Jeremia21
1Akung kowi CHAKRAMANG kowh laiklow dow risi Jeremia tut-e uang ting khai. Nami khin khe mang Zedekia dow Pasur hai uamow Zefania iüah kowi maiawng nakowtek pe kownkow Jeremia tut-e kowchinah khai. Pasur dow Malkija kowh chapa chekhai, now uamow Zefania dow Maseia chapa chekhai. Amatchi dow Jeremia kowi tek pe mih,2“Babulawn pren mang dow uang sen anging khai. Naiawng rakowi en mih anging vüi kowi CHAKRAMANG tut-e awr lü anging khowng diah. CHAKRAMANG dow auown khe kowh iawng anging vüi natüng anging awdara lup chepaw naia kown. Aia dow Babulawn pren mang uang sen anging mih taingta anging chepaw naia kown,” pakhai.3Amatchi kowi Jeremia tek pe mih, “Mang Zedekia tut-e kowplan hanow maiawng kowtek pe diah:4CHAKRAMANG Israeluüa kowh Thurai tek mih, ‘Babulawn mang hai aia kowh siphaiuüa hown en natasenla kown mih en kowh tasen müa rutchün khawkleng asung uowi dowi iawng ang nachangta en kown. Naiawngün ransu-uüa kowi dow marow kowi arasang ang nakuaah kown.5En kowi dow ang kowh akürma mih rut parah khükhü ang sak-ih dowi mih hown, ang kowh kunmaraura matiow hown ang nasen en kown.6Now mami marow kowi kowh uowi mih maru hai tawncher kowi dow makowng hawi hown ang napiakta bowk kown.7Now nami makowng hawi, tasen hai khown hown kowh tawi kowng dowi mih Juda pren mang, aia kowh maru iukuüa hai nami marow kowi kowh maru maten kowi dow Babulawn pren mang Nebuknezar rut kowi hai amatni kowi kowngta kown nau mih ransu-uüa rut kowi ang naap-ah kown. Amatni kowi dow mang Nebuknezar mih nasaiah kown. Aia dow amatni kowi mapaw nasaksing sanaah kown nadowi. Ang CHAKRAMANG mami laiklow ang tek khowk,’ pape diah,” pakhai.8Jeremia kowi CHAKRAMANG tek pe mih, “Maru kawmuüa kowi maiawng tek pe diah: CHAKRAMANG tek mih, ‘Sünta büa diah, enni pur kowi dow masing tiama hai makowng tiama ang towta enni khowk.9Jerusalem marow kowi kowh uowi miuüa dow tasenra kowi lah, khown hown lah, makowng hawi hown lah nakowng kown. Tawkche marow uat kowi lawt hanow amatni kowi kowh senah mih Babulawnuüa tut-e kowtaap mih dow nasing kown. Amatni kowh asak dow naplai kown.10Ang dow mami marow kowi aiung nadowi kowi angak nachang kown mih ang khowm bowkta khowk. Mami marow dow Babulawn pren mang rut kowi ang naap-ah kown. Aia dow nami marow mih maih hown towkah kown,’ pape khai.11“Nami klen kowi Juda pren kowi kowh mang krungchakuüa kowi paw mami ang kowh laiklow pe süntaah diah. Ang tek mih,12“‘Aw David krungchakuüa, ang CHAKRAMANG tek khowk;enni mih rau towng chet tara nowm büa diah,now maru pawta pe dawngthawnguan miuüa kowi nowng chang miuüa rut hownia lawngah büa diah.Naiawng enni chang dowi now enni kowh lup ngak rakowi ang kowh kunmaraura nalün pluplup kown.Nami kunmaraura maih iawng lün pluplup mih dow amiapaw nanowng mit kown nadowi.13“‘Aw Jerusalem, en dow lawngrawi luk kowi kowh hungh chut iawng chekhai,en dow anaima mih arah luk kowi kowh tachowm hüah mih hua iawng chekhai.Nachenganchepaw en kowi mih ang nakingküa en kown.En tek mih, “Miapaw uang ia kingküa ang kown nadowi,now ang kowh tatung tanimra kowi miapaw uang nowng kup kown nadowi,” pakhai.14Tawkche en chang lup ngak rakowi ang narip en kown;en kowh süng ün dow maih hown ang natowkta en kown,now nami maih dow en riaret kowi uowi mih maten nakamta en bowk kown.Ang CHAKRAMANG mami laiklow ang tek khowk,’ pape diah,” pakhai.
The Seed Company