Jeremia22
1CHAKRAMANG mih Juda kowi kowh mang kim kowi kowchin ang hanow mami satang kowpe phowng ang khai:2“Aw David kowh mang chowm rah kowi chowm mih Juda pren mang, en, en kowh maru iukuüa hai Jerusalem tapplawt iawng uang miuüa maten CHAKRAMANG kowh laiklow sünta büa diah.3CHAKRAMANG tek mih, ‘Anowmma mih hai anama mih lup chang büa diah. Maru pawta pe dawngthawnguan mih maru kowi nowng chang powng chang miuüa rut hownia lawngah büa diah. Prenlang maru-uüa, saratchowuüa hai mamaimowuüa luk kowi hang chang anowng apowng büa diah, now nami Jerusalem marow kowi kowh aprek uowi dowi mih maru-uüa kowi hangkow sai büa diah.4Naiawngün ana che enni chün khai hanow enni kowh manguüa mih mang David kowh mang chowm rah hownia naia kruitown pren kown. Now enni kowh manguüa mih amatni kowh maru iukuüa hown, iawngpa mih maru-uüa hown, kawrnga kari hai kawrnga hown nami Jerusalem marow tapplawt iawng mang kim kowi nauang kup büah kown.5Tawkche ang kowh ana che enni chün dowi hanow mami mang kim dow natapiak kown. Mami laiklow mih ang CHAKRAMANG ang ming lüklau se ang takham khowk,’ pape diah,” pakhai.6Juda pren kowi kowh mang kim lawnguan kowi CHAKRAMANG tek mih,“Ang tut-e en mih Gilead süng iawng hai Lebanawn hungh chut iawng chepawsüngrüp süngkangma hai apiaknama mih marow iawng ang nachang en kown.7Napiak en kownkow ransu-uüa kowi ang nauang chin en kown,naiawngün ransu-uüa rut kowi dow tasen müa rutchün khawkleng nauowi bowk kown.Amatni dow en kowh aiung aiungma mih sidar singh ün nakripta en hanow natowkta en kown.8“Nami marow ria iawng kowmang kowkat mih khin khe prenlang maru-uüa dow lowkkowlowk natalünta kown mih, ‘Tawngplawng kowchow mami kri kraingma mih marow kowi maiawng CHAKRAMANG tuk changah khai?’ napa kown.9Nakhowk khe amatni kowi akeng maru-uüa naklangah kown mih, ‘Naiawng phaw mih dow CHAKRAMANG amatni kowh Thurai sangbowk laitawm nuata hanow akeng thurai kowi cham tawi chupiiara kowi chekhai,’ napape kown,” pakhai.10Mang Josia kowng mih vüi kowi hangkow kar büa tham bowt,nami lak-e mang Jehoahaz vüi kowi phai kar büa diah.Tawngplawng kowchow panow aia dow prenlang kowi cham takhang khai bowt;aia dow katpaw nauang plan kown nadowi bowt,now aia kowh dia rah pren paw aia nakhi kown nadowi bowt.11Josia kowh chapa dow Salum chekhai. Salum kowh ming uowi lowk tak mih dow Jehoahaz chekhai. Aia dow a-pa kowng kung kowi Juda pren kowi ta chowm mang khai. Tawkche aia dow Jerusalem marow hownia powt khai. Naiawng rakowi aia lawnguan kowi CHAKRAMANG tek mih, “Aia dow katpaw nauang plan kown nadowi bowt.12Aia dow aia cham takhangra kowi nakowng kown. Mami pren dow aia nauang khi kown nadowi bowt,” pakhai.13CHAKRAMANG tek mih, “Mang Jehoiakim chowng kowi piakra nauang ting kown mih dow kramra uowi lai kowbow!Tawngplawng kowchow panow aia dow lup ngak chang hown kowh tangka hown thawp kim khai.Krawi ling krawi kuanla mih tangka pawisa hown aia dow krowngla kim khai;aia dow nami kim mih maru-uüa kowi peah akha dowi kowi kür hown pe changah khai.14Maiawng tek mih maru luk kowi piakra nauang ting kown mih dow kramra uowi lai kowbow!Aia dow, ‘Ang matia vüi kim iukma ang nathawp lowk kown,nami kimkrowng luk kowi dow towklak aiukma ang nathawp pe kown.Nami towklak kowi dow tawngpawk aiukma ang nachang pe kown,nami tawngpawk kep müa ün dow sidar singh ang nangen pe kown,now aringma mih rawng ang nasowah kown,’ pakhai.15Sidar singh ahuma hown en chang kim khai pacheakeng mang lak-e en lang iung khai pabow?En pa Josia dow aiungma mih chakkham cha reng chekhai,aia dow anowmma hai anama mih lup chang reng chekhai.Naiawng rakowi aia chowm mang mih khin khe lup maten aiungma phaw khai.16Aia dow ngarai miuüa hai akhawr hown uowi miuüa kowi tangila rakowi aiungma uowi reng.CHAKRAMANG kowi tuk pami dow naiawng chang mih chekhai.17Tawkche en kowh mik hai sak dow lup ngak chang hown naka kown mih prakowi kangowh chekhai,now achinawmma mih maru kowi nasai kown mih prakowi kangowh chekhai.Nami klen kowi nakrawi chang nowng kown mih prakowi kangowh chekhai,now kür hown nakrawi rup maru uanh kown mih prakowi kangowh chekhai,” pakhai.18Naiawng rakowi Juda pren mang Josia kowh chapa Jehoiakim lawnguan kowi CHAKRAMANG tek mih,“Mang Jehoiakim vüi auiua kowi iawng maru nanguk nakar pe kown nadowi,maru kawmuüa mih amatni kowh mang vüi kowi nakar nanguk kown nadowi.19Jehoiakim kowi dow kawrngaramchük kowi dupah iawng maru nadupah kown,aia kowi dow küngla now Jerusalem marow tapplawt uat kowi nacham kuakah kown,” pakhai.20CHAKRAMANG tek mih, “Aw Jerusalem, Lebanawn hungh kowi atünma kowkar diah,Basan hai Abarim kowi kowkowi hanow kowkar diah.Tawngplawng kowchow panow en kowh auiuauüa mih piak bowk khowk chekhai.21Aiungma en uowi mih khin khe nauowi kaneu kown mih ang tek en khowk chowdiah.Tawkche en tek mih, ‘Ang sünta kown nadowi,’ pakhai.En dow en klanguüa tadowklowt hownia ang laiklow en sünta dowi chekhai.22En kowi dow li uang khe kowh iawng alenma ang nauang rip en kown;nami li dow en kowh aluchowuüa kowi nacham rownla bowk kown,now en kowh auiuauüa dow akeng pren kowi nacham takhang bowk kown.Nakhowk khe en kowh lup ngak rakowi en narukrai kown.23Aw Lebanawn hungh kowi kowh sidar singh hown thawpah mih kim kowi uowi mih maru,en luk kowi dow penchow kimuowi mu rau iawng mih ngarera nauang ting kown.Nami khin khe dow lainowmma en napla kown!” pakhai.24CHAKRAMANG tek mih, “Aw Juda pren mang Jehoiakim kowh chapa Jehoiakhin, ang ming lüklau se ang tek khowk, ang hawmlawm rut kowi kowh mur tuk müa rutbüt en chowng chepaw ang naklüpta en hanow nakuakta en kown.25En kowi dow paw en asak kownkow en kramah mih Babulawn pren mang Nebuknezar rut kowi hai Babulawn prenchakuüa rut kowi ang naap en kown.26En hai en u enchi kowi dow akeng pren kowi ang nacham kuakta enchi kown. Nami pren kowi dow amiapaw enchi dia dowi chekhai. Enchi dow nami pren kowi nakowng kown.27Enchi uang planah kown nau mih pren kowi dow katpaw enchi nauang ia plan kown nadowi bowt,” pakhai.28Jehoiakin dow teu kowh kuakta mih puh iawng chekhai,aia dow maru nauah dowi mih puh iawng chekhai.Tawngplawng kowchow Jehoiakin hai aia kimchakuüa kowi nakuakta kown?Tawngplawng kowchow amatni kowi akeng pren kowi nacham kuakta kown?29Aw prenchakuüa, prenchakuüa, prenchakuüa,CHAKRAMANG kowh laiklow sünta diah.30CHAKRAMANG tek mih, “Jehoiakhin lawnguan kowi kowh naiawngün laiklow mih ruiah diah:Aia dow ka chah dowi mih maru iawng nauowi kown,aia chownglawng kowi dow katpaw aiungma naphaw kown nadowi,now aia kowh chauüa dow mang David kowh mang chowm rah kowi katpaw naia chowm kown nadowi,” pakhai.
The Seed Company