Jeremia39
1Jerusalem marow dow maiawng powngta khai. Juda pren kowi Zedekia chowm mang mih taku ning hamüt la khe Babulawn pren mang Nebuknezar dow aia kowh siphai maten kowi pawla now Jerusalem marow kowi kowkowi khai, now Jerusalem marow dow kowrumta lut khai.2Now Zedekia chowm mang mih lailowk ning nga kowi kowh tali la taku ni khe amatni dow Jerusalem marow tap mih khueah para khai.3Nakhowk khe Babulawn pren mang kowh maru iuk maten dow Jerusalem marow kowi uang kup khai, now marow dawnglang kowi kowh tapplawt kowi uang chowm büah khai. Naiawngün maru iukuüa dow Samgar marow hownia Nergal-Sarezer, maru iukuüa kowi kowh lang kri mih Nebo-Sarsekim hai Babulawn pren mang kowh akeng mih maru iukuüa chekhai.4Juda pren mang Zedekia hai aia kowh siphaiuüa dow naiawngün maru iukuüa kowi khi hanow kram kowh powt khai. Amatni dow iak-e khe mang kowh bakan prakowi mangla mih tiama iawng panow pre buk mih tap takra kowi kowh tapplawt iawng marow hownia Jawrdan lawngrawi prakowi powt büah khai.5Tawkche Babulawn pren mang kowh siphai hawmh dow amatni kowi kawikrawi khai, now Jeriko dowm nai kowi dow Zedekia kowi ka khümta büah khai. Amatni dow aia kowi khümla now Hamat pren kowi kowh Ribla marow kowi mang Nebuknezar tut-e kowpawla khai. Now mang Nebuknezar dow aia kowi ripah kown mih pe ana khai.6Mang Nebuknezar dow Ribla marow kowi Zedekia pur kowi achapauüa kowi saita pe khai, now Juda pren kowi kowh maru iuk maten kowi paw aia saita khai.7Nami kung kowi mang Nebuknezar dow Zedekia kowi laita pe mik khai, now aia kowi dow Babulawn pren kowi nakowpawla kownkow kri leng hown tawmah khai.8Babulawn siphaiuüa dow mang kowh kim hai maru kawmuüa kowh kim mih towkta pe bowk khai, now Jerusalem marow tap paw khueta pe büah khai.9Nami khin khe kowh marow kowi ta uowi miuüa, kowmatia chenchap kowi towta now Babulawnuüa hown tawi tabawng miuüa hai pren kowi kowh ta uowi mih maru-uüa kowi dow Nebuzardan mih khümla hanow Babulawn pren kowi pawla khai. Nebuzardan dow mang chawng mih siphaiuüa kowi kowh aluchow chekhai.10Tawkche Nebuzardan mih krawng bawn uowi dowi mih angaraima miuüa kowi dow Juda pren kowi ta towla khai. Nakhowk khe aia dow amatni kowh grep krum hai laih mih ta peah khai.11Babulawn pren mang Nebuknezar dow aia kowh achawng mih siphai aluchow Nebuzardan kowi Jeremia lawnguan kowi maiawng peah ana khai:12“Aia kowi dow mingkhetah kaneu diah. Aia kowi dow hangkow changah naklak diah, now aia tek iawng chang pe diah,” pakhai.13Naiawng rakowi kangchawng miuüa kowh lang kri mih Nebuzardan, mang kowh prengia pek mih Nergal-Sarezer, maru iuk Nebusazban hai mang kowh akeng mih maru iukuüa dow Jeremia kowi nauang pawla kownkow kowchin pe maru khai, now naiawngün dow Jeremia kowi kangchawngra viadawng hownia uang pawla khai. Amatni dow Jeremia kowi aia kim kowi nakowpawla kownkow Ahikam kowh chapa Gedalia rut kowi ap-ah khai. Ahikam dow Safan kowh chapa chekhai. Naiawng rakowi Jeremia dow Juda pren kowi aia maru-uüa tut-e tawi uowi khai.15Kangchawngra viadawng kowi Jeremia takhang reng tak khe CHAKRAMANG kowh laiklow dow aia tut-e maiawng uang ting khai:16“Ethiawpia pren hownia kowh Ebed-Melek tut-e kowkowi hanow kowtek pe diah. Mukuang siphaiuüa kowh CHAKRAMANG Israeluüa kowh Thurai tek mih, ‘Mami Jerusalem marow kowi dow ang tekta mih iawng ang nauang pe tachiah kown. Nami dow aiung hown nadowi kowi angak hown ang nauang pe tachiah kown. Naiawng uang phaw mih khin khe dow enni nakhi kown.17Tawkche en kowi dow ang nalawng en kown, now en kramah miuüa tut-e dow en kowi ang naap en kown nadowi.18Tawngplawng kowchow panow en dow ang luk kowi neplawng nesak khai. Naiawng rakowi ang nalawng en kown. En dow en ransu-uüa kowh saidawng kowi en nakowng kown nadowi. Ang CHAKRAMANG mami laiklow ang tek khowk,’ pape khai,” pakhai.
The Seed Company