Jeremia23
1CHAKRAMANG tek mih, “Ruapur hawmh iawng mih ang kowh maru kowi piak mih hai cham setta plawt mih kruitown miuüa kowh piakra dow kramra uowi lai kowbow!” pakhai.2Naiawng rakowi CHAKRAMANG Israeluüa kowh Thurai dow aia maru-uüa kowh kruitown miuüa lawnguan kowi tek mih, “Enni dow ang kowh ruapur hawmh iawng mih maru-uüa kowi setta plawt khai, now amatni kowi enni prütah khai. Amatni kowi dow enni mingkhetah kaneu dowi chekhai. Naiawng rakowi ang narip enni kown.3Tawkche ang cham setta plawt mih pren hownia ang kowh maru-uüa kowi dow amatni kowh tawkra süng kowi ang nauang pawla kown. Nakowi dow amatni krungchak naprung kown, now amatni maru iun dow ahuma nauang phaw kown.4Amatni kowi dow naming nakhetah kownkow ang natow pe kruitown miuüa kown. Nahanow ang kowh ruapur hawmh dow nakram kown nadowi bowt, amatni dow amawlawma naphaw kown nadowi bowt, now natamata ang büah kown nadowi bowt. Ang CHAKRAMANG mami laiklow ang tek khowk,” pakhai.5CHAKRAMANG tek mih, “Maiawng mih khin nauang ting kown. Nami khin khe dow David krungchak hownia Achinawmma mih Mia Prek kowi ang nape chowmah mang kown. Aia dow prengia hown nakruitown pren kown, now pren kowi anowmma hai anama nachang lup kown.6Nami khin khe Judauüa dow naka lawngra kown, now Israeluüa dow athaulangma nauowi kown. Aia kowi dow, ‘CHAKRAMANG dow anging kowh tachi tanawmra chekhai,’ pahai maru nahawah kown.7“Maiawng mih khin nauang ting kown. Nami khin khe dow, ‘Aigupta pren hownia Israeluüa kowi uang lawtla mih masing CHAKRAMANG ming lüklau se ang tek khowk,’ pami maru natek kown nadowi bowt.8Nami takcha amatni dow natek kown mih, ‘Mrawkphak pra kowh pren hai akeng pren kowi cham prütta mih hownia Israeluüa kowi uang pawla iawk mih masing CHAKRAMANG ming lüklau se ang tek khowk,’ napa kown. Nami kung kowi amatni dow amatni chowlowkkow pren kowi nauowi büah kown,” pakhai.9Risiuüa kowi napiakah kown mih lawnguan kowi CHAKRAMANG tekah mih laiklow ta hanow lainowmma ang sak piak khai,now ang kowh hut maten chür nukluk chekhai.Nami CHAKRAMANG kowh chimsaima mih laiklow rakowiang dow khamta grep tui kak kowh pua dikma mih maru iawng phaw khai bowt.10Pren kowi dow iang chang miuüa tek khai bowt;ka piati rakowi pren dow uowila uiting uangtak khai bowt,now süngrüp süngkangma kowi kowh dowm dow akang khawngma phaw khai bowt.Maru kawmuüa dow angakma mih tiama kowi mang khai bowt,amatni kowh nowng changra dow angak prakowi tawngah büah khai.11CHAKRAMANG tek mih, “Risi hai uamowuüa mih ringkaw hai kram ang dowi chekhai,amatni kowh angak dow ang kim kowi pat ang khi khai.12Naiawng rakowi amatni kowh tiama dow aklaima hai aiiuma ang nachang pe kown,nahanow amatni dow nakowi natim kown.Amatni ka ripra mih khin khe amatni luk kowi ang nauang pawla pe phih kown.13Samari kowi kowh risiuüa dow suiiai kaniaima mih lup chang mih ang khi khai,amatni dow Baal thurai ming hown risi iawng krawi tek dai lai khai.Naiawng rakowi ang maru Israeluüa dow ang hownia alakma kowi powtta ang khai.14Nami klen kowi Jerusalem marow kowi kowh risiuüa kramra uowima mih lup ngak chang mih ang khi khai,amatni dow chang iang khai, now krawi dai maru khai.Amatni dow angak chang miuüa kowi tawi peah sakkhawtra khai;naiawng rakowi chang ngak miuüa dow angak hownia amiapaw uang plan dowi chekhai.Amatni dow chang lup ngak khai,amatni dow Sawdawm hai Gawmawra maru-uüa iawng chekhai,” pakhai.15Naiawng rakowi risiuüa lawnguan kowi mukuang siphaiuüa kowh CHAKRAMANG tek mih,“Amatni kowi dow akhakma mih chakkham ang nape chaah kown,now akru uowima mih tui ang nape khamah kown.Tawngplawng kowchow panow Jerusalem marow kowi kowh risiuüa kowh angak dow paprenma kowi krawi tauet khai bowt,” pakhai.16Aia maru-uüa kowi mukuang siphaiuüa kowh CHAKRAMANG tek pe mih, “Risiuüa tekah mih laiklow hangkow sünta büa diah. Amatni dow dai lai hown pe enni sakowmra khai. Amatni dow CHAKRAMANG kowh laiklow ta kowh tek enni mih nadowi chekhai. Amatni krawi tek enni mih dow sakdawng hownia kowh amatni thawnah mih mukmang laiklow chekhai.17Ang kowh laiklow sui miuüa tut-e naiawngün risiuüa dow maiawng krawi tek khai: CHAKRAMANG tek mih, ‘Enni dow thaulangma nauowi kown’ pakhai. Now saktuak akhawtma hown uowi miuüa kowi amatni tek pe mih, ‘Enni nakla phih kown nadowi,’ pakhai,” pape khai.18Tawkche naiawngün risiuüa mih CHAKRAMANG laiklow nasünta hai natukta kownkow amiapaw aia pur kowi iowng dowi chekhai,now aia kowh laiklow kowi miapaw pe param dowi hai miapaw pe ching dowi chekhai.19Sünta, CHAKRAMANG kowh kunmaraura dow liku iawng maru ngak luk kowi nauang kla kown,now nami dow liku uangchak iawng amatni luk kowi nauang kla kown.20Ang kowh kunmaraura dow sak ta-ih iawng changta dowi mowr naprowng kown nadowi.Nami dow pur prakowi achima enni natuk kown.21CHAKRAMANG tek mih, “Naiawngün risiuüa kowi ang chinah dowi.Nachenganchepaw amatni dow amatni sak nau iawng krawi küa dai khai.Amatni kowi dow ang pe tekah laiklow dowi.Nachenganchepaw amatni dow risi iawng krawi tek lai khai.22Amatni che ang pur kowi uang iowng khai e dow ang kowh laiklow ang maru-uüa tut-e amatni nakowtek diah,now amatni kowh tiama ngak hownia ang maru-uüa mih nauang plan diah,” pakhai.23CHAKRAMANG tek mih, “Ang dow atawnchow mih Thurai paw na chekhai, now alakma mih Thurai paw na chekhai.24Ang khi-ah dowi mih arah kowi amiapaw nowngia tapet dowi chekhai. Ang dow mukuang pren hai lusa kowi kowh bowkbowk mih arah kowi krawi uowi reng chekhai.25“Ang ming hown kowh krawi dai mih risiuüa kowh laiklow dow ang ta khowk chekhai. Amatni tek mih, ‘Ang khi mang lowk, ang khi mang lowk,’ pakhai.26Mün ni tak chow naiawngün risiuüa amatni saktuak hown nakrawi dai maru kown?27Amatni kowh pipu-uüa dow Baal thurai kowi cham chupiia mih hownia tamata ang büah khai. Nami iawng ang maru-uüa paw pacham tamata ang lah pakowh naiawngün risiuüa dow amatni kowi dai lai mukmang hown nakuanah kown mih sangkrang büah khai.28Khi mang miuüa dow amatni khi-ah mih mang iawng pacham tek lah. Tawkche ang laiklow ta miuüa dow kaah sakowmma hown ang kowh laiklow pacham tek lah. Tawngplawng kowchow panow chama hai chahau dow alangma chekhai.29Ang kowh laiklow dow maih iawng nadowi bow? Ang kowh laiklow dow bawpla hua reng mih matul iawng nadowi bow?30“Akeng mih maru hownia kuah mih laiklow ang kowh laiklow pahai krawi phuang mih uowi. Naiawng mih maru-uüa kowi dow ang nakingküaah kown.31Amatni kowh laiklow kowi CHAKRAMANG kowh laiklow pahai küa dai mih risiuüa kowi dow ang nakingküaah kown.32Krawi tek dai lai mang mih risiuüa kowi dow ang nakingküaah kown. Amatni dow abawrima hown krawi tek dai lai hanow ang kowh maru-uüa kowi angak tiama prakowi pawla khai. Tawkche amatni kowi dow ang chinah mih nadowi, now naiawng nakrawi tek kown mih paw ang peah ana dowi chekhai. Amatni dow Judauüa kowi tawng iawng paw naia khowng kown nadowi. Ang CHAKRAMANG mami laiklow ang tek khowk.33“Maru-uüa, risiuüa hai uamowuüa nalünta en kown mih, ‘CHAKRAMANG tawng chow tek en?’ Napa kown. Nakhowk khe amatni kowi en natek pe kown mih, ‘CHAKRAMANG tek mih, “Enni dow ang kowh kurdik chekhai, now nami kurdik dow ang hownia ang nakuakta kown,” pape diah,’ pakhai.34Risi, uamow hai maru-uüa mih, ‘CHAKRAMANG kowh laiklow dow anging vüi kurdik chowtaih,’ pahai tek chepaw naia. Tawkche naiawng tek mih maru kowi hai aia kimchak kowi dow ang naripah kown.35“Nami takcha amatni bowkbowk dow amatni kowh auiuauüa hai tasin taken miuüa kowi nalüntaah kown mih, ‘CHAKRAMANG tawng iawng chow klang enni? Tawng chow aia tek enni?’ napape kown.36Naiawng rakowi, ‘CHAKRAMANG kowh laiklow dow anging vüi kurdik chowtaih,’ pahai katpaw natek büah kown nadowi bowt. Tawngplawng kowchow panow lusa maru dow kowmatia kowh laiklow kowi changla Thurai kowh laiklow khai. Naiawng hai mukuang siphaiuüa kowh CHAKRAMANG masing Thurai kowh laiklow dow enni klowiah khai,” pakhai.37Nami kung kowi CHAKRAMANG tek ang mih, “Risi iawng krawi tek lai mih maru kowi en lüntaah kown mih, ‘Tawng iawng chow CHAKRAMANG klang en? Tawng iawng chow aia tek en?’ pape diah.38“Naiawng chepaw amatni che ang hangah mih kowi chün dowi kowi, ‘Mami dow CHAKRAMANG kowh laiklow chekhai,’ pahai kham khai hanow39ang pur hownia amatni kowi ang nakuakta kown, now amatni hai amatni pipu-uüa kowi kowh ang peah mih marow paw ang napiakta kown.40Amatni luk kowi dow ang nauang pawla pe rukraira kown. Nami rukrai dow chowngchowng saksakma maru sak kowi nauowi reng kown, now katpaw natamata kown nadowi bowt,” pakhai.
The Seed Company