Jawb23
1Nakhowk khe Elifaz kowi Jawb klangah mih,2“Kawmat paw ang dow Thurai tut-e chawk lai reng tak chekhai.Tawngplawng kowchow panow aia dow towk ang ngare reng tak chekhai.3Aia kowi naka cham kown mih arah che ang tuk panü;nami aia uowi rah kowi ang kownowng kowi diah.4Now ang lawnguan dow aia kowi ang naia chia pe diah;nami klen kowi ang achinawmma pami lawnguan paw ang naia tek pe diah.5Nakhowk khe aia klang ang mih ang nasünta pe diah,now tawng chow aia tek ang mih paw ang natukta diah.6Thurai dow aia kowh kri kraingma mih kür hown nataüala ang kown bow?Taüala ang dowi tham; aia dow ang laiklow nasünta ang kown taih.7Anowmma mih maru dow Thurai hown ia taüa chekhai;naiawng rakowi ang aprek uowi dowi mih aia naia phuang ang kown.8“Satlawt prakowi ang krawi cham chepaw aia kowi ang khi dowi,satkup prakowi ang krawi cham chepaw aia kowi ang khi dowi.9Tawngphak prakowi ang krawi cham chepaw aia kowi ang khi dowi,now mrawkphak prakowi ang krawi tang mü chepaw aia kowi ang khi dowi chekhai.10Nachenganchepaw tawng chow ang chang mih aia dow tuk bowk chekhai,aia che chaing ang e achangma mih kuh iawng ang chimsaima pami aia nakhi ang kown chowdiah.11Ang dow kaah sakowmma hai aia tiama kowi mang reng chekhai,tiama ngak pra mang dowi kowi aia kowh tiama prakowi chowtaih ang mang reng.12Aia kowh ana pek hownia dow ang cham süt dowi chekhai,aia kowh laiklow dow ang nauah mih chakkham lak-e ang lang towah sung khai.13Tawkche aia sangkrangta khowk mih kowi dow miapaw nowng hangah dowi chekhai;aia chang kown nau mih dow aia mih changta reng chekhai.14Naiawng rakowi ang vüi khowm bowkta mih iawng aia dow nachang kown;ang luk kowi nachang kown mih sangkrangra aia tut-e ahuma tak chekhai.15Naiawng rakowi ang dow aia pur kowi lainowmma kram khai,naiawngün ang tuak hanow aia kowi lainowmma ang kram khai.16Thurai dow ang kowh sak mih anenma changta ang khai,lowra nowngia chang mih Thurai dow lainowmma tüng ang kramra khai.17Aiiu iawng mih ngakra dow uang pumta ang nawr khai;aiiu iawng mih ngakra mumta lumowr klum chepaw rarimma ang nauowi kown nadowi,” pakhai.
The Seed Company