Jeremia28
1Juda pren kowi Zedekia chowm mang mih tali ning kowi kowh tanga la khe risi Hanania mih Jeremia kowi uang klangah khai. Naiawng Jeremia kowi Hanania uang tek pe mih dow CHAKRAMANG chup kim kowi kowh uamowuüa hai maru kawmuüa pur kowi chekhai. Hanania dow Gibeawn marowchak Azur kowh chapa chekhai. Jeremia kowi Hanania tek pe mih,2“Mukuang siphaiuüa kowh CHAKRAMANG Israeluüa kowh Thurai tek mih, ‘Babulawn pren mang kowh kürra dow ang napiakta pe kown.3Babulawn pren mang Nebuknezar dow CHAKRAMANG chup kim kowi kowh uanh maten amatni pren kowi pawla khai. Naiawngün uanh dow pre ning takra kowi Jerusalem marow kowi ang nauang plan pawla iawk kown.4Nami klen kowi Juda pren mang Jehoiakim kowh chapa Jehoiakin hai Babulawn pren kowi cham takhang mih Juda maru-uüa maten kowi paw Jerusalem marow kowi ang nauang pawla kown. Tawngplawng kowchow panow Babulawn pren mang kowh kürra dow ang napiakta pe kown. Ang CHAKRAMANG mami laiklow ang tek khowk,’ pape khai,” pakhai.5Nakhowk khe Jeremia dow uamowuüa hai CHAKRAMANG kim kowi iowng miuüa pur kowi risi Hanania kowi klangah khai.6Hanania kowi aia tek pe mih, “Amen! En tekah iawng CHAKRAMANG pacham chang lah. CHAKRAMANG kim kowi kowh uanh hai Babulawn pren kowi kowh cham takhang miuüa maten Jerusalem kowi CHAKRAMANG pauang cham pawla lah. Naiawng hai en tekah mih laiklow dow aia pacham pe tachiah lah.7Tawkche en tut-e hai maru kawmuüa tut-e ang nau tekah kown mih laiklow sünta diah.8En hai ang dowi rawn kowh rik uowi mih risiuüa dow pur prakowi pren hai aiuk aiukma mih pren kowi tasenra, khown hai makowng hawi nauang ting kown mih lawnguan kowi ün rik tekla khowk chekhai.9Thaulangra uang ting kown mih lawnguan kowi krawi tek mih risi laiklow uang tachi khe dow aia kowi CHAKRAMANG uang chinah mih chekhai pami natuk kown,” pakhai.10Nami kung kowi risi Hanania dow risi Jeremia pangkawt hownia laithawn tim mih pawah hanow klowkta pe khai.11Nami kung kowi dow maru kawmuüa pur kowi Hanania tek mih, “CHAKRAMANG tek mih, ‘Naiawng hai pre ning takra kowi dow chenchapuüa pangkawt hownia Babulawn pren mang Nebuknezar kowh laithawn tim ang napiakta pe kown,’ pakhai,” pape khai. Naiawng Hanania ki tek lai now risi Jeremia dow nami hownia powt khai.12Hanania klowkta laithawn tim mih pre sum ni kung kowi CHAKRAMANG kowh laiklow dow maiawng Jeremia tut-e uang plan ting khai:13“Hanania tut-e kowkowi hanow maiawng kowtek pe diah: CHAKRAMANG tek mih, ‘En klowkta mih dow singh hown kowh laithawn tim chowtaih. Tawkche nami takcha kowi lawngha hown kowh laithawn tim en thawpah khai.14Ang mukuang siphaiuüa kowh CHAKRAMANG Israeluüa kowh Thurai tek khowk, naiawngün chenchap kowi dow Babulawn pren mang Nebuknezar kowh nar nachangah kownkow amatni kowh pangkawt kowi ang natang pe lawngha laithawn tim kown. Now amatni dow aia kowh lup nachang ngengche kown. Nami klen kowi kaurawng uaramchak hawmh paw aia nimkrüa kowi ang natowah kown,’ pape diah,” pakhai.15Nami kung kowi risi Hanania kowi Jeremia tek pe mih, “Hanania, sünta diah. En kowi dow CHAKRAMANG uang chin en mih nadowi. Tawkche en dow naiawngün chenchapuüa kowi owm iawng en krawi dai khai.16Naiawng rakowi CHAKRAMANG tek mih, ‘En kowi dow mami lusa hownia ang naprütta en kown. Mami ning kowi ngengche en nakowng kown. Tawngplawng kowchow panow en dow Thurai kowi kingküala mih laiklow en krawi tek khai,’ pape khai,” pakhai.17Pre la kung kowi risi Hanania dow kowng khai bowt.
The Seed Company