Jawb39
1“Kaurawng kowi ngaia pen mih khin en tuk bow?Naki ma pen mih en khi kakat tak bow?2Mu lak kowi mün ni chow amatni kowh chah uowi mih en rüaah tak bow?Now amatni pen chah mih khin en tuk tak bow?3Amatni dow han chungchow uowiah now pen chah reng chekhai,now ki penta chah hanow amatni kowh mu rau dow rim reng chekhai.4Amatni kowh chah dow akuangma mih dowm kowi awr iuk awr sown reng;amatni kowh chah dow iuk khowk hanow u hownia cham lang powt reng chekhai.5“Kaurawng kawrngaramchük kowi peah thaulangra mih mia chow?Amatni kowi khuowkla mih leng latta pe mih mia chow?6Amatni kowi dow süngrüp süngkangma kowi ang towah khai;amatni kowi dow a-ikma mih krawng kowi ang pe uowiah khai.7Amatni dow marow kowi kowh tünteu hownia alakma kowi cham uowi reng,now amatni kowi pe changah lup mih maru kowh hek klow paw ta büah dowi chekhai.8Amatni kowh tawkra dow hungma mawngma süng kowi chekhai;amatni dow hungma mawngma kowi krawi cham pram reng chekhai.9“Chiarowngla kowi en pe changah lup e nachang en kown bow?Amatni dow uar-e khe chia rum lak kowi nauowi en kown bow?10Amatni kowi dow laih kowi kowh laih thawn tim kowi en naia khuowk kown bow?Amatni dow en vüi kowi nathawn en lawngrawi kown pe bow?11Amatni kowh kür ahuma mih luk kowi en naowmsak kown pe bow?En kowh adikma mih lup amatni kowi en nape changah kown pe bow?12Laih kowi kowh cha kim kowi amatni nauang pawla en luprak kown pe bow?Naiawng amatni nachang en kown mih amatni luk kowi en owm tak bow?13“Ut uaklinguüa dow akür akürma klup lap reng chowdiah.Tawkche amatni dow tuipai khowt khowm nowng iow dowi chekhai.14Ut uaklinguüa dow krawng kowi cham duita hüah now powt reng,now amatni kowh dui dow se kowi pe denah reng chekhai.15Amatni dow amatni kowh dui kowi akeng miuüa nanünta lowmow pami tuak dowi chekhai,now kaurawng uaramchak hawmh nateuta lowmow pami paw tuak büah dowi chekhai.16Ut uaklinguüa dow amatni kowh chauüa kowi amatni kowh chah nadowi iawng nüla khai,amatni dow amatni kowh chauüa kowng now amatni kawm iawm mih ka tuak dowi chekhai.17Tawngplawng kowchow panow amatni kowi dow Thurai pela chanlaira dowi chekhai,now tukra paw amatni kowi dow Thurai pela dowi chekhai.18Nachenganchepaw klupla lap se iowm khe dow amatni mih lainowmma len chekhai.Naiawng rakowi amatni dow kawrnga alenma mih luk kowi kowh chowm mih kowi renah reng.19“Jawb, kawrnga kowi peah kür mih en chekhai bow?Now amatni kowh ngowngsowng pawi klangiungma mih paw en chekhai bow peah?20Amatni kowi plawng iawng nowng pe chetah mih en chekhai bow?Amatni kowh nakawng hownia bawrima mih klow dow kramra uowima chekhai.21Amatni dow akür akürma rowt khawk hanow amatni kowh kür hown piaw reng,now tasen mih khin khe amatni dow cham dowk tasen reng chekhai.22Amatni dow kram pami hing tuk dowi chekhai.Naiawng rakowi saidawng pur hownia paw süt büah dowi chekhai.23Amatni buk kowi kowh tauai hüah mih leba sek rowng dow tasowk krawkrawk reng,now amatni luk kowi kowh chowm mih siphai kowh leba sek hai reh dow tawk pluplup reng.24Amatni dow sak denma khe kowh iawng chür klukluk se iowm reng;ta baw tün hanow amatni dow nowng uowi phülü dowi bowt chekhai.25Baw tün hown krowksang amatni dow nakawng hownia chang atün reng,now siphai aluchow kowh tasen hawk klow hai tasen nam paw ta büah reng chekhai.26“Mrawkphak prakowi naiow kownkow mukaichow mih iang lap reng,naiawng mukaichow tuk iow mih en sangah kowh chekhai bow?27Alowngma kowi pat uamu iow reng mih en peah ana kowh bow?Now alowngma mih arah kowi uamu chang bai mih paw en peah ana kowh bow?28Amatni dow rak arema mih rah kowi cham uowi reng,now uar-e khe dow rak luk kowi cham uowi büah reng.Rak dow amatni kowh akhawtma mih kimkrowng chekhai.29Amatni dow rak luk hownia krawi tang mü chakkham reng;amatni kowh mik dow alakma hownia khi chakkham reng chekhai.30Amatni kowh chauüa dow aduma pat cha vi reng;amatni kowi dow uak uowi rah re-e khi-ah reng chekhai,” pakhai.
The Seed Company