitta pe dowi chekhai,now akrat pusara ang nakhi kown mih hownia henta ang dowi chekhai.11“Tawngplawng kowchow mu lak kowi uowi reng tak khe ang cham kowng prang dowi?Nadowi now tawngplawng kowchow uang dia hown krowksang ang kowng prang dowi?12Tawngplawng kowchow au downg lak kowi ang tuk ka tapai khai?Tawngplawng kowchow aia kowh iawn tui au tuk pe kham ang khai?13Naiawng nadowi e dow thaulangma kawmat ang mawk phülü bowt diah,now ang ka ipmüi hai ang ka tanai phülü bowt diah.14Alai kowh kim iung thawp mih manguüa hown ang cham tanai phülü bowt diah;mang prengia pek miuüa hown ang cham uowi phülü bowt diah.15Tai hown kowh thawp kim mih alai kowh pren kruitown miuüa hown ang tawi uowi phülü bowt diah,now kuh ahuma uowi miuüa hown ang tawi uowi phülü bowt diah.16U mu lak kowi kowng kowh khila sat nowi dowi mih chah iawng,tawngplawng kowchow krawng dawng kowi cham dupta ang hüah dowi?17Krawng dawng kowi dow maru ngakuüa paw krawi pusa dowi bowt,now kawm miuüa paw ka tanai phülü chekhai.18Nar kowi uowi miuüa paw nakowi dow asowrma ka uowi chekhai,now krawi chang nowng miuüa kowh nang klow paw nakowi dow ta dowi chekhai.19Nakowi mih maru iuk maru sowm uowi bowk chekhai,now naruüa paw kim iah nowng changra hownia ka thaulangra bowk chekhai.20“Tuak kawm tuak krat hown uowi miuüa kowi tawngplawng kowchow pe khi-ah anowi khai?now chownglawng kowi ngare kangowh miuüa kowi tawngplawng kowchow pe singah khai?21Amatni dow kowng kown nau chepaw ka kowng dowi chekhai,amatni dow asung khakma mih uanh lak-e kowng kowi nau chepaw ka dowi chekhai.22Amatni dow tadupra kuam kowi ia ting now awmrawm reng,now tadupra kowi ia ting rakowi lainowmma piaw reng chekhai.23Sakowmra uowi dowi miuüa kowi tawng rakowi chow Thurai tuk peah chownglawng khai,naiawng mih maru kowi tawngplawng kowchow pe singah khai?24Ang kowh sak hü kawm mih dow chowng ang kowh chakkham khai bowt,ang kowh nguk klow dow tui takhük plawtlawt mih iawng towbowt chekhai.25Ang kramah mih chap maten dow ang luk kowi uang kla khai,naiawng naphaw kown ang kramah nowm nowm mih dow ang luk kowi uang ting khai.26Ang kowh thaulangra uowi dowi; ang ka tanai dowi chekhai,now ang kowh akrat pusara mih katpaw akhowk uowi dowi chekhai,” pakhai.
The Seed Company