Jeremia34
1Babulawn pren mang Nebuknezar, aia kowh siphaiuüa, aia nimkrüa kowi kowh uowi mih pren maten hai akeng chenchapuüa dow Jerusalem marow hai aria aret kowi kowh marow ün kowsen mih khin khe CHAKRAMANG Israeluüa kowh Thurai mih maiawng nakowtek kownkow Juda pren mang Zedekia tut-e Jeremia kowi kowchinah khai. CHAKRAMANG tek mih, “Ang CHAKRAMANG mami laiklow ang tek khowk, Jerusalem marow dow Babulawn pren mang Nebuknezar rut kowi ang naap-ah kown, now nami marow dow aia natowkta kown.3Juda pren mang Zedekia dow Babulawn pren mang rut hownia naplai kown nadowi. Aia kowi dow Babulawn pren mang rut kowi ang naap-ah ngengche kown. Nakowi aia dow Babulawn pren mang kowi nakhi kown, now Babulawn pren mang hown natalawp kown.4“Aw Juda pren mang Zedekia, ang laiklow sünta diah. En lawnguan kowi ang tek khowk, en dow saidawng rut kowi nakowng kown nadowi.5En dow thaulangma nakowng kown. En pipu-uüa dowi rawn kowh rik chowm mang miuüa kowi dow kowng khe natüng pe ringkawra kownkow towk pe maih reng chekhai. Nami iawng dow en kowi paw natüng en ringkawra kownkow nam iungma mih maikhük natowk en kown. Now maru kawmuüa sak nga kowh natek kown mih, ‘Nga lai bowt kowbow!’ napa kown. Ang CHAKRAMANG mami laiklow ang tek khowk,” pakhai.6Nakhowk khe risi Jeremia dow naiawngün laiklow mih Jerusalem marow kowi Juda pren mang Zedekia kowi tek pe khai.7Nami khin khe Babulawn pren mang siphaiuüa dow Jerusalem, Lakhis hai Azeka marow kowi senah khai. Tawngplawng kowchow panow Juda pren kowi kowh amatni napowng kown mih ta lat mih dow naiawngün tap tapat lut mih marow towbowt chekhai.8Jeremia tut-e CHAKRAMANG kowh laiklow uang plan ting khai. Nami dowi rawn nar kowi takhang mih Hebraiuüa kowi nalawtta kownkow mang Zedekia dow Jerusalem maru-uüa hown tatow sangbowk laitawm khai.9Nami sangbowk laitawm dow Hebrai narla hai narmauüa kowi nalawtta kown mih chekhai, now Judauüa kowi miapaw naia towah nar dowi kown mih chekhai.10Naiawng rakowi maru iukuüa hai maru kawmuüa dow nami sangbowk laitawm chün hanow amatni kowh narla hai narmauüa kowi nalawtta kown mih nauta khai, now amatni kowi natowah nar kown nadowi bowt pahai takham büah khai. Nahanow amatni dow amatni kowh naruüa kowi lawtta khai.11Tawkche amatni dow akung kowi planta saktuak büah khai, now amatni lawtta mih narla hai narmauüa kowi uang pawla büah hanow plan pe uowiah nar khai.12Naiawng rakowi Jeremia tut-e CHAKRAMANG kowh laiklow uang ting mih,13“Ang CHAKRAMANG Israeluüa kowh Thurai tek khowk, Aigupta pren kowi cham uowi nar mih enni pipu-uüa kowi ang uang lawtla mih khin khe amatni hown ang tatow sangbowk laitawm khowk chowdiah.14Nakhowk khe amatni kowi ang tek pe mih, ‘Hebraiuüa pungmadawng kowi mia iawng mih chünchü enni tut-e uang tasum khai hanow ranit ning khe aia kowi dow enni nalawtta kown. Taruk ning mowr tawi chang enni lup kung kowi aia kowi enni nalawtta kown,’ pakhai. Nachenganchepaw enni pipu-uüa dow ang laiklow sünta dowi, now ang laiklow kowi ching paw pe büah dowi chekhai.15Pre sum ni dowi rawn dow enni dia sar khowk chowdiah, now ang mik kowi iung mih lup paw enni chang khowk chowdiah. Enni kowh nar Hebraiuüa kowi enni nalawtta kown mih ün enni tek khowk chowdiah. Nami klen kowi ang kowh chup kim pur kowi ang kowh ari arow nachün kown mih ün enni nauta khowk chowdiah.16Tawkche kawmat dow enni kowh saktuak taplan khai iawk, now ang kowh ming enni sürlawk ang khai iawk. Amatni nau iawng nauowi kownkow enni lawtta khowk mih enni kowh narla hai narmauüa kowi enni uang pawla now enni pe uowiah nar khai iawk.17“Naiawng rakowi ang tek khowk, enni dow ang laiklow chün dowi chekhai. Enni dow enni kowh chenchap tainau-uüa kowi nalawtta kown mih enni phuang dowi chekhai. Naiawng rakowi kawmat mih ang krüa kowi uowi mih hownia ang lawtta enni khowk. Tawkche naiawng ang pe enni mih thaulangra khin kowi tasen, makowng hawi hai khown enni luk kowi nauang ting kown. Naiawngün piakra hown enni kowi dow ang napiak enni kown. Nami khi hanow lusa kowi kowh prenchakuüa dow kram hown natakrow kown.18Judauüa, Jerusalem aluchowuüa, maru iukuüa, uamowuüa hai prenchakuüa dow chia chah changah pre dung mih takra iawng mang hanow ang kowh rirow nachün kown mih takham khowk chowdiah. Nachenganchepaw amatni dow ang kowh ari arow piakta büah khai, now nami amatni takhamta iawng chang büah dowi chekhai.20Naiawng rakowi amatni kowi dow kowngta kown nau mih ransu-uüa rut kowi ang naap-ah kown. Amatni kowh uak dow kuang kowi kowh uaklinguüa hai kaurawng uaramchak hawmh kowh chakkham nachowng kown.21Juda pren mang Zedekia hai aia kowh maru iukuüa kowi dow kowngta kown nau mih ransu-uüa rut kowi ang naap-ah kown. Enni kowi dow enni hownia amatni pren kowi plan mih Babulawn mang kowh siphaiuüa rut kowi ang naap enni kown.22Mami Jerusalem marow kowi nauang senah iawk kownkow Babulawn siphaiuüa kowi ang nahawah iawk kown. Amatni dow nami marow mih nauang sen kown, now nami dow powngta hanow natowkta büah kown. Judauüa kowh marow ün napiakah hanow akhaw aklaima ang nachangah kown,” pakhai.
The Seed Company