Jawb22
1Nakhowk khe Teman chenchap Elifaz plan tek pe Jawb mih,2“Lusa maru dow Thurai marat müa tawngpaw nowng chang dowi;chanlaima mih maru khowm padow Thurai marat müa nowng chang dowi chekhai.3Achinawmma en uowi e dow lang kri lang kraing mih Thurai napiaw kown bow?En kowh aprek uowi dowi e dow aia kowh maratra nauowi kown chekhai bow?4Thurai nang en mih aia kowi en ringkawah mih rakowi pabow?Tara chetra kowi aia pawla en mih naiawng rakowi chekhai bow?5Naiawng rakowi nadowi, naiawng aia chang en mih dow en kowh angak rakowi chekhai.Nami dow en kowh angak hu lai bowt rakowi chekhai.6Aiawnglowma en tainau-uüa kowi en tut-e en pe pawngah uanh reng chekhai,now amatni kowi dow tengiow tengklaima en towah reng chekhai.7Kawm miuüa kowi en pe khamah tui dowi chekhai,now sakkrai miuüa kowi paw en pe chaah chakkham dowi chekhai.8Akürma miuüa kowh krowngchow taih krawng bawn uowi padow en ka tuak khai;ringkawra uowima mih maru-uüa ngetchow taih nakowi uowi padow en tatuak khai.9Rut khawma hown mamaimowuüa kowi en lawtah reng,now siring saratchowuüa kowh kakbak mih en rupta pe reng chekhai.10Naiawng rakowi en tavir lut leng chak ia kangowh chekhai;linlanma sang phih uang ting hanow uang tüng en kramra khai.11En tavir lut mün khowt chow iiu khai mih en khi dowi mowr chekhai,now tuikling mangma limla en prang chekhai.12“Mukuang alowngma mih rah kowi Thurai uowi nadowi bow?Krek ün mün khowt chow lowng mih sam mü madiah.13Nachenganchepaw en tek mih, ‘Tawng chow Thurai tuk?Khowt iiu mih uangnim khung hownia tawng iawng chow Thurai nachet a-i tara kown?14Uangnim atatma mih aia kowi tungta khai.Naiawng rakowi aia dow tawngpaw khi dowi chekhai;mukuang luk kowi aia dow krawi len panglang taih,’ pakhai.15“Maru ngakuüa dow tiama ngak kowi mang reng chekhai;en paw nami tiama prim kowi natawi mang reng kown bow?16Amatni dow akhin nadowi tak khe piak khai;amatni kowi dow asaima pat tuikling mangma tui saula khai.17Amatni kowh kim dow uanh iung atekma Thurai tow pe chowdiah.Tawkche amatni tek pe Thurai mih, ‘En cham lang powt prang,lang kri lang kraing mih tawng chow nowng chang anging kown?’ pakhai.Naiawng rakowi ang dow maru ngakuüa hownia alakma ang uowi reng.19Maru ngakuüa piak mih khi hanow maru iunguüa dow awmrawm reng;amatni kowi dow angak uowi dowi miuüa maiawng prawng renah reng:20‘Anging kowh ransu-uüa piak khai nowm bowt;amatni kowh dawngthawnguan dow maih kamta pe bowk khowk,’ pakhai.21“Jawb, en mih Thurai kowh laiklow chün now na taih bowt;aia kowi mih hangkow tuakla ransu tham bowt.Nahanow en naka iungra kown towbowt.22Aia nawr hownia kowh prengia iung laiklow chün diah,now aia kowh laiklow mih en sak lak kowi towah diah.23En che lang kri lang kraing mih tut-e plan khai hanowalai kowh iawng aia mih naplan tow en iawk kown taih.En kowh tangbung hownia che angak sia en kuakta hanowen kowh kuh klu ün dinchow kowi en kuakta khai hanowOfir hownia kowh anang uowima mih kuh aw kowi en kuakta hanowlang kri lang kraing mih Thurai mih en kowh kuh nachowng kown,now aia mih en vüi lang iung nowm nowm mih tai nachowng kown.26Nakhowk khe dow lang kri lang kraing mih hown en napiaw bowt kown,now Thurai kowi atungma en naowm bowt kown.27Aia tut-e en awr lü awr leng hanow aia mih nasünta en bowt kown,now aia vüi en takhamta mih maten en nachang pe bowt kown.28Sakdawng kowi kowh en tuakta mih maten en naia chang bowt kown,now en kowh tiama luk kowi mih anowi nasawt bowt kown.29Maru che akrat pusa kowi uowi hanow en natek kown mih,‘Amatni kowi khowngah diah,’ napa kown.Nahanow Thurai mih amatni kowi nalawngah kown.30Thurai dow aprek uowi dowi mih maru-uüa kowi lawngah reng;naiawng rakowi en che anama mih lup chang hanow aia mih nalawng en kown,” pape khai.
The Seed Company