Jeremia26
1Juda pren kowi Josia chapa Jehoiakim uown chowm mang mih ning khe CHAKRAMANG dow Jeremia kowi tek pe mih,2“Ang CHAKRAMANG tek khowk, ang kowh chupiiara kim viadawng kowi kowiowng diah. Now Juda kowi kowh marow maten hownia nauang chupiia ang kownkow ang kowh chup kim kowi uang mih ang kowh maru-uüa maten kowi ang pe tek en mih laiklow maten tek pe diah. Laiklow panawrchow paw hangkow itta diah.3Amatni dow nami laiklow nasünta chepaw naia kown, now amatni kowh angakma mih tiama hownia nauang plan chepaw naia kown. Amatni che uang plan hanow amatni kowh ngak rakowi ang khowm bowkta mih piakra dow ang nauang pe tingah kown nadowi.4Amatni kowi dow maiawng en natek pe kown: CHAKRAMANG tek mih, ‘Enni dow ang laiklow sünta dowi chekhai, now enni pur kowi kowh ang towah mih ari aiang ün enni chün dowi chekhai.5Nami klen kowi ang nar risiuüa kowi dow enni tut-e plan plan ang uang chin enni khai. Nachenganchepaw amatni kowh laiklow dow enni sünta dowi chekhai.6Naiawng che enni chang rengreng hanow nami Thurai chup kim dow Silo marow kowi ang piakah iawng ang napiakah kown, now lusa kowi kowh maru maten dow Jerusalem marow ming hown nacham tape piati kown,’ pape diah,” pakhai.7CHAKRAMANG chup kim kowi naiawng Jeremia tek laiklow mih khin khe uamowuüa, risiuüa hai maru kawmuüa dow tawi sünta khai.8Tawkche aia ki tek lai kung kowi dow uamowuüa, risiuüa hai maru kawmuüa tek pe Jeremia mih, “En nakowng ngengche kown takla.9Tawngplawng kowchow CHAKRAMANG ming hown Silo marow piak iawng mami chup kim napiak kown mih en tuk tek khai? Tawngplawng kowchow nami Jerusalem marow napiak hanow akhaw aklaima nauowi kown mih en tuk tek khai?” pakhai. Naiawng tek rakowi maru kawmuüa dow CHAKRAMANG kowh chup kim kowi Jeremia kowi mih rumta lut khai.10Naiawngün laiklow ta hanow Juda pren kowi kowh maru iukuüa dow mang kim hownia CHAKRAMANG kim kowi kowkowi khai, now CHAKRAMANG kim kowi kupla mih Tapplawt Sar tiaplawt re-e hawt chowm khai.11Nakhowk khe uamowuüa hai risiuüa dow nami maru iukuüa hai maru kawmuüa kowi tek pe mih, “Nami maru dow kowngla kown mih ripra kak taing chekhai. Tawngplawng kowchow panow aia dow mami marow napiak kown mih lawnguan tek khai. Now naiawng aia tek mih dow enni matia param hown enni ta khowk chekhai,” pakhai.12Nakhowk khe Jeremia dow maru iukuüa hai maru kawmuüa kowi tek pe mih, “Mami kim hai mami marow lawnguan kowi kowh enni taah mih laiklow dow nauang tek kownkow CHAKRAMANG uang chin ang mih chekhai.13Naiawng rakowi kawmat dow enni kowh chowm krang uowi krang klingklaita büa diah, now lup iung chang büa diah. CHAKRAMANG enni kowh Thurai laiklow chün büa diah. Naiawng che enni chang hanow enni luk kowi aia nauang pawla enni piakra kownkow aia tekta khowk mih dow aia nachang kown nadowi bowt.14Sünta büa diah, ang dow enni rut kowi uowi hüah towbowt. Enni sak kowi iung iawng chang ang büah towbowt.15Tawkche enni che kowngta ang khai hanow aprek uowi dowi mih maru kowi enni kowngta mih ripra enni luk kowi, mami marow luk kowi hai makowi kowh uowi miuüa luk kowi nauang ting ngengche kown. Tawngplawng kowchow panow naiawngün laiklow enni tut-e nauang tek kownkow CHAKRAMANG uang chin ang mih chekhai,” pakhai.16Nakhowk khe maru iukuüa hai maru kawmuüa dow uamowuüa hai risiuüa kowi tek pe mih, “Nami maru dow kowngla pat mih ripra kak tataing dowi chekhai. Aia dow CHAKRAMANG a-i kowh Thurai ming hown a-i tut-e uang tek laiklow mih chekhai,” pakhai.17Nami kung kowi dow pren kowi kowh lawngtang aluchowuüa pungmadawng hownia kowkowi pre sum ia hanow takua talawm miuüa kowi tek pe mih,18“Juda pren kowi Hezekia chowm mang mih khin khe Mawreset marow hownia kowh risi Mika tek lai reng chekhai. Judauüa kowi aia tek pe mih,
“‘Mukuang siphaiuüa kowh CHAKRAMANG mih Zaiawn kowi laih iawng nalupah kown;Jerusalem marow dow mawngchawng kuakra nachowng kown,now Thurai chup kim kowi kowh hungh dow ruih namungta klum kown,’ pakhai.19“Risi iawng Mika krawi tek lai mih khin khe mang Hezekia hai Juda maru-uüa mih aia kowi saiah dowi chekhai. Nasaiah lak dow amatni kowh angak hownia uang plan büah khai, now CHAKRAMANG kowi chupiia büah khai. Naiawng rakowi CHAKRAMANG dow amatni luk kowi nauang chin pe ripra kownkow tekta khowk mih iawng uang chin pe dowi chekhai. Tawkche a-i dow a-i matia luk kowi phih kraingma a-i uang pawla khai,” pabüah khai.20(Nami khin khe Thurai satang phowng mih Uria pami maru uowi lowk ia. Uria dow Samaia kowh chapa chekhai. Aia kowh uowi rah dow Kiriat-Jearim marow kowi chekhai. Aia dow Jeremia iawng mami marow hai mami pren kowi kingküala mih laiklow tek khai.21Mang Jehoiakim, aia kowh siphai hai maru iukuüa dow Uria kowh laiklow tata khai. Nakhowk khe mang dow Uria kowi saita kown mih sangkrang khai. Tawkche Uria dow nami laiklow ta hanow kram kowh Aigupta pren kowi powt khai.22Nakhowk khe mang Jehoiakim dow Akbawr chapa Elnathan kowi Aigupta pren kowi kowchinah khai, now aia hown maru pre sum ia kowi paw mang krawi chin pe khai.23Amatni dow Aigupta pren hownia Uria kowi uang khümla hanow mang Jehoiakim tut-e uang pawla khai. Nahanow mang dow Uria kowi saidawng hown saiah khai, now aia kowh uak dow iawngpa mih maru tadupra kowi kuakta hüah khai).24Tawkche Safan kowh chapa Ahikam dow Jeremia prakowi tawi tangila khai. Naiawng rakowi Jeremia kowi dow nasaita kownkow maru kawmuüa rut kowi ap-ah dowi chekhai.
“‘Mukuang siphaiuüa kowh CHAKRAMANG mih Zaiawn kowi laih iawng nalupah kown;Jerusalem marow dow mawngchawng kuakra nachowng kown,now Thurai chup kim kowi kowh hungh dow ruih namungta klum kown,’ pakhai.19“Risi iawng Mika krawi tek lai mih khin khe mang Hezekia hai Juda maru-uüa mih aia kowi saiah dowi chekhai. Nasaiah lak dow amatni kowh angak hownia uang plan büah khai, now CHAKRAMANG kowi chupiia büah khai. Naiawng rakowi CHAKRAMANG dow amatni luk kowi nauang chin pe ripra kownkow tekta khowk mih iawng uang chin pe dowi chekhai. Tawkche a-i dow a-i matia luk kowi phih kraingma a-i uang pawla khai,” pabüah khai.20(Nami khin khe Thurai satang phowng mih Uria pami maru uowi lowk ia. Uria dow Samaia kowh chapa chekhai. Aia kowh uowi rah dow Kiriat-Jearim marow kowi chekhai. Aia dow Jeremia iawng mami marow hai mami pren kowi kingküala mih laiklow tek khai.21Mang Jehoiakim, aia kowh siphai hai maru iukuüa dow Uria kowh laiklow tata khai. Nakhowk khe mang dow Uria kowi saita kown mih sangkrang khai. Tawkche Uria dow nami laiklow ta hanow kram kowh Aigupta pren kowi powt khai.22Nakhowk khe mang Jehoiakim dow Akbawr chapa Elnathan kowi Aigupta pren kowi kowchinah khai, now aia hown maru pre sum ia kowi paw mang krawi chin pe khai.23Amatni dow Aigupta pren hownia Uria kowi uang khümla hanow mang Jehoiakim tut-e uang pawla khai. Nahanow mang dow Uria kowi saidawng hown saiah khai, now aia kowh uak dow iawngpa mih maru tadupra kowi kuakta hüah khai).24Tawkche Safan kowh chapa Ahikam dow Jeremia prakowi tawi tangila khai. Naiawng rakowi Jeremia kowi dow nasaita kownkow maru kawmuüa rut kowi ap-ah dowi chekhai.
The Seed Company