Jawb20
1Nakhowk khe Naman chenchap Zofar plan tek pe Jawb mih,2“En kowh laiklow kowi ang naklang en ngengche kown takla.Tawngplawng kowchow panow en kowh laiklow mih lainowmma pusa ang khai.3Mapaw nü ang klowk ang dowi mih nang klow ang ta khai.Naiawng rakowi naklang en ngengche kown mih lainowmma ang nau.4“Thurai kowi ringkaw dowi miuüa kowh awmrawmra dow nawngchow chekhai;nami dow achük alai hownia en tuk ngengche khowk chekhai.Lusa kowi thawpta maru kung hownia bowt now maru ngakuüa dow lainowmma piaw khai,nami piawpara dow kra dowi pami en tuk ngengche khowk chekhai.6Maru ngakuüa dow iuksownra mukuang kowi lu tawk prang chepawamatni dow amatni kowh kih iawng achowngma vüi nahing piak kown.Amatni kowi khi miuüa dow, ‘Tawng kowi chow cham powt khai?’ pahai natek kown.8Amatni dow uarmang kowi kowh iawng naown kown;amatni kowi dow tawng kowi paw nakhi-ah kown nadowi bowt.Amatni dow mukmang kowi kowh iawng natama kown.9Amatni kowi khi reng miuüa amatni kowi nakhi kown nadowi bowt;amatni kowh kimchakuüa paw amatni kowi nakhi-ah kown nadowi bowt.10Amatni kowh chauüa dow ngarai miuüa hownia nakrawi lü luh kown;tawngplawng kowchow panow ngarai miuüa hownia krawi kuah mih uanh dow amatni nakrawi ta plan sat ngengche kown.11Amatni dow klanguüa kür uowi thüm chepawamatni kowh hut mih nalüa tadup kown.12“Angak chap dow amatni tut-e adingma chekhai,now nami dow amatni dai krüa kowi petah büah reng chekhai.13Amatni dow lup ngak mih kuakta kown mapaw nau dowi.Naiawng rakowi nami dow nawr kowi towah büah reng chekhai.14Nachenganchepaw nami dow amatni mu lak kowi asurma kowphaw reng,now amatni mu lak kowi mih rua kru iawng phaw reng chekhai.15Amatni iawnta mih dawngthawnguan maten dow nahükta büah kown;nami dow amatni mu lak hownia Thurai mih nauaita pe plawt kown.16Amatni kowh dow amatni iawnah mih maten rua kru iawng naown kown,now amatni dow rua chawtah mih maru kowng iawng nakowng kown.17Amatni kowh dow aw kowi kowh tui iawng kuai tui uowi chepaw naia,now awchawng kowi kowh tui iawng iawn tui uowi chepaw naia.Nachenganchepaw amatni dow naiawngün mih naka chala kown nadowi.18Amatni dow amatni kowh kawm rak maten nata towla hüah kown;dawngthawnguan hown napiawla kown mih khin amatni dow naka kown nadowi.19Tawngplawng kowchow panow amatni dow ngarai miuüa kowi changah nowng khai,now ngarai miuüa kim mih krawi khün büah reng chekhai.20Amatni kowh lawphara dow katpaw adu uowi dowi chekhai.Naiawng rakowi tawng chap paw nanowng lawng büah kown nadowi.21Amatni dow khowk bowk dowi mowr chi cha chakkham reng chekhai.Naiawng rakowi amatni kowh iungra khin dow anikma nauowi kown nadowi.22“Amatni kowh dow dawngthawnguan ahuma uowi chepaw naia kown.Tawkchedow akrat pusara mih alenma amatni luk kowi nauang ting kown.23Amatni kowi dow amatni kowh mu natek kown chowbowt khe Thurai mih naripah kown;amatni luk kowi dow lün pluplup mih kunmaraura uangchak iawng Thurai naiu hüng pe kown.24Lawngha hown kowh rutchün khawkleng hownia amatni powt chepawamatni kowi dow kri leba hown kowh leba sek nakrawi chukta plut kown.25Nami leba sek tawk pluplup mih dow amatni kowh müt kowi naplawnta pluk kown,now nami leba sek dow amatni buk hownia amatni rut hown nahowkah büah kown.Amatni luk kowi dow achaing achaing mih kramra nauang ting kown.26Amatni kowh uowi mih chap maten dow Thurai nauang piakta pe bowk kown;amatni kowi dow Thurai uang chin pe maih hanow nakamta bowk kown,now amatni tangbung kowi kowh akeng miuüa kowi paw nakamla bowk kown.27Mukuang mih amatni kowh angak dow naphuangta pe kown,now lusa dow amatni kowi kingküala mih saksi nathuak kown.28Tuikling mangma dow amatni kim kowi kowh uowi mih maten nanawmla pe kown;nami kim dow Thurai kunmarau mih ni khe asaima nasaula pe kown.29Maru ngakuüa vüi dow naiawng mih piakra Thurai kamrüt pe khai;naiawng mih piakra dow amatni kakbak Thurai khowm pe mih chekhai,” pakhai.
The Seed Company