Jawb24
1Nami kung kowi Jawb plan tek pe Elifaz mih,“Lowra nowngia chang mih Thurai tawngplawng kowchow maru ngakuüa kowi chet tara kown mih akhin khowmah dowi?Aia kowi kowh tuk miuüa tawngplawng kowchow nami akhin khi dowi?2Maru ngakuüa dow nakhün krawng bawn kownkow süng rihi mat müa sütta khai,amatni dow maru kowh ruapur hawmh ün kula hanow akeng kowi cham thingah khai.3Amatni dow saratchowuüa kowh kawrngaramchük ün pawta pe reng chekhai,now amatni dow lowi rakowi apawng iawng mamaimowuüa kowh chiala paw pe reng chekhai.4Amatni dow ngarai miuüa kowi tiama hownia prütta reng chekhai,amatni rakowi pren kowi kowh ngaraima miuüa dow kram kowh cham tapet reng chekhai.5Ngarai miuüa dow süngrüp süngkangma kowi kowh krawi cham chak mih kaurawng kawrngaramchük iawng chekhai,amatni dow süngrüp süngkangma kowi khowm amatni kowh chauüa vüi krawi kram chakkham reng chekhai.6Amatni dow nachaah kownkow maru kowh dowm kowi ün krawi kua luprak takla reng chekhai,now amatni vüi dow maru ngakuüa kowh grep krum kowi kowh dowh mih grep uih krawi lüm büah reng chekhai.7Chungrau khin ün amatni dow tengiow tengklaima uar prowt uowi büah khai.Tawngplawng kowchow panow amatni kowh dow tawnguat uowi dowi chekhai.8Hungma mawngma kowi uangchak uang khe amatni dow sik reng chekhai,now tatung tanimra uowi dowi rakowi singku huamang re-e cham tatung büah reng chekhai.9“Maru ngakuüa dow saratchow ngeuüa kowi a-u downg lak hownia rupta pe reng,now amatni tut-e kowh pawah mih lowi rakowi ngaraima miuüa kowh chauüa kowi dow pawngta pe reng chekhai.10“Ngarai miuüa kowh dow tawng iawng mih tawnguat paw uowi dowi chekhai;amatni dow tengiow tengklaima cham mang panglang reng.Amatni dow sakkraima hown maru kowh luprak cham tawi kua reng,amatni dow tawmpa sakkrai hown maru kowh cha cheng cham tawi kawt reng chekhai.11Ngaraima miuüa dow cham tawi küa kanrawn sau chepaw ka kham dowi chekhai,now amatni dow cham tawi küa grep tui chepaw tui sakkrai hown uowi reng chekhai.12Marow kowi dow kowng miuüa vüi maru kar mih klow taah reng chekhai;ka ngarau miuüa dow naka khowng kownkow hek reng chekhai.Tawkche Thurai dow amatni kowh kar klow kowi pe ching dowi chekhai.13“Maru ngakuüa dow anowi kowi sui reng chekhai;amatni dow anowi lawnguan kowi tuk dowi chekhai,now nami tiama kowi paw mang kown nau büah dowi chekhai.14Sai sak mih maru dow murpa awr rü reng,aia dow ngaraima miuüa hai ngarema miuüa kowi krawi sai reng,now iak-e khe dow kuk mih iawng aia krawi ku reng chekhai.15Chang iang miuüa dow chawng sat kup reng chekhai;amatni dow mumta lumowr hanow miapaw tuk mat ang dowi bowt pahai ka tuak reng chekhai.16Maru ngakuüa dow uariiu khowk now maru kim kowi cham krawi ku reng.Tawkche ni-e khe dow naukhi anowi dowi rakowi cham tapet büah reng chekhai.17Aiiu dow amatni tut-e ni nowi iawng chekhai,amatni dow kramra uowima mih aiiu kowi changla auiua khai.18“Maru ngakuüa dow tui lawt khe kowh tui hawr len mih iawng chekhai,amatni kowh uowi mih maten kowi dow Thurai kowh piati uowi chekhai.Naiawng rakowi amatni dow grep krum kowi amiapaw kowkowi dowi chekhai.19Aden hai sat kang hown dow nangkhe nowng ter reng,nami iawng dow kowngra paw maru ngakuüa kowi nowng mata reng chekhai.20Naiawng mih maru kowi dow a-u khowm tamata reng,amatni kowh kow dow dung hawmh chaah reng chekhai.Chang lup ngak miuüa kowi dow amiapaw sak kowi towah dowi chekhai,amatni dow singh taklowk mih iawng piak reng chekhai.21“Amatni dow ka chah dowi mih masiuüa kowi changah nowng reng chekhai,now mamaimowuüa kowi paw saksing sanaah büah dowi chekhai.22Nachenganchepaw Thurai dow aia kowh kür hown akürma mih maru ngakuüa kowi piakah reng,amatni dow akürma chepaw amatni kowh chownglawng mih anikma uowi dowi chekhai.23Maru ngakuüa kowi dow athaulangma aia pe uowiah chepaw naia kown.Tawkche tawng chow amatni chang mih dow aia tang müah reng chekhai.24Maru ngakuüa dow nawngchow mih akhin kowi phaw reng.Tawkche amatni dow akeng mih maru maten iawng kowng reng chekhai.Amatni dow pram keu iawng keu reng,now chapüi iawng keu reng chekhai.25Ang tawi mih mia chow nowng tüng ang kown mih uowi bow?Ang tekah mih laiklow aching nadowi pahai amia chow nowng tek kown?” pakhai.
The Seed Company