Jawb21
1Nakhowk khe Zofar kowi Jawb klangah mih,2“Enni mih sak hown ang kowh laiklow sünta büa diah;enni pe ang sakklamra mih ang vüi nami chowtaih naown kown.3Ang tek lai mih khin khe kham büah nawngchow diah;ang ki tek lai kung kowi enni naia changla ang rensi küakau iawk kown taih.4Ang taüa mih dow Thurai hown taih; maru hown nadowi.Aia hown ang nataüala kown mih auan iungma uowi chekhai.5Ang prakowi tang mü hanow enni paw awda khai;naiawng rakowi enni kowh nawr khowm padow enni pumta prang.6Naiawngün laiklow tuakah hanow lainowmma ang kram khai;ang kram lai bowt kowh ang kowh kow khowm chür prang towbowt.7“Maru ngakuüa dow tawngplawng kowchow lawngtang pat sing khai?Tawngplawng kowchow amatni dow uang kür ngamlam khai?8Amatni dow amatni kowh chauüa awr iuksown mih khila khai,now amatni kowh chu cheuüa kowi paw khila büah khai.9Amatni kowh kim dow kramra uowi dowi hai thaulangma chekhai;amatni luk kowi dow katpaw Thurai ripra uang ting dowi.10Amatni kowh dow chiala krawi paw hau chepaw iawm dowi,now amatni kowh chiama hawmh paw pawm now katpaw iut dowi chekhai.11Amatni dow chauüa kowi ruapur hawmh iawng prang kowi cham chinah reng,amatni kowh chauüa dow ruapur chah hawmh iawng plaila dowk se cham len reng chekhai.12Amatni dow sawkchow hai taraw tepla se tek meng reng,now ta prui tün büah hanow piaw büah pabüah reng chekhai.13Amatni dow lowra lup chang kowi chawn reng,now thaulangma hown kowng büah reng chekhai.14“Nachenganchepaw Thurai kowi tek pe büah mih,‘Anging hownia alakma kowi cham powt prang;en tiama lawnguan kowi tuk kown anging nau dowi.15Nami lang kri lang kraing mih mia chekhai chow?Tawngplawng kowchow aia kowh lai anging nachün kown?Aia kowi chup hanow tawng chow anging kowh mrawkra uowi?’ pakhai.16Amatni dow amatni kowh lup chawn mih amatni kowh kür hown taih pahai tatuak reng;naiawng rakowi maru ngakuüa kowh prengia pek dow mapaw ang nauta dowi chekhai.17“Nowm pakhe dow maibu mit iawng maru ngakuüa mit kakat mih uowi bow?Amatni luk kowi phih uang ting kakat mih uowi bow?Amatni luk kowi Thurai kunmarau kowh ripah kakat mih uowi bow?18Li hown chahau cham rown mih iawng amatni phaw mih uowi kakat bow?Now liku hown chapli cham rown iawng amatni phaw mih uowi kakat bow?19“‘Chang ngak mih maru kowh ripra achauüa vüi Thurai krüm pe reng,’ padow enni tek reng chekhai.Tawkche aia kowh tara chet natüngsangah kownkow chang ngak mih kowi dow Thurai pacham ripah lah.20Chang ngak mih maru-uüa dow amatni kowh angak sung pacham ka ripra lah;amatni dow lang kri lang kraing mih Thurai kowh kunmaraura pacham kham lah.21Tawngplawng kowchow panow amatni dow chowng chur now nakowng kown towbowt;kowng kung kowi dow amatni ta towla mih kimchak vüi tuak büah dowi bowt chekhai.22Thurai kowi nowng tüng nowng sang mih maru uowi ne bow?Thurai dow kramamu-uüa kowi khowm chet pe tara reng chekhai.23“Tawngbak mih maru dow kowng pat buk iung kow iungma uowi mih uowi,now amatni dow awmrawmma hai athaulangma uowi khe kowng reng chekhai.25Now tawngbak mih dow kowng pat katpaw tawi krumla aiung sia dowi mih uowi;amatni kowh chownglawng dow angak kangowh hown chur reng chekhai.26Nachenganchepaw amatni kowng khe dow katsang taih chekhai;amatni kowi dow dupta hanow dung cha pe nga bowk chekhai.27“Tawng chow enni tuak mih aiungma ang tuk;nakingküa ang kown enni tuak mih maten ang tuk.28Enni tek mih, ‘Kawmat dow maru iuk kowh kim tawng kowi chow?Nami maru ngak kowh tangbung tawng kowi chow cham kowi khai?’ pakhai.29“Chownglawng kowi achap kawm uanla miuüa kowi enni lüntaah kakat tak bow?Amatni dow natek kown mih, ‘Maru ngakuüa dow Thurai kunmaraura hownia plai reng,now phih hownia paw plai büah reng chekhai.31Maru ngakuüa kowi dow miapaw tüng pe atawi ama dowi;amatni kowi dow amatni kowh lup sung peah mih miapaw uowi dowi.32Amatni kowi dow cham dupah khe maru kawmuüa uang kawtla reng;amatni kung pra hai pur prakowi maru kawmuüa tawi mang iualua reng.Amatni kowi dow thia pe bawn khe khowm maru tüng pe ringkawra reng,now amatni kowh tadupra kuam kowi paw tow pe kangchawng mih reng chekhai,’ napa kown.34Naiawng rakowi enni kowh asung uowi dowi mih laiklow hown tawng iawng chow ang naka sakklamra kown?Enni kowh laiklow dow daila klen kowi tawngpaw nadowi chekhai,” pakhai.
The Seed Company