Jeremia44
1Aigupta pren kowi kowh Migdawl, Tapanhes, Memfis hai tawngphak pra kowh süng kowi uowi mih Judauüa maten lawnguan kowi CHAKRAMANG kowh laiklow Jeremia tut-e uang ting khai.2CHAKRAMANG tek pe mih, “Ang mukuang siphaiuüa kowh CHAKRAMANG Israeluüa kowh Thurai tek khowk, Jerusalem hai Juda pren kowi kowh kua hai marow maten luk kowi phih akraingma ang uang pawla mih enni khi khowk chekhai. Naiawngün kua hai marow dow kawmat paw apiaknama uowi reng tak chekhai. Tawkche nakowi dow miapaw uowiah dowi bowt chekhai.3Naiawng phaw mih dow amatni kowh angak rakowi chekhai. Tawngplawng kowchow panow amatni mih arup arenuüa pur kowi cham towk maikhük hai cham chupiia mih hownia lainowmma towk ang kunmarau khai. Naiawngün arup aren lawnguan kowi amatni paw tuk dowi chekhai, enni paw tuk dowi chekhai, now enni kowh pipu-uüa paw tuk dowi chekhai.4Ang kowh nar risiuüa kowi amatni tut-e plan plan ang uang chin pe khowk chowdiah. Ang suiah mih suiiai kaniaima mih lup nachang dowi kownkow amatni kowi ang kowh risiuüa tek pe khowk chowdiah.5Nachenganchepaw amatni dow nami laiklow chün dowi chekhai, now sünta paw sünta dowi chekhai. Amatni dow amatni kowh angak hownia uang plan dowi, now arup aren pur kowi towk maikhük mih paw taingta büah dowi chekhai.6Naiawng rakowi amatni luk kowi ang kowh kunmaraura lün pluplup mih ang uang khük pe khai. Nami dow Judauüa kowh marow hai Jerusalem marow kowi kowh tiama towng lünla plup khai. Naiawng rakowi naiawngün marow dow ani mowr akhaw aklaima hai apiaknama uowi reng tak.7“Kawmat ang mukuang siphaiuüa kowh CHAKRAMANG Israeluüa kowh Thurai tek khowk, tawngplawng kowchow naiawng khowt kowmatia kowi enni tuk piakah khai? Enni dow masiuüa, kachakuüa hai ngeuüa maten kowi Juda pren hownia uang lawtla hanow enni matia hai amatni kowi paw enni piakla khai.8Enni uang uowiah mih Aigupta pren kowi kowh arup arenuüa pur kowi enni towk maikhük hanow tawngplawng kowchow enni tuk towk ang kunmarau khai? Enni dow enni matia kowi natapiak kown, now lusa kowi kowh chenchap maten nasui enni hai enni kowh ming hown nacham tape piati kown.9Juda pren hai Jerusalem marow kowi kowh tiama towng enni pipu-uüa, Juda manguüa hai mang masi hawmuüa, enni hai enni kowh masi hawmuüa chang ngak mih enni tamata khai bow?10Ani pat paw enni changta angak rakowi enni sak kowi rau dowi tak chekhai, now ang kowi paw ringkawma hown kram dowi tak chekhai. Enni hai enni pipu-uüa tut-e kowh ang pe enni mih rirow hai ari aiang miapaw enni chün dowi.11Naiawng rakowi ang mukuang siphaiuüa kowh CHAKRAMANG Israeluüa kowh Thurai mih nauang pawla enni phih hanow enni bowkbowk kowi napiakta enni kownkow kamrütta khowk.12Juda pren kowi ta uowi hanow akung kowi Aigupta pren kowi nauang uowi kown tatuak mih maten kowi dow Aigupta pren kowi ang napiakta kown. Amatni dow tasenra kowi nadowi now khown hown nakowng bowk kown. Amatni dow nachowng maru prawng renra hai rensi küakau kown. Amatni kowi khita now maru mih naawda kown, now amatni ming hown maru natape piati kown.13Jerusalem kowi ang ripah mih iawng Aigupta pren kowi kowh uowi mih Judauüa kowi paw tasenra, khown hai makowng hawi hown ang naripah kown.14Aigupta pren kowi kowuowi mih Judauüa pungmadawng kowi ta sing uowi miuüa dow Juda pren kowi kowplan kown nau chepaw miapaw naia plan kown nadowi. Amatni pungmadawng hownia pre sum iachow klen kowi miapaw kownowng powt kown nadowi,” pakhai.15Nakhowk khe Aigupta pren kowi kowh amatni uowi rah maten hownia masiuüa hawmh maten hai arup aren pur kowi cham towk maikhük mih masiuüa hawm kowh huauüa maten Jeremia tut-e uang khai.16Now amatni dow Jeremia kowi uang tek pe mih, “CHAKRAMANG ming hown anging tut-e kowh en uang tekah mih laiklow maten anging nasünta kown nadowi.17Anging tekta mih iawng anging nachang ngengche kown. Anging kowh pipu-uüa, manguüa hai mang kowh maru iukuüa Mukuang Mangma vüi towk maikhük mih hai hüngah mih uanap chang mih iawng anging nachang kown. Nami khin khe dow anging kowh chakkham ahuma chowdiah, now akrat pusara paw uowi dowi hai aiungma anging uowi chowdiah.18Nachenganchepaw Mukuang Mangma vüi maikhük towk hai hüngah mih uanap chang anging taingta hownia akhawr hown anging uowi khai, now tasen hai khown hown anging piak rürü khai,” pakhai.19Masiuüa hawmh plan tek mih, “Mukuang Mangma vüi anging towk maikhük khe, hüngah mih uanap anging chang khe hai aia rup uowi mih kawm anging thawp khe anging kowh huauüa tuk dowi pabow?” pakhai.20Nakhowk khe aia kowi kowh klangah mih kachakuüa hai masiuüa maten kowi Jeremia tek pe mih,21“Juda pren kowi kowh marow tiama kowi hai Jerusalem marow tiama kowi akeng thurai kowi enni chupiia mih dow CHAKRAMANG sak kowi uowi reng chekhai. Now enni pipu-uüa, enni kowh manguüa, mang kowh maru iukuüa hai pren kowi kowh akeng maru-uüa nam iungma mih maikhük towk mih paw sak kowi CHAKRAMANG towah reng chekhai.22Enni kowh lup ngak hai suiiai kaniaima mih lup CHAKRAMANG nowng kham dowi bowt rakowi enni kowh pren mih akhaw aklaima, apiaknama hai suiiai kaniaima phaw khai. Now nami pren kowi kowh maru-uüa ming dow cham tapela piati kownkow maru tawngah khai. Kawmat mowr pat naiawng uowi reng tak chekhai.23Enni dow nam iungma mih maikhük towk khai, now CHAKRAMANG kowi kingküala mih angak enni chang khai. Aia kowh laiklow, aia kowh ari aiang, aia kowh rirow hai aia kowh ana pek dow enni chün dowi. Enni luk kowi phih uang ting mih dow naiawng rakowi chekhai. Nami dow enni khi khowk,” pakhai.24Nami kung kowi masiuüa hai kachakuüa maten kowi Jeremia tek pe mih, “Aigupta pren kowi kowh uowi mih enni Judauüa maten CHAKRAMANG kowh laiklow sünta büa diah.25Mukuang siphaiuüa kowh CHAKRAMANG Israeluüa kowh Thurai tek mih, ‘Enni hai enni kowh masi hawmuüa tek mih, “Anging takhamta mih anging piakta kown nadowi. Mukuang Mangma vüi nam iungma mih maikhük natowk kownkow hai hüngah mih uanap nachang kownkow anging takham mih iawng anging nachang ngengche kown,” pakhai. Nami laikham powm iawng enni tüngah khai. Naiawng rakowi enni takham mih iawng chang büa diah. Enni takhamta mih laiklow sak kowi towah büa diah,’ pakhai.26“Nachenganchepaw Aigupta pren kowi kowh enni Judauüa uowi mih maten CHAKRAMANG kowh laiklow sünta büa diah. CHAKRAMANG tek mih, ‘Ang kowh ming kri kraingma mih hown mami ang takham khowk: Aigupta pren kowi kowh uowi mih Judauüa kowi dow, “Masing CHAKRAMANG ming hown ang takham khowk,” pami ang nape tekah kown nadowk.27Amatni luk kowi ang pela ching mih dow amatni iung müa nadowi, amatni nga müa chowtaih. Aigupta pren kowi kowh uowi mih Judauüa dow tasen hai khown hown asaima napiak kown.28Tasenra hownia plai kowh Aigupta pren hownia Juda pren kowi nauang plan kown mih maru dow maru iun a-echow naown kown. Nami kung kowi dow Aigupta pren kowi kowh uang uowi miuüa maten ang kowh laiklow chünchü na mih amatni kowh laiklow chünchü na mih natuk büah kown.29“‘Mami pren kowi ang narip enni kown, now ang napiakta enni kownkow ang tekta iawng ang nachang kown. Nami amatra dow maiawng:30Aigupta pren mang Faraw Hofra kowi aia kowi lim pe sak reng mih aia kowh ransu rut kowi ang naap-ah kown. Aia kowi dow Juda pren mang Zedekia kowi aia kowh ransu Babulawn pren mang Nebuknezar rut kowi ang ap-ah iawng ang naap-ah kown,’ pakhai,” pape khai.
The Seed Company