Jeremia42
1Nami kung kowi siphai aluchowuüa maten, Karea kowh chapa Johanan, Hosaia kowh chapa Jezania hai maru maten uang hanow Jeremia kowi tek pe mih, “Sakrauma hown anging kowh laiklow sünta diah, now mami ta sing uowi mih maru-uüa vüi kowi CHAKRAMANG en kowh Thurai tut-e awr lü awr leng diah. Auown khe dow anging akawmma chowdiah. Tawkche kawmat dow anging pre sum iachow taih bowt mih en khi khowk chekhai.3CHAKRAMANG en kowh Thurai tut-e awr lü awr leng diah, nahanow aia dow tawng pra chow anging namang kown mih hai tawng chow anging nachang kown mih natek anging kown,” pakhai.4Amatni kowi risi Jeremia klangah mih, “Enni kowh laiklow ang ta khowk. Enni uang lü mih iawng CHAKRAMANG enni kowh Thurai tut-e ang nalü ngengche kown taih. CHAKRAMANG tek mih maten ang natek enni kown taih, enni tut-e tawngpaw ang nait nadaah kown nadowi,” pakhai.5Nami khin khe Jeremia kowi amatni tek pe mih, “CHAKRAMANG en kowh Thurai uang pe tek en iawng anging che chang dowi hanow CHAKRAMANG dow aia tek iawng anging chang dowi pami saksi thuak mih pacham na lah.6Anging kowchin en mih CHAKRAMANG anging kowh Thurai laiklow anging nachün kown. Nami laiklow anging tut-e iung chepaw iung dowi chepaw anging nachün kown. CHAKRAMANG anging kowh Thurai kowh laiklow che anging chün hanow anging naiung kown,” pakhai.7Hamüt ni kung kowi CHAKRAMANG kowh laiklow dow Jeremia tut-e uang ting khai.8Nakhowk khe aia dow Johanan, aia hown kowh uang tawi mih siphai aluchowuüa hai maru kawmuüa kowi kuaah lawmah khai.9Amatni kowi aia tek pe mih, “Enni tek ang iawng nakowtek kownkow CHAKRAMANG Israeluüa kowh Thurai tut-e enni kowchin ang khai. Nami CHAKRAMANG Israeluüa kowh Thurai tek mih,10‘Mami pren kowi che enni uowi khai hanow ang nape iuksown enni kown, ang napiak enni kown nadowi. Singh chowk iawng ang nachowk enni kown, ang nachawita enni kown nadowi. Tawngplawng kowchow panow enni luk kowi ang uang pawla phih rakowi ang sak kowi rau khai.11Enni kramah mih Babulawn pren mang kowi dow hangkow kram büa diah. Tawngplawng kowchow panow ang dow enni tut-e tawi uowi reng chekhai. Ang dow natakhula enni kown, now amatni rut hownia ang nalawng enni kown.12Ang nasaksing sana enni kown, now Babulawn pren mang kowi paw nasaksing sana enni kownkow ang napeah saktuak kown. Now aia mih mami enni matia pren kowi nape uowi enni kown,’ pakhai.13“Tawkche CHAKRAMANG enni kowh Thurai laiklow chün dowi kowi, ‘Anging matia pren kowi uowi kown anging nau dowi;14Aigupta pren kowi taih anging kowuowi kown. Nakowi dow tasen paw anging nakhi kown nadowi bowt, baw tün paw anging nata kown nadowi bowt, now chakkham khawr rakowi sakkrai hown paw anging nauowi kown nadowi bowt,’ pahai enni tek chepaw naia kown.15Naiawng che enni tek khai hanow ta sing uowi mih Judauüa CHAKRAMANG laiklow sünta diah. Mukuang siphaiuüa kowh CHAKRAMANG Israeluüa kowh Thurai tek mih, ‘Enni che Aigupta pren kowi nauowi kown mih khowmta bowkta kowh kowuowi khai hanow,16enni kramah mih tasenra kowi enni nakla kown, enni kramah mih khown paw Aigupta pren kowi pat nauang tawi krawi enni kown, now nakowi mih enni nakowng kown.17Aigupta pren kowi kowuowi kownkow khowm bowkta khowk miuüa dow nakowi kowuowi mih khin khe tasenra, khown hai makowng hawi hown nakowng kown. Ang nauang pawla kown mih phih hownia lowk iachow paw naia plai kown nadowi,’ pape khai.18“Mukuang siphaiuüa kowh CHAKRAMANG Israeluüa kowh Thurai tek mih, ‘Jerusalem marow kowi kowh uowi miuüa luk kowi ang sak-ihra uowi dowi mih hai kunmaraura ang uang pe tingah iawng enni che Aigupta pren kowi kowkowi hanow enni luk kowi paw ang kowh kunmaraura nauang ting kown. Nakhowk khe enni kowi dow maru naprawng naren hai nasui enni kown. Naiawng enni phaw mih khi hanow maru dow natakrow kown, now enni ming hown maru mih nacham tape piati kown. Enni kowh pren mih katpaw enni naplan khi kown nadowi bowt,’ pakhai.19Aw ta sing uowi mih Judauüa, CHAKRAMANG tek enni mih, ‘Aigupta pren kowi hangkow kowi büah,’ pakhai. Nauowi kaneu kownkow ani kowh ang tek enni mih laiklow sak kowi towah büa diah.20Enni dow kramra uowima mih lup ngak enni chang mih chowbowt. CHAKRAMANG enni kowh Thurai tut-e nakowtek lai kownkow enni chin ang khai. Enni tek ang mih, ‘Anging vüi kowi CHAKRAMANG anging kowh Thurai tut-e awr lü awr leng anging diah, now aia tek mih srui uang tek anging diah. Nahanow aia tek iawng anging nachang kown taih,’ pakhai.21Ani dow CHAKRAMANG kowh laiklow ang tek enni khowk. Tawkche enni tut-e kowh CHAKRAMANG enni kowh Thurai uang pe tek ang mih laiklow dow kawmat paw enni chün dowi chekhai.22Naiawng rakowi mami laiklow tuakah büa diah: Enni kowuowiah kown nau mih Aigupta pren kowi dow tasenra, khown hai makowng hawi hown enni nakowng kown,” pakhai.
The Seed Company