Jeremia33
1Nami kung kowi CHAKRAMANG kowh laiklow dow Jeremia tut-e uang plan ting khai. Nami khin khe paw Jeremia dow kangchawngra viadawng kowi tatawm reng tak chekhai.2CHAKRAMANG tek mih, “Ang ming dow CHAKRAMANG, ang dow lusa thawp miia chekhai. Ang dow lusa mih thawpah hanow athikma mih arah kowi ang towah khai.3Ang tut-e uang lü uang leng diah, now ang naklang en kown taih. En kowi dow kri kraingma mih laiklow hai en tukah dowi mih laipet ün ang natek en kown.4Ang dow CHAKRAMANG Israeluüa kowh Thurai chekhai. Juda pren mang kowh kim lawnguan hai Jerusalem marow kowi kowh kim lawnguan kowi ang tek khowk, naiawngün kim dow ransu-uüa napiakta kown. Amatni dow nami Jerusalem marow kowi kowh kimkrowng ün napiakta kown, now saidawng hown marowchakuüa kowi nasenah büah kown.5Jerusalem marowchakuüa dow lainowmma chang angak khai. Naiawng rakowi amatni kowi dow ang sak-ihah dowi mih hai ang kowh kunmaraura hown sai chamang ang nasaiah kown. Jerusalem marow kowi Babulawn siphaiuüa uang sen mih khin khe amatni kowh uak dow marow kowi kowh kim kowi ün natakuakla pan kown.6“Nachenganchepaw ang dow marow hai nakowi kowh maru-uüa kowi dow aiungma ang nachangah kown, now kow iung lak iungma ang nachangah kown. Amatni kowi dow thaulangma ang nape uowiah kown.7Juda hai Israeluüa kowi dow nar kowi cham takhangra hownia ang nauang plan pawla iawk kown, now amatni kowh pren dow auown khe kowh iawng ang nachangah iawk kown.8Amatni kingküala ang mih angak amatni changta mih dow ang nasia sauta pe kown, now amatni kowh angak maten hai kingküara dow ang nalawtta pe kown.9Nakhowk khe dow Jerusalem marow mih palusama maru pur kowi kiowrira, piawra hai ringkawra nape ang kown. Jerusalem maru-uüa vüi kowi ang chang pe lup iung mih laiklow dow akeng chenchapuüa nata kown. Nami khin khe amatni dow nakiow ang büah kown. Jerusalem marowchakuüa vüi kowi iungra hai thaulangra ang uang pawla pe mih rakowi akeng chenchapuüa dow ang kowi kram hai naringkaw büah kown.10“Mami re-e kowh arah lawnguan kowi enni tek mih, ‘Mami dow apiakma mih krawng bawn chekhai; makowi dow maru lah, tawncher lah amiapaw uowi dowi chekhai,’ pakhai. Tawkche Juda pren kowi kowh marow hai Jerusalem marow kowi ün kawmat kowh akhaw aklaima mih tiama kowi ün piaw mih klow, awmrawm mih klow hai masi pawk pawi klow naplan ta iawk kown, now nachangla awmrawm laitek müa uanap kownkow CHAKRAMANG kim kowi uang pawla uanh mih maru-uüa klow paw naplan ta iawk kown. Naiawngün maru-uüa natek kown mih,“‘Mukuang siphaiuüa kowh CHAKRAMANG kowi tek pe awmrawm lai diah.Tawngplawng kowchow panow aia dow aiungma chekhai,now aia kowh achur uowi dowi mih sakraura dow chowngchowng saksakma anikma chekhai,’ napa kown.“Nami pren kowi auown khe kowh iawng aiungma ang naplan changah iawk kown.12Maru hai tawncher uowiah dowi mih apiaknama mih arah kowi dow Juda maru-uüa uowira, ruapur thing miuüa uowi rah hai ruapur thing rah süng nachowng iawk kown.13Benjaminuüa kowh süng, Jerusalem riaret kowi kowh süng, Juda marow ün, Negeb kowi kowh kua hai marow maten, alowngma mih süng hai anemchow mih süng maten kowi kowh kua hai marow kowi ün naplan rüa ruapur iawk kown. Ang CHAKRAMANG mami laiklow ang tek khowk,” pakhai.14CHAKRAMANG tek mih, “Ang nachangah aiung kown mih Israel hai Judauüa tut-e ang takhamta mih iawng ang nachang pe kown mih akhin nauang ting kown.15Nami khin khe dow David krungchak hownia Achinawmma mih Mia Prek kowi ang nape chowmah mang lowk ia kown. Aia dow pren kowi anowmma hai anama mih lup nachang kown.16Nami khin khe dow Juda maru-uüa mih naka lawngra kown, now Jerusalem maru-uüa paw thaulangma nauowi kown. Jerusalem kowi dow, ‘CHAKRAMANG mih anging kowh tachi tanawmra chekhai,’ pahai nahawah kown.17Israel pren mang chowm rah kowi nachowm mang kown mih maru David krungchakuüa hownia nakhawr kown nadowi.18Now ang pur kowi iowng se atungma tikah mih uanap, kawmdi uanap hai tawncher phuchua pawi nachang kown mih paw Levi chenchap hownia uamow nakhawr kown nadowi,” pakhai.19Nami kung kowi Jeremia tut-e dow maiawng CHAKRAMANG kowh laiklow uang ting khai:20“Towngla ni hai uar khükhü ang tatowah mih sangbowk laitawm dow amiapaw nowng piak dowi chekhai. Amatni dow akhin towng uang lawt reng chekhai.21Nami che enni ia piak khai hanow ang nar David hai Levi chenchap uamowuüa hown kowh ang tatowah mih sangbowk laitawm enni naia piak kown, now David kowh mang chowm rah kowi nachowm mang kown mih paw aia krungchak hownia nakhawr kown.22Ang kowh nar David krungchakuüa hai ang pur kowi chang lup mih Leviuüa kowi dow mukuang kowi kowh krek iawng ahuma ang nachangah kown, now sata pang kowi kowh sema iawng maru iun akawmma ang nachangah kown,” pakhai.23Nami kung kowi Jeremia tut-e CHAKRAMANG kowh laiklow uang plan ting khai iawk. CHAKRAMANG tek pe mih,24“Maru kawmuüa tek mih, ‘Israel hai Judauüa kowi CHAKRAMANG kloah mih chowdiah. Tawkche kawmat dow amatni kowi CHAKRAMANG nuata khai bowt,’ pakhai. Naiawng maru kawmuüa tek mih en khi dowi bow? Amatni dow ang maru-uüa kowi khare büah khai, now chenchap iawng khowm nüla dowi bowt chekhai.25Tawkche ang CHAKRAMANG tek khowk, ni hai uar lawnguan kowi kowh ang kowh sangbowk laitawm dow tapiak dowi chekhai, now mukuang hai lusa lawnguan kowi kowh ang kowh rirow paw tapiak dowi chekhai.26Nami iawng Jakawb hai ang kowh nar David krungchakuüa vüi kowi ang kowh sangbowk laitawm nauowi reng kown, now Abraham, Isak hai Jakawb krungchakuüa luk kowi nachowm mang kownkow David krungchakuüa kowi ang nanuaah kown nadowi. Amatni kowi dow ang nachangah iung kown, amatni kowi dow ang nasaksing sanaah kown,” pakhai.
The Seed Company