Jeremia40
1Babulawn pren mang chawng mih aluchow Nebuzardan dow Jerusalem maru-uüa hai Judauüa kowi Babulawn pren kowi pawla khai. Nami khin khe khümla miuüa pungmadawng kowi aia mih Jeremia kowi paw khi khai. Tawkche Jeremia kowi dow aia mih Rama marow hownia now tiama kowi lawtta khai. Nami khin khe aia tut-e dow CHAKRAMANG kowh laiklow uang ting khai.2Jeremia kowi lawtta mih khin khe Nebuzardan dow aia kowi tek pe mih, “CHAKRAMANG en kowh Thurai mih Judauüa luk kowi mami piakra nauang ting kown mih laiklow tek khai.3Kawmat dow CHAKRAMANG mih aia tekta mih iawng chang khai bowt. Tawngplawng kowchow panow enni dow CHAKRAMANG kowi kingküala mih angak enni chang khai, now aia kowh laiklow enni chün dowi chekhai.4Tawkche ani dow en rut kowi kowh lawngha leng ang latta en khowk. En che nau hanow ang hown Babulawn pren kowi en tawi ia tawi chekhai; en kowi dow ang naming nakhet en kown. Tawkche en tawi kown nau dowi hanow hauang tawi diah. Mü diah! Paprenma dow en pur kowi uowi hüah towbowt; en naura kowi en krawi ia uowi.5Tawkche makowi che en uowi kown now Ahikam kowh chapa Gedalia tut-e kowplan diah. (Gedalia dow Safan kowh chu chekhai). Gedalia dow Juda kowi kowh marow maten luk kowi nachang alow kownkow Babulawn pren mang towah mih chekhai. En nau now aia hown maru pungmadawng kowi en tawi ia uowi. Nachenganchepaw en che nau now en naura kowi en krawi nowng kowi kown. Nami dow en matia low taih,” pakhai. Nami kung kowi siphai aluchow dow aia kowi chakkham hai awmrawm sung peah now pe mangah khai.6Nakhowk khe Jeremia dow Mizpa marow kowi Ahikam chapa Gedalia tut-e kowkowi khai, now pren kowi kowh ta uowi miuüa pungmadawng kowi tawi uown uowi khai.7Babulawn pren mang Nebuknezar mih Ahikam kowh chapa Gedalia kowi Juda pren kruitown mih towah khai, now Babulawn pren kowi tawi takhang dowi mih ngaraima mih kachakuüa, masiuüa hai ngeuüa kowi namingkhet kown mih kurdik paw peah khai. Naiawngün satang dow Babulawn pren mang tut-e tawi taap dowi mih Juda pren kowh maru iukuüa hai siphai aluchowuüa mih tawi ta khai.8Nami satang tata hanow amatni dow Mizpa marow kowi Gidalia tut-e uang khai. Naiawngün maru-uüa dow Nethania kowh chapa Ismael, Karea kowh chapa Johanan, Netofa marow hownia kowh Tanhumet kowh chapa Seraia, Makhathi kowh chapa Jazania hai amatni kowh maru-uüa chekhai.9Now amatni hai amatni kowh maru-uüa tut-e kham sawi se Gedalia tek pe mih, “Babulawn pren kowi kowh kruitown miuüa kowi hangkow kram büa diah. Mami pren kowi uowi büa diah, now Babulawn mang tek iawng chang büa diah. Naiawng che enni chang hanow enni naiung kown.10Mizpa kowi ang nauowi kown, now a-i tut-e kowh nauang kown mih Babulawnuüa kowi natawi tangila enni kown mih laiklow ang natek pe kown taih. Tawkche enni mih grep tui, aden khin khe kowh uih-ak hai sau mih krawi kuaah hanow enni kowh puh kowi enni nakrümah kown, now enni napowngah kown mih kua hai marow kowi dow enni nauowi kown,” pakhai.11Babulawn pren mang dow Juda pren kowi ta towla maru sangrum khai, now naiawngün maru-uüa luk kowi kowh nakruitown kown mih kurdik dow Gedalia kowi towah khai. Naiawngün satang dow Moab, Amawn, Edawm hai akeng pren kowi kowh Judauüa mih ta khai.12Nakhowk khe amatni dow amatni cham tauet mih pren hownia Juda pren Mizpa marow kowi Gedalia tut-e uang plan khai. Amatni dow grep tui hai aden khin khe kowh uih mih ahuma krümah khai.13Akung kowi Karea chapa Johanan hai dowm kowi kowh uowi mih siphai hawmh kowh aluchowuüa dow Mizpa marow kowi Gedalia tut-e uangah hanow tek pe mih,14“Amawnuüa kowh mang Balis saita en kownkow Nathania chapa Ismael kowi uang chinah mih en tuk bow?” pabüah khai. Tawkche Ahikam chapa Gedalia dow amatni kowh laiklow kowi owm dowi chekhai.15Nakhowk khe kukpa Gedalia kowi Karea chapa Johanan uang tek pe mih, “En che pe ang ana hanow Nathania chapa Ismael kowi ang kowsaita kown, amiapaw natuk kown nadowi. Nahanow aia mih naka sai en kown nadowi bowt. Aia che uang sai en khai hanow en riaret kowi kowh Judauüa mih nacham taset plawt kown, now Juda pren kowi kowh ta sing mih maru-uüa dow nakowng bowk kown,” pakhai.16Tawkche Ahikam kowh chapa Gedalia dow Karea kowh chapa Johanan kowi tek pe mih, “Naiawng mih lup hang chang diah. Ismael lawnguan kowi kowh en tek mih dow dai lai chekhai,” pakhai.
The Seed Company