Jeremia35
1Juda pren kowi Josia kowh chapa Jehoiakim chowm mang mih khin khe CHAKRAMANG tek pe Jeremia mih,2“En mih Rekab krungchakuüa tut-e kowkowi diah. Amatni kowi dow ang chup kim kowi kowh towklak kowi uang pawla diah, now pe khamah grep tui büa diah,” pakhai.3Naiawng rakowi Rekab krungchakuüa maten kowi Thurai chup kim towklak kowi ang kowpawla khai. Rekab krungchakuüa dow Habazinia kowh chu Jazania, aia tainau-uüa hai amatni chauüa chekhai. Jazania dow Jeremia kowh chapa chekhai.4Rekab krungchakuüa kowi CHAKRAMANG chup kim kowi kowh Igdalia chapa risi Hanan kowh chapauüa towklak kowi ang kowpawla khai. Hanan kowh towklak dow maru iukuüa kowh towklak ria kowi chekhai. Hanan kowh chapauüa towklak adak krowng kowi uowi mih dow Salum chapa Maseia chekhai. Maseia dow Thurai chup kim kangchawng mih chekhai.5Nami kung kowi dow nami Rekabituüa pur kowi grep tui atekma kangowh mih bia hai bia cha ün ang tow pe khai, now amatni kowi ang tek pe mih, “Kham grep tui büa diah,” pakhai.6Tawkche amatni tek mih, “Anging dow kham grep tui dowi. Tawngplawng kowchow panow anging kowh pipu Rekab kowh chapa Jonadab pe anging ana mih, ‘Enni hai enni krungchakuüa dow katpaw naia kham grep tui kown nadowi.7Nami klen kowi kim ün katpaw enni nachang kown nadowi, cha ün enni nasawt kown nadowi, grep krum ün enni naran kown nadowi, now grep krum ün chang paw enni nachang kown nadowi. Tawkchedow atungma tangbung kowi enni nauowi kown. Naiawng che enni uowi now prenlang maru iawng enni nakowuowiah kown mih pren kowi chowngdawng sakklangma hai aiungma enni naia uowi kown,’ pakhai.8Anging kowh pipu Rekab kowh chapa Jonadab pe anging mih ana dow anging bowkbowk chün reng. Anging, anging masi hai anging kowh chauüa dow amiapaw kham grep tui dowi chekhai.9Nauowila kown mih kim ün anging chang dowi chekhai, now grep krum, cha hai uih-ak rawng ün anging lup dowi chekhai.10Anging dow tangbung kowi kowh uowi mih chekhai, now anging kowh pipu Rekab kowh chapa Jonadab pe anging mih ana maten dow anging chün reng chekhai.11Tawkche Juda pren kowi Babulawn pren mang Nebuknezar uang sen anging mih khin khe anging tatek mih, ‘Babulawn hai Siria siphaiuüa hownia Jerusalem marow kowi a-i kowpowt lah,’ pakhai. Naiawng rakowi anging dow Jerusalem marow kowi uowi khai,” pakhai.12Nami kung kowi mukuang siphaiuüa kowh CHAKRAMANG Israeluüa kowh Thurai mih Juda hai Jerusalem maru-uüa tut-e kowchin ang khai. Now kowpe tek ang mih, “CHAKRAMANG tek mih, ‘Tawngplawng kowchow ang tüng ang sang enni mih enni chün dowi? Tawngplawng kowchow ang kowh laiklow enni sünta dowi?14Rekab kowh chapa Jonadab dow achapauüa kowi pe khamah grep tui dowi chekhai, now achapauüa dow nami ana pek chün reng chekhai. Kawmat paw amatni dow khang grep tui reng tak chekhai; tawngplawng kowchow panow amatni dow amatni pipu-uüa kowh ana pek chün khai. Tawkche enni dow plan plan ang tek enni chepaw ang laiklow enni chün dowi chekhai.15Ang kowh nar risiuüa kowi aplan aplan enni tut-e ang uang chinah khai. Amatni dow krawi tek enni mih, “Tiama ngak hownia uang plan büa diah, now enni kowh chowm krang uowi krang aiungma changah büa diah. Akeng thurai kowi hang cham tawi chupiia büa diah. Enni che cham tawi chupiia dowi kowh chalow now enni hai enni pipu-uüa kowi kowh ang peah mih pren kowi enni naka uowi kown,” pakhai. Tawkche enni dow ang laiklow kowi pe ching dowi chekhai, now sünta paw sünta dowi chekhai.16Rekab kowh chapa Jonadab krungchakuüa dow amatni pipu-uüa kowh ana pek chün reng; tawkche enni dow ang laiklow chün dowi chekhai.17“‘Naiawng rakowi ang mukuang siphaiuüa kowh CHAKRAMANG Israeluüa kowh Thurai tek khowk. Sünta büa diah, Juda pren hai Jerusalem marow kowi kowh uowi miuüa luk kowi phih nauang ting kownkow ang tekta khowk mih ang nauang pe tingah kown. Amatni kowi dow ang laiklow nachün kown mih ang tek pe khowk chowdiah. Tawkche ang laiklow sünta büa dowi chekhai. Amatni kowi dow ang hawah khowk chowdiah. Tawkche klang ang büa dowi chekhai,’ pape diah,” pakhai.18Nami kung kowi Jeremia tek pe Rekabituüa mih, “Mukuang siphaiuüa kowh CHAKRAMANG Israeluüa kowh Thurai tek mih, ‘Enni dow enni kowh pipu Jonadab kowh ana pek chün khai, now aia kowh ana pek iawng enni uowi hai aia tek iawng enni chang khai.19Naiawng rakowi ang mukuang siphaiuüa kowh CHAKRAMANG Israeluüa kowh Thurai tek khowk, ang kowi nachupiia kownkow Rekab kowh chapa Jonadab krungchakuüa hownia katpaw maru nakhawr kown nadowi,’ pakhai,” pape khai.
The Seed Company