Jawb34
1Nami kung kowi Elihu plan tek pe auiuauüa mih,2“Chanlaima miuüa low, ang laiklow sünta büa diah,prengia uowima miuüa low, ang laiklow kowi pe param büa diah.3Tawngplawng kowchow panow dai dow tang kan sowr reng chekhai,nami iawng param paw maru kowh laiklow chaing reng chekhai.4Naiawng rakowi uang büa diah,amia kowh laiklow chow thik mih a-i chaingah madiah sik;amia kowh laiklow chow lang iung mih a-i sam chamah madiah sik.5“Jawb tek mih, ‘Ang dow achinawmma.Tawkche Thurai dow chet ang tara nowm dowi.6Ang tek lainowm chepaw amatni dow nüla ang daila khai,ang chang ngak dowi chepaw iung dowi mih arau ang ka khai,’ pakhai.7“Sam tek büah madiah! Jawb iawng mih maru uowi ne tak bow?Aia dow atungma Thurai kowi ringkaw dowi mih lai tek khai.8Aia dow chang lup ngak miuüa hown tawi taiua reng chekhai,now maru ngakuüa hown paw aia dow tawi taiua reng chekhai.9Jawb tek mih, ‘Thurai kowi sak-ihra pek dow mrawkra uowi dowi,pe sak-ihah chepaw aia dow tawngpaw naka kown nadowi,’ pakhai.10“Prengia uowima miuüa low, ang laiklow sünta büa diah,lowra nowngia chang mih Thurai dow katpaw chang ngak dowi chekhai.11Thurai dow maru changah mih lup iawng peah asung reng,maru kowh chowm krang uowi krang iawng aia dow peah sung reng chekhai.12Thurai dow katpaw chang ngak dowi,lowra nowngia chang mih Thurai dow chet tara nowm reng chekhai.13Thurai kowi dow nakruitown lusa kown mih kurdik amiapaw peah dowi,palusama naming nakhet kown mih lup paw aia kowi amiapaw peah dowi chekhai.14Aia che aia tekta mih laiklow iawng chang khai,now aia peah mih lümla hai kawli paw aia pawta khai hanow,15lusa maru dow alenma nakowng kown,now amatni dow naplan chowng dinchow iawk kown.16“Enni kowh che prengia uowi hanow mami laiklow sünta büa diah,now ang tek lai mih khin khe ang kowh laiklow kowi pe param büa diah.17Thurai che tara nowm kowi sui khai e dow nowngia kruitown pren kown bow?Achinawmma mih hai akürma mih Thurai kowi enni napeah angak kown bow?18Aia dow manguüa kowi tek pe mih, ‘Enni dow asung uowi mih maru chekhai,’ pakhai.Now aluchowuüa kowi aia tek pe mih, ‘Enni dow tachi tanawm dowi mih maru chekhai,’ pakhai.19Aia dow pren kruitown miuüa prakowi tawi tangila dowi chekhai,ngaraima miuüa kowi lak-e kurengma miuüa kowi aia lang sakrauah dowi chekhai.Tawngplawng kowchow panow amatni bowkbowk dow aia kowh uanh thawp chekhai.20Amatni dow mingmang dowi khe ün kowng reng,now uar dawng uar kak khe ün kowng reng chekhai.Akürma miuüa khowm padow aiawnglowma kowng reng chekhai.21“Tawngplawng kowchow panow Thurai dow tawng chow maru chang mih krawi tang mü reng chekhai,amatni kowh khawk san lawi khowm aia krawi tang mü reng chekhai.22Thurai tut-e dow maru ngakuüa kowh aiiuma mih tapetra uowi dowi chekhai,now maru ngakuüa tapetla kown mih aiiuma mih anim paw uowi dowi chekhai.23Thurai kowh dow chaing maru kown mih akhin khowm kla dowi,aia vüi dow lusa maru kowi nachet pe tara kown mih khin khowm bowkta mih uowi dowi chekhai.24Aia dow mia kowi paw lüntala dowi matchang akürma miuüa kowi piakah reng,now amatni takcha kowi akeng miuüa kowi aia towah aluchow reng chekhai.25Tawngplawng kowchow panow amatni changah mih lup ngak ingsap dow aia towah reng chekhai.Naiawng rakowi amatni kowi dow iak-e khe ün aia piakah reng.26Amatni kowh angak rakowi amatni kowi aia ripah reng chekhai,amatni kowi dow maru pur kowi aia ripah reng chekhai.27Tawngplawng kowchow panow amatni dow aia tiama kowi mang dowi chekhai;now aia kowh ana pek prakowi pe ching büa dowi chekhai.28Amatni krawi chang nowng rakowi ngarai miuüa kowh kar klow dow Thurai tut-e kowting khai,nahanow ngarai miuüa kowh kar klow dow Thurai hawt sünta pe khai.29Ririmma aia uowi chepaw aia kowi dow amiapaw ia peah ngak dowi chekhai,aia che petta lumowr hanow aia kowi dow amiapaw khi-ah dowi chekhai.Nachenganchepaw aia dow maru hai chenchapuüa luk kowi tawi uowi reng chekhai.30Naiawng Thurai chang mih dow aia kowi kowh ringkaw dowi miuüa hang pacham kruitown pren lah pakowh chekhai,now maru kowi mih tiama ngak prakowi hang pacham nowng pawla lah pakowh chekhai.31“Ang kowh ngak rakowi ang ka ripra khowk.Naiawng rakowi ang chang ngak kown nadowi bowt.32Ang tukah dowi mih lawnguan dow tüngsang ang diah,ang changta angak khai hanow ang nachang kown nadowi bowt,” pamiThurai kowi miapaw tek pe dowi chekhai.33“Jawb, en dow Thurai kowi nuata khai;nami kowi en nau iawng tawng iawng chow Thurai nape en awmrawm sung kown?Saktuak anikma nauowi kown mih dow en kowh lup chekhai; ang kowh lup nadowi.Naiawng rakowi tawng chow en tuak mih phai tek ang diah.34Prengiama miuüa dow maiawng natek ang kown,now chanlaima mih maru-uüa paw maiawng natek ang kown,35‘Jawb dow prengia uowi dowi mih maru iawng prow sang khai,aia tekah mih laiklow dow auan uowi dowi chekhai,’ napa kown.36Jawb tekah mih laiklow maten dow chaingah e naiung kown.Tawngplawng kowchow panow aia kowh laiklow dow maru ngakuüa kowh laiklow iawng chekhai.37Aia dow aia changah mih angak klen kowi Thurai kowi kingküaah khai;aia dow a-i pur kowi Thurai kowi peah rukrai khai,now Thurai kowi kingküala mih laiklow paw ahuma tek khai,” pakhai.
The Seed Company