Jeremia32
1Juda pren kowi Zedekia chowm mang mih hamüt ning khe CHAKRAMANG kowh laiklow dow Jeremia tut-e uang ting khai. Nakhowk khe Nebuknezar chowm mang mih dow lairiat ning chekhai.2Nami khin khe Babulawn pren mang kowh siphaiuüa dow uang sen Jerusalem marow kownkow uang umta lut khai, now amatni dow Jeremia kowi Juda pren kowi kowh mang kim chawngra viadawng kowi tawmta hüah khai.3Jeremia kowi mang Zedekia tawmah mih auan dow risi iawng Jeremia krawi tek lai rakowi chekhai. Jeremia aplan aplan krawi tek mih, “CHAKRAMANG tek mih, ‘Jerusalem marow kowi Babulawn pren mang rut kowi ang naap-ah kown, now aia dow nami marow napowngta kown.4Juda pren mang Zedekia dow Babulawn pren mang rut hownia naplai kown nadowi. Aia kowi dow Babulawn pren mang rut kowi ang naap-ah ngengche kown. Nakowi aia dow Babulawn pren mang kowi nakhi kown, now Babulawn pren mang hown natalawp kown.5Mang Zedekia kowi dow Babulawn pren mang mih Babulawn pren kowi napawla kown, now mang Zedekia mih ang lawngah dowi mowr nakowi nauowi kown. Naiawng rakowi Babulawnuüa hown enni tasen chepaw enni naawng kown nadowi,’ pakhai,” pape khai.6Nami khin khe Jeremia tek mih, “CHAKRAMANG tek ang mih,7‘En pahi Salum kowh chapa Hanamel mih en tut-e nauang kown. Now aia natek en kown mih, “Anathawt marow kowi kowh ang kowh krawng uowi mih en matia vüi ran diah. Tawngplawng kowchow panow tasin taken mih maru iawng nami krawng naklan kown mih dow en kowh alow uowi chekhai,” napa kown,’ pakhai.8Nakhowk khe CHAKRAMANG tek iawng ang pahi kowh chapa Hanamel mih kangchawngra viadawng kowi ang tut-e uang khai, now tek ang mih, ‘Benjamin süng kowi kowh Anathawt marow kowi ang kowh krawng uowi mih ran diah. Nami krawng naklan kown mih hai napowng kown mih low en kowh uowi chekhai. Naiawng rakowi nami krawng mih en matia vüi ran diah,’ pakhai. Nami ang tata hanow nami dow CHAKRAMANG kowh laiklow iawng phaw mih chekhai pami ang tuk khai.9Naiawng rakowi Anathawt marow kowi kowh Hanamel kowh krawng mih tai 17 iun hown ang ranta pe khai. Nami tai dow khaiah now ang peah khai.10Nami tasum taran mih charam kowi dow ang kla pe saing hanow ang tuk pe mur khai, now saksi ün ang towla pe khai. Nami klen kowi tai paw set kowi ang khai pe khai.11Nami kung kowi tasum taran müa charam ang paw pre buk khai. Lowk mih charam kowi dow mur tuk uowi chekhai, now ari arow hai laikham laiklow ün arui uowi chekhai. Tawkche alowk mih charam kowi dow mur tuk uowi dowi chekhai.12Nami kung kowi dow nami charam mih Neria kowh chapa Baruk kowi ang ap pe khai. Neria dow Maseia kowh Chapa chekhai. Nami khin khe Hanamel, saksi thuak miuüa hai kangchawngra viadawng kowi kowh chowm mih Juda maru-uüa maten tawi uowi chekhai.13Naiawngün maru-uüa pur kowi mukuang siphaiuüa kowh CHAKRAMANG Israeluüa kowh Thurai ana pek iawng Baruk kowi ang tek pe mih, ‘Nami tasum taranla krawng bawn mih mur tuk uowi mih hai mur tuk uowi dowi mih charam pawla hanow bawn kawng kowi towah diah. Nahanow akhin krama chepaw napiak kown nadowi bowt.15Tawngplawng kowchow panow mami pren kowi dow kim, üa, krawng bawn hai grep krum mih naplan tasum taran iawk kown. Ang mukuang siphaiuüa kowh CHAKRAMANG Israeluüa kowh Thurai tek khowk,’ pape khai,” pakhai.16Ranla krawng mih charam Neria chapa Baruk kowi ang peta kung kowi dow CHAKRAMANG tut-e maiawng ang lü prasi khai:17“Aw CHAKRAMANG Thurai, en kowh kri kraingma mih kür hai akürma mih rut hown mukuang hai lusa dow en thawpah khai. En nowng changah dowi mih tawngpaw uowi dowi chekhai.18En dow athawng aiawng maru kowi en kowh achur uowi dowi mih sakraura en tüng pe reng. Tawkche u-pa kowh angak ripra dow amatni kung kowi kowh amatni kowh chauüa kowi pat en peah reng chekhai. Aw lang kri lang kraing mih hai akürma mih Thurai, en ming dow mukuang siphaiuüa kowh CHAKRAMANG chekhai.19En kowh sangkrangra dow kri kraingma chekhai, now en kowh lup maten paw akürma chekhai. Maru kowh chowm krang uowi krang prakowi en tang mü reng. En dow chowlowkkow chowm krang uowi krang hai lup chang krang iawng pe asung reng chekhai.20En dow Aigupta pren kowi amatra ahuma en tüngah khai, now awdara uowima mih lup paw en chang khai. Kawmat mowr kowi Israel hai maru maten pungmadawng kowi naiawngün lup en chang reng tak chekhai, nahanow en dow ka ming iung nang iung reng chekhai.21Aigupta pren hownia en maru Israeluüa kowi dow amatra hown, awdara uowima mih lup hown, kürra hai kramra uowima mih nowng changra hown en uang lawtla khai.22Amatni pipu-uüa kowi dow iawn tui, kuai tui hai tawngpaw akhawr uowi dowi mih pren napeah kownkow en khamah khai, now nami dow amatni kowi en peah khai.23Amatni dow nami pren kowi uang hanow uang powngta khai. Tawkche amatni dow en laiklow sünta dowi, now en kowh ari aiang paw chün büah dowi chekhai. Amatni dow en pe changah mih lup lowkchow paw chang dowi chekhai. Naiawng rakowi naiawngün phih maten dow amatni luk kowi en uang pawla pe khai.24Jerusalem marow nauang powngta kownkow tap rinrin ransu-uüa uang chun bawn mih mü diah. Nami marow kowi dow tasenra, khown hai makowng hawi mih Babulawn siphaiuüa rut kowi naap-ah kown. En tek iawng uang phaw mih dow en matia mik hown en khi khowk chekhai.25Aw CHAKRAMANG Thurai, Jerusalem marow dow Babulawnuüa napawta kown chowbowt. Nachenganchepaw tai hown naran krawng bawn hanow natowla saksi kown mih en tek ang khai,” pakhai.26Akung kowi CHAKRAMANG kowh laiklow dow maiawng Jeremia tut-e uang ting khai:27“Ang CHAKRAMANG dow maru maten kowh Thurai chekhai. Ang tut-e dow tawng mih lup paw krat dowi chekhai.28Naiawng rakowi mami Jerusalem marow dow Babulawn prenchakuüa hai amatni kowh mang Nebuknezar rut kowi ang naap-ah kown. Aia dow mami marow napowngta kown.29Kowsen Jerusalem marow mih Babulawn siphaiuüa dow marow kowi nakowkup hanow natowkta kown. Nami marow kowi kowh maru-uüa dow amatni kowh kimluk kowi Baal thurai vüi nam iungma mih maikhük towk büah khai, now akeng thurai vüi paw hüngah mih uanap pawi chang büah khai. Naiawng hai amatni dow towk ang kunmarau khai. Naiawngün kim hailawm amatni dow marow mih natowkta kown.30Israel hai Juda maru-uüa dow sowm hownia ang mik kowi lup ngak kangowh chang khai. Israeluüa dow amatni kowh lup ngak chang hown towk ang kunmarau khai.31Jerusalem marow thawp mih ni hownia kawmat mowr pat Jerusalem marowchakuüa dow towk ang sak-hiah hai towk ang kunmarau khai. Naiawng rakowi nami marow dow ang pur hownia ang napiakta kown.32Tawngplawng kowchow panow Israeluüa, Judauüa, amatni kowh manguüa hai maru iukuüa dow lup ngak chang hown towk ang kunmarau khai, now uamowuüa, risiuüa, Judauüa hai Jerusalem maru-uüa paw lup ngak chang hown towk ang kunmarau khai.33Amatni dow dangta ang kung khai. Amatni kowi dow plan plan ang tüngsangah khowk chowdiah. Nachenganchepaw amatni dow ang laiklow chün dowi chekhai, now sünta kown paw nau dowi chekhai.34Amatni dow amatni kowh suiiai kaniaima mih arup aren ün ang kim kowi towah büah khai. Naiawng hai amatni dow ang kim sürlawkah khai.35Amatni dow Ben-Hinawm lawngrawi kowi Baal thurai vüi kowi arah kroma mih kowi kowh chupiiara thawp büah khai. Nami phuchuara kowi amatni dow amatni kowh chauüa kowi Molek thurai vüi changla phuchua khai. Naiawng nachang kown mih amatni kowi dow ang peah ana dowi chekhai. Naiawng Juda maru-uüa nachang lup ngak kown mih tuak khowm ang ka tuak dowi chekhai.36“Mami marow lawnguan kowi enni tek mih, ‘Tasenra, khown hai makowng hawi hown Jerusalem marow dow Babulawn pren mang rut kowi apta khai,’ pakhai. Tawkche kawmat dow ang kowh laiklow sünta büa diah.37Ang sak-ih dowi mih hown, ang kowh kunmarau lün pluplup mih hai kramra uowima mih kunmaraura hown Juda hai Israeluüa kowi mih amatni pren hownia alakma mih pren kowi ang cham prütah khai. Nachenganchepaw amatni kowi dow ang cham prütah mih arah hownia arasang ang nakua nalawmah kown. Amatni kowi dow Jerusalem marow kowi ang nauang plan pawla iawk kown, now thaulangma ang nape uowiah kown.38Amatni dow ang kowh maru nachowng kown, now ang dow amatni kowh Thurai nachowng kown.39Amatni kowi dow saktuak lowkchow hai sangkrangra lowkchow ang nachangah kown. Nahanow amatni dow amatni matia hai amatni kung kowi kowh amatni kowh chauüa naiungla kownkow atungma ringkawma hown nakram ang kown.40Amatni hown dow chowngchowng saksakma mih sangbowk laitawm ang natatow kown. Nami dow amatni kowi ang nachangah iung reng kown mih chekhai. Ang hownia amatni napowtla dowi kownkow amatni sak kowi dow ringkawma hown kramra ang napeah kown.41Amatni kowi dow awmrawmma hown ang nachangah aiung kown, now ang kowh saktuak maiow hown amatni kowi dow kaah sakowmma mami pren kowi singh chowk iawng ang nachowkah kown.42“Israeluüa hai Judauüa luk kowi phih kraingma ang uang pawla pe khai. Tawkche khaleng hownia dow ang takhamta mih iawng amatni kowi aiung maten ang nachang pe kown.43Mami pren lawnguan kowi enni tek mih, ‘Mami dow piaknama mih krawng chekhai. Mami krawng kowi dow maru paw uowi dowi, now tawncher paw uowi dowi chekhai. Mami krawng dow Babulawnuüa rut kowi apta khai bowt,’ pakhai. Nachenganchepaw nami pren kowi mih naplan taran krawng bawn iawk kown.44Benjaminuüa kowh süng, Jerusalem riaret kowi kowh süng, Juda marow ün, Negeb kowi kowh kua hai marow maten, alowngma mih süng hai anemchow mih süng maten kowi kowh kua hai marow kowi dow tangka hown naran krawng bawn iawk kown. Nami ranla krawng bawn mih charam kowi dow nakla pe saing kown, natuk pe mur kown, now saksi paw natow pe kown. Tawngplawng kowchow panow amatni kowi dow amatni kowh pren mih ang naplan peah iawk kown chekhai. Ang CHAKRAMANG mami laiklow ang tek khowk,” pakhai.
The Seed Company