Jeremia41
1Nathania kowh chapa Ismael dow mang krungchak chekhai, now aia dow mang kowh maru iuk chekhai. (Ismael dow Elisama kowh chu chekhai). Aia dow ranit la khe pawla maru hamüt ia hanow Ahikam chapa Gedalia tut-e Mizpa marow kowi kowkowi khai. Now nakowi amatni taiua cha hawm mih khin khe Eilsama hai aia hown kowh uang tawi mih hamüt ia mih maru dow Babulawn pren mang towah mih kruitown mih Gedalia kowi saidawng hown saita büah khai.3Nami klen kowi Mizpa kowi kowh Gedalia hown tawi uowi mih Judauüa maten hai Babulawn siphaiuüa maten kowi dow Ismael mih saita bowk khai.4Gedalia kowng mih auai ni khe paw aia kowng mih amiapaw tuk dowi tak chekhai. Nakhowk khe Sekem marow, Silo marow hai Samari marow hownia maru uang 80 ia chekhai. Naiawngün maru-uüa dow kawmdi uanap hai nam iungma mih maikhük chang müa uanh uang pawla hanow CHAKRAMANG kim prakowi uang tarü khai. Amatni dow khaita mawmpawi prowng, amatni thekta nak mih tawnguat khupma hai amatni buk kow kowi tata naknak hanow uang tarü khai.6Ismael dow naiawngün maru-uüa hown nauang takrum kownkow kar se kar se Mizpa marow hownia uang khai. Naiawngün maru-uüa hown aia takrum mih khin khe aia tek pe mih, “Chu, Ahikam kowh chapa Gedalia tut-e a-i kowkowi lah,” pakhai.7Marow kowi amatni uang ting hown krowksang Ismael hai aia hown kowh naiawngün uang tawi mih maru-uüa kowi saiah khai, now naiawngün uak dow tuikuam lowk mih kowi kuakah büah khai.8Tawkche amatni pungmadawng hownia hamüt ia mih maru dow Ismael kowi tek pe mih, “Hauang saita anging diah. Tawngplawng kowchow panow püm, iakmow, sau hai kuai tui dow dowm kowi anging petta hüah chekhai,” pakhai. Naiawng rakowi amatni kowi dow Ismael mih lawtta khai. Amatni kowi dow akeng miuüa hown aia saiah dowi chekhai.9Ismael dow Gedalia hai akeng mih maru-uüa uak mih tuikuam kowi kuakah khai. Nami tuikuam dow mang Basa hownia Israel naka lawngra kownkow Juda mang Asa thaiah mih chowdiah. Tawkche Ismael dow nami tuikuam mih uak kangowh atekma changah khai.10Ismael dow Mizpa marow kowi kowh ta uowi miuüa kowi khümla khai. Amatni pungmadawng kowi dow mang kowh chamauüa hai nakowi kowh towla mih akeng maru-uüa chekhai. Mang kowh chawng mih aluchow Nebuzardan dow naiawngün maru-uüa luk kowi kowh kruitown mih Gedalia kowi towah khai. Ismael dow naiawngün maru-uüa kowi khümla now Amawnuüa pren kowi kowpawla khai.11Karea kowh chapa Johanan hai aia kowh siphai hawmh dow Ismael kowh lup ngak satang maten ta khai.12Nami khin khe amatni dow amatni kowh maru-uüa kowi pawla hanow Ismael hown nakowtasen kownkow tarü khai. Amatni dow aia kowi Gibeawn marow kowi kowh kanh aiukma mih re-e kowkrum büah khai.13Mizpa marow hownia kowh Ismael khümla mih maru-uüa dow Johanan hai aia hown siphai aluchowuüa kowi khita hanow awmrawm khai, now amatni dow Johanan tut-e kowkowi khai.15Tawkche Ismael hai aia hown kowh tawi mih raiat ia mih maru dow Johanan hownia ku powt hanow Amawnuüa tut-e kowkowi khai.16Nami kung kowi Johanan hai aia hown kowh siphai aluchowuüa dow Mizpa marow hownia kowh cham takhang miuüa kowi Gibeawn marow hownia uang lawngla khai. Gedalia kowi Ismael saita kung kowi Ismael rut hownia naiawngün siphaiuüa, masiuüa, ngeuüa hawmh hai mang kowh maru iukuüa kowi dow Johanan uang lawngla khai.17Amatni dow Babulawnuüa kowi kram kowh Juda pren hownia powt khai. Tawngplawng kowchow panow Ismael dow Babulawn pren mang towah mih kruitown mih Gedalia kowi saita khai. Naiawng rakowi amatni dow Aigupta pren prakowi powt büah mih khin khe Bethlehem re-e kowh Gerut-Kimham kua kowi uowila pre sum ni khai.
The Seed Company