Jawb18
1Nakhowk khe Jawb kowi Suhite prenchak Bildad klangah mih,2“Jawb, tawng khe chow en kowh lai nachur kown?Tuakah kaneu diah, now pe tek anging lai diah.3Tawngplawng kowchow asadua iawng en nüla anging khai?Tawngplawng kowchow bualama en tuk ka tuak anging khai?4En matia kunmarau hown en tatowk kawm mih chekhai;en tüng kunmarau khai pache lusa natama kown chekhai pe bow?En kunmarau khai pache aia uowi rah hownia huaklu nasüt kown pe bow?5“Maru ngak dow maibu mit mih iawng naown kown,aia dow katpaw lün dowi mih maibu iawng naown kown.6Aia kowh tangbung dow aiiuma nauowi kown;aia kowh maibu dow nanowi kown nadowi bowt.7Aia kowh dow kamrütra akhawtma chepaw napiak kown;aia kowh kamrütra dow aia piak müa nachowng kown.8Aia kowi dow leng chak ia prakowi aia kowh khawk napawla kown,now aia kowh khawk dow leng chak ia kowi nakow chawp kown.9Aia kowh klingnik dow leng hown natasük kown,now leng mih aia kowi dow nasükta chen kown.10Aia vüi dow bawn hown taphum hüah mih leng chak ia uowi chekhai;aia kowh tiama kowi dow leng chak ia uowi hüah chekhai.11Aia kowi dow kramra kangowh umta lut khai;nami dow aia cham kowi rah maten kowi tawi krawiah khai.12Aia kowi dow phih mih hawt chawngah hüah chekhai;nami dow aia tim hown krowksang napiakah kownkow kamrütma chekhai.13Rawka mih aia kowh buk kowi nakrawi tasak bowk kown;aia kowh pabuk pakowma dow nasu hanow nater bowk kown.14“Aia kowi dow thaulangma uowila mih tangbung hownia nacham pawla kown,now kramra uowima mih makowng mang tut-e aia kowi nacham pawla kown.15Maru ngakuüa kowh kim ün dow nakam kown;amatni kowh kimluk kowi dow uangchak iawng napawksi maih nauang kla kown.16Aia dow adak kowi kowh aprün keu bowk mih singh iawng naown kown,now aluk kowi kowh amia prek kowng bowk mih singh iawng aia naown kown.17Aia kowi dow lusa maru-uüa miapaw naka tuakah kown nadowi bowt;aia kowh ming dow miapaw nata ka tuak kown nadowi bowt.18Aia kowi dow makownguüa uowi rah kowi nacham saah kown;aia kowi dow anowima mih pren hownia aiiuma mih pren kowi nacham towah kown.19Aia kowh dow chuprek chaprekuüa nata uowi kown nadowi;aia kowh dow nata powng dawngthawnguan kown mih nauowi kown nadowi.20Naiawng aia piak mih satang dow satlawt hai satkup pren maru pat nata kown;nami tata hanow amatni dow lainowmma natakrow hai nakram kown.21Maru ngakuüa kowh uowi rah dow naiawng naphaw ngengche kown;tuk Thurai dowi mih maru kowh piakra dow naiawng naown ngengche kown,” pakhai.
The Seed Company