Jeremia38
1Maru kawmuüa tut-e Jeremia tek laiklow mih khin khe Matan kowh chapa Sefatia, Pasur kowh chapa Gedalia, Selemia kowh chapa Jehukal hai Malkia kowh chapa Pasur büah mih tawi ta khai.2Jeremia tek mih, “CHAKRAMANG tek mih maiawng, ‘Mami marow kowi kowh uowi miuüa dow tasen, khown hai makowng hawi hown nakowng kown. Tawkche Babulawnuüa tut-e kowh kowtaap mih maru dow nakowng kown nadowi. Aia kowh asak dow naplai kown.3Mami marow dow Babulawn pren mang kowh siphaiuüa rut kowi ang naapta kown. Amatni dow mami marow napowngta kown,’ pape khai,” pakhai.4Nakhowk khe mang kowh maru iukuüa dow mang kowi tek pe mih, “Jeremia kowi kowngta kown takla. Tawngplawng kowchow panow aia dow naiawng krawi tek mih hownia Jerusalem marow kowi kowh siphai hai maru kawmuüa kowi krawi nen pe sak khai. Aia dow naiawngün maru-uüa naiung kown mih nau dowi chekhai, aia nau mih dow angak chekhai,” pakhai.5Maru iukuüa kowi mang Zedekia klangah mih, “Aia mih enni tut-e uowi hüah towbowt. Enni kowi ang nowng hang enni dowi chekhai,” pakhai.6Nakhowk khe amatni dow Jeremia kowi mang kowh chapa Malkia kowh tuikuam kowi leng hown iu klaah khai. Nami tuikuam dow kangchawngra viadawng re-e chekhai. Nami kuam kowi dow suplawk kangowh chekhai. Now Jeremia dow nami suplawk dawng kowi tamir ngialia khai.7Tawkche mang kim kowi kowh maru iuk Ebed-Melek dow kuam kowi Jeremia kowi kuakta mih tawi ta khai. Ebed-Melek dow Ethiawpia chenchap chekhai. Nami khin khe mang dow Benjamin tapplawt kowi chowm phülü chekhai.8Ebed-Melek dow mang kim hownia uang lawt hanow mang kowi kowtek pe mih,9“Aw ang kowh mangkri, risi Jeremia luk kowi nami maru-uüa chang mih dow lup ngak chekhai. Amatni dow Jeremia kowi mih kuam kowi kuakah khai; aia dow nakowi akhawr hown nakowng kown chowbowt. Tawngplawng kowchow panow marow kowi dow kawmpah khowk bowk khowk chekhai,” pakhai.10Nakhowk khe mang dow Ethiawpia chenchap Ebed-Melek kowi maiawng peah ana khai, “Ang kowh maru kowi pawla 30 ia diah, now risi Jeremia nakowng dowi kownkow tuikuam hownia uang khowngla büah diah,” pakhai.11Nakhowk khe Ebed-Melek dow naiawngün maru-uüa kowi pawla now mang kim kowi kowh dawngthawnguan towk rah dak kowi kowh kim kowi kowkowi khai. Aia dow nami kim lak hownia tawnguat prim hai aseknama mih tawnguat pawla khai, now naiawngün tawnguat dow tuikuam kowi Jeremia tut-e leng hown iu kla pe khai.12Ethiawpia chenchap Ebed-Melek tek pe Jeremia mih, “Nami tawnguat prim hai aseknama mih tawnguat dow en kowh iangdak kowi paah diah, nahanow leng kowi dow en naka ngarau kown nadowi bowt,” pakhai. Jeremia dow nami iawng chang khai.13Nakhowk khe amatni dow aia kowi leng hown tuikuam hownia uang küngla khai. Nami kung kowi Jeremia dow kangchawngra viadawng kowi uowi khai.14Nami kung kowi mang Zedekia dow kowchin maru hanow risi Jeremia kowi CHAKRAMANG kim kupra sum lawmbawr mih plawt kowi uang pawla khai. Mang tek pe Jeremia mih, “Ang lünta en laiklow lowk kown. Ang tut-e tawng iawng mih laiklow paw hangkow tada diah,” pakhai.15Nakhowk khe mang Zedekia kowi Jeremia tek pe mih, “Ang che tek en hanow en nakowngta ang kown, now ang pe en prengia chepaw en nasünta kown nadowi,” pakhai.16Nahanow mang Zedekia dow kukpa Jeremia tut-e takham sawi se tek pe mih, “Masing CHAKRAMANG ming lüklau se ang takham khowk. Ang nakowngta en kown nadowi, now saita en kown nau miuüa rut kowi paw ang naap en kown nadowi,” pakhai.17Nakhowk khe Jeremia tek pe Zedekia mih, “Mukuang siphaiuüa kowh CHAKRAMANG Israeluüa kowh Thurai tek mih, ‘En che Babulawn kowi kowh maru iukuüa tut-e khamsum hanow en kowh sak naplai kown, now Jerusalem marow paw natowkta kown nadowi. Nami klen kowi en hai en kimchakuüa dow naplai kown.18Tawkche Babulawn pren mang kowh maru iukuüa tut-e en che khamsum dowi hanow nami marow dow Babulawnuüa rut kowi naapta en kown, now amatni dow nami marow natowkta en kown. En matia paw amatni hownia naia plai kown nadowi,’ pakhai,” pape khai.19Nakhowk khe Jeremia kowi mang Zedekia klangah mih, “Kowmatia pren kowi towta hanow Babulawn pren kowi tangila mih Judauüa kowi dow ang kram khai. Tawngplawng kowchow panow Babulawnuüa dow ang kowi Judauüa rut kowi naapta ang chepaw naia kown, now amatni dow nachang ang naklak chepaw naia kown,” pakhai.20Jeremia klangah mih, “En che CHAKRAMANG kowh laiklow chün khai hanow Babulawnuüa dow Judauüa rut kowi naap en kown nadowi. Nahanow aiungma en naka uowi kown, now en naplai kown.21Tawkche en che khamsum dowi hanow mukmang kowi kowh CHAKRAMANG tüng ang iawng naphaw kown. Mukmang kowi CHAKRAMANG tüng ang mih maiawng:22Juda mang kim kowi kowh ta sing uowi mih masiuüa hawmh kowi Babulawn pren kowi kowh siphai aluchowuüa khümla khai. Nakhowk khe naiawngün masiuüa hawmh tek en mih,“‘En kowh auiua sinuüa dow tiama ngak prakowi cham pawla en khai,en kowi dow amatni kuan en khai.Naiawng rakowi kawmat dow en kowh khawk mih suplawk nek kowi tadup khai bowt,naiawng akrat hown en uowi mih khita hanow en kowh auiuauüa dow nuata en khai,’ napa kown.23“En kowh masi hai en kowh chauüa kowi dow Babulawnuüa tut-e nakowpawla kown. En matia paw amatni rut hownia naia plai kown nadowi. En kowi dow Babulawn pren mang nakhüm en kown, now aia dow Jerusalem marow natowkta en kown,” pakhai.24Nakhowk khe mang Zedekia tek pe Jeremia mih, “Naiawngün lawnguan dow mia kowi paw hang cham tek diah. En che cham tek hanow en nakowng kown.25Maru iukuüa che en hown ang talawp mih ta hanow amatni dow nauang chepaw naia kown, now maiawng natek en chepaw naia kown, ‘Mang kowi tawng chow en tek pe mih tek anging diah, now mang tawng chow tek en mih tek anging diah. Anging tut-e mapaw hauang tada diah; en che tada khai hanow anging nakowngta en kown,’ napa kown.26Nakhowk khe amatni kowi en natek pe kown mih, ‘Jonathan kim kowi nakowsa ang dowi kownkow Mang kowi ang tek pe khowk chowdiah. Tawngplawng kowchow panow nakowi che kowsa ang hanow ang dow nakowng kown chekhai,’ pape diah,” pakhai.27Maru iukuüa maten dow Jeremia tut-e uang hanow uang lünta khai. Nakhowk khe Jeremia dow aia kowi kowh mang peah mih ana iawng rowprowp amatni kowi hawt klangah khai. Naiawng tek pe hanow amatni dow aia kowi lüntaah dowi bowt chekhai. Tawngplawng kowchow panow mang hown aia talawp mih laiklow dow amiapaw tawi ta dowi chekhai.28Jerusalem marow Babulawn pren mang uang powng dowi mowr Jeremia dow kangchawng miuüa kowh viadawng kowi uowi khai.
The Seed Company