Jeremia27
1Juda pren kowi Josia kowh chapa Zedekia uown chowm mang mih khin khe CHAKRAMANG kowh laiklow dow Jeremia tut-e uang ting khai.2Zedekia kowi CHAKRAMANG tek pe mih, “Thawp laithawn tim lowk diah, now nami laithawn tim dow chak pik leng hown en ngawng kowi bakah diah.3Nami kung kowi dow Juda pren mang Zedekia tut-e Jerusalem marow kowi uang mih Edawm, Moab, Amawn, Tura hai Sidawn pren manguüa kowh satang phowng miuüa hown amatni kowh manguüa kowi krawi phowng pe satang diah.4Amatni kowi dow amatni kowh manguüa kowi nakowtek pe kownkow peah ana diah. Mukuang siphaiuüa kowh CHAKRAMANG Israeluüa kowh Thurai tek mih,5‘Ang kowh kri kraingma mih kür hai ang kowh nowng changra hown mami lusa hai lusa kowi kowh uowi mih maru hai tawncher dow ang thawpah mih chekhai. Ang nauah mih maru kowi dow ang nowng peah kür reng chekhai.6Kawmat dow enni kowh pren maten mih ang kowh nar Babulawn mang Nebuknezar rut kowi ang naap-ah kown. Nami klen kowi kaurawng uaramchak hawmh kowi paw aia nimkrüa kowi ang natowah kown.7Aia kowh piak khin uang ting dowi mowr dow chenchap maten mang Nebuknezar, aia kowh chapa hai aia kowh chu-uüa tut-e nauang chowng nar kown. Nami kung kowi dow Babulawn mang Nebuknezar kowi chenchap ahuma hai aiuk aiukma mih manguüa nachangla nar kown.8“‘Tawkche tawngbak mih prenchakuüa dow Babulawn pren mang Nebuknezar nar kowi uowi kown nau dowi mih paw nauowi kown, now aia kowh laithawn tim ngawng kowi bak kown nau dowi mih paw nauowi kown. Naiawng mih prenchakuüa kowi dow asaima Nebuknezar piakta dowi mowr tasen, khown hai makowng hawi hown ang naripah kown.9Naiawng rakowi enni mih enni kowh risi, hawra mük mih, mukmang nowng phuang mih, püi howng mih hai mantan chang mih kowh laiklow hangkow sünta büa diah. Tawngplawng kowchow panow amatni dow Babulawn pren mang kowh nar enni nachowng kown nadowi pahai krawi dai enni khai.10Naiawng hai amatni dow nakrawi dai enni kown. Naiawngün dai lai che enni sünta hanow enni kowi ang naprüt enni kown. Nahanow enni dow enni matia pren hownia enni nacham taset plawt kown, now enni napiak kown.11Tawkche amia iawng mih chenchap chow Babulawn pren mang kowh laiklow chün hai aia krüa kowi uowi khai hanow nami chenchap kowi dow amatni pren kowi ang nape uowiah kown, now nakowi dow ang nape lupah üa hai laih kown. Ang CHAKRAMANG mami laiklow ang tek khowk,’ pape khai,” pakhai.12Juda mang Zedekia kowi dow nami satang ang phowng pe khai. Aia kowi ang tek pe mih, “En che sing kown nau khai hanow Babulawn mang hai aia kowh maru iukuüa nau iawng chang diah.13Tasenra, khown hai makowng hawi hown en hai en maru-uüa kowng mih en nau bow? Babulawn pren mang low kowi uowi kown nau dowi mih maru-uüa dow naiawng naphaw kown mih CHAKRAMANG tekla khowk.14‘Babulawn pren mang kowh laiklow hangkow chün büa diah’ pahai tek mih risi kowh laiklow dow hangkow sünta büa diah. Naiawngün risiuüa dow krawi dai enni mih chekhai.15CHAKRAMANG tek mih, ‘Naiawngün risi kowi dow ang uang chinah mih nadowi chekhai. Amatni dow ang ming hown krawi küa dai khai. Naiawng rakowi enni hai enni tut-e kowh krawi küa dai mih risiuüa kowi dow ang naprütta kown, now enni dow napiak bowk kown,’ pape khai,” pakhai.16Nakhowk khe Uamowuüa hai maru kawmuüa kowi CHAKRAMANG kowh laiklow ang krawi tek khai. CHAKRAMANG tek mih, “Risiuüa dow maiawng krawi tek enni khai, ‘CHAKRAMANG kim hownia kowh Babulawn pren kowi pawla mih uanh dow alenma nauang pawla kown,’ pakhai. Naiawng amatni dow enni tut-e krawi küa dai khai.17Amatni kowh laiklow hangkow sünta büa diah; Babulawn pren mang krüa kowi uowi büa diah. Nahanow enni nasing kown. Now enni kowh marow paw napiak kown nadowi bowt.18Kawmat paw Juda pren mang kim, Thurai chup kim hai Jerusalem marow uanh ta uowi ne tak. Naiawng rakowi naiawngün uanh Babulawn pren kowi naia pawla dowi kownkow CHAKRAMANG tut-e pacham lü khowng büah lah. Amatni che risi na khai, now amatni tut-e che Thurai laiklow uowi khai hanow mukuang siphaiuüa kowh CHAKRAMANG tut-e pacham lü prasi büah lah.19Juda pren mang Jehoiakim chapa Jehoiakhin, Judauüa kowi hai Jerusalem kowi kowh maru iukuüa kowi dow mang Nebuknezar mih khümla now Babulawn pren kowi pawla khai. Nami khin khe mang Nebuknezar dow Jerusalem marow kowi kowh asung khakma mih kri kimchüng, kri biatum, tawkpla hai akeng mih uanh ün pawla dowi chekhai. Naiawngün lawnguan kowi CHAKRAMANG tek mih,21‘Ang kim kowi, Juda pren mang kim kowi hai Jerusalem marow kowi kowh uowi mih naiawngün uanh dow Babulawn pren kowi napawla kown. Nauang plan pawla kown mih ang sangkrangta dowi mowr dow naiawngün uanh mih nakowi nauowi kown. Nami kung kowi dow naiawngün uanh mih makowi ang nauang plan pawla iawk kown. Ang mukuang siphaiuüa kowh CHAKRAMANG mami laiklow tek khowk,’ pape khai,” pakhai.
The Seed Company