Jeremia43
1CHAKRAMANG uang pe tekah mih laiklow maten dow Jeremia mih maru kawmuüa tut-e krawi tek khai.2Nakhowk khe Hosaia kowh chapa Azaria, Karea kowh chapa Johanan hai akeng mih bawrima mih maru-uüa tek pe Jeremia mih, “En dai. Aigupta pren kowi kowkowi hanow nakowuowi dowi kown mih laiklow nauang tek anging kownkow CHAKRAMANG anging kowh Thurai uang chin en dowi.3Naiawng nauang tek anging kown mih Neria kowh chapa Baruk tek en kowh chekhai. Tawngplawng kowchow panow Babulawnuüa rut kowi naapta anging hanow natow anging nar kown nau kowh chekhai, nadowi now nakowngta anging kown aia nau kowh chekhai,” pakhai.4Naiawng hown Johanan, siphai aluchowuüa hai maru maten Juda pren kowi nauowi phülü kown mih lawnguan kowi CHAKRAMANG kowh ana pek üata khai.5Johanan hai siphaiuüa maten mih akeng pren kowi cham taset tauet mih Judauüa hai akeng pren hownia Juda pren kowi uang plan mih Judauüa maten kowi pawla hanow Aigupta pren kowi kowkowi khai.6Amatni dow Gedalia rut kowi mang kowh kangchawng mih aluchow Nebuzardan apla mih masiuüa, kachakuüa, ngeuüa hai mang chamauüa chekhai. Amatni hown risi Jeremia hai Baruk kowi paw Aigupta pren kowi pawla büah khai.7Naiawng hai amatni dow CHAKRAMANG kowh laiklow üata büah khai. Amatni dow Aigupta pren kowi kowkup hanow Tapanhes marow mowr kowkowi khai.8Tapanhes marow kowi uowi khe Jeremia kowi CHAKRAMANG tek pe mih,9“Judauüa pur kowi aiuk aiukma mih huaklu cham paw sangrum diah, now Tapanhes marow kowi kowh mang kim re-e be pe ipbawn mih viadawng kowi naiawngün huaklu mih kowdupah diah.10Nami kung kowi dow Judauüa kowi maiawng tek pe diah: Mukuang siphaiuüa kowh CHAKRAMANG Thurai tek mih, ‘Babulawn pren mang ang kowh nar Nebuknezar kowi ang nauang hawla kown, now mami re-e kowh ang petah mih huaklu luk kowi aia kowh mang chowm rah ang natow pe kown. Aia dow nami luk kowi nakhup pe mang tangbung kown.11Aia dow uangah now Aigupta pren kowi nauang piakah kown. Nami khin khe nakowng kownkow khowm bowkta khowk miuüa dow nakowng kown, nakhümla kownkow khowm bowkta khowk miuüa kowi dow nakhümla kown, now saidawng hown nakowng kownkow khowm bowkta khowk miuüa dow tasenra kowi saidawng hown nakowng kown.12Aia dow Aigupta pren kowi kowh arup aren chupra kim ün natowkta pe kown, now arup aren ün napawla pe kown. Aia dow Aigupta pren mih akhaw aklaima nachangah kown, now aiamat dow ruapur thing mih maru sükla kelang now mang mih iawng nami hownia thaulangma namang kown.13Aia dow Aigupta pren kowi kowh sat nammow chupiiara chüng napiakta kown, now Aigupta kowi kowh arup arenuüa chupiiara kim ün natowkta kown,’ pape diah,” pakhai.
The Seed Company