Jeremia20
1CHAKRAMANG chup kim re-e risi iawng Jeremia krawi tek lai mih khin khe Imer chapa Pasur dow tawi ta khai. Aia dow CHAKRAMANG chup kim kowi kowh uamow lang kri mih chekhai.2Aia dow risi Jeremia kowi bawpah khai, now CHAKRAMANG chup kim kowi kowh Benjamin tapplawt re-e kowh arah lowngma mih kangchawngra kim lak kowi tawmta hüah khai.3Auai ni khe Pasur dow Jeremia kowi uang latta khai. Nakhowk khe Pasur kowi Jeremia tek pe mih, “CHAKRAMANG mih klowita en ming khai bowt. Pasur pami takcha kawmat dow en ming mih Magawr-Misabib chowbowt. Auan dow ‘Aria aret kowi kramra kangowh’ pami chekhai.4Tawngplawng kowchow panow CHAKRAMANG tek mih, ‘En kowi dow en matia tut-e hai en auiuauüa tut-e kramra uowima mih maru ang nachang en kown. Tasenra kowi ransu-uüa rut kowi Judauüa kowng mih en nakhi kown. Judauüa maten kowi dow Babulawn pren mang rut kowi ang naap-ah kown. Amatni kowi dow aia mih Babulawn pren kowi napawla kown, now pawla dowi miuüa kowi dow aia nasaita kown.5Nami klen kowi mami marow kowi kowh luprak, asung khakma mih uanh hai Juda manguüa kowh dawngthawnguan towk rah kim kowi kowh uanh maten dow ang napawta pe kown, now naiawngün dawngthawnguan dow amatni kowh ransu Babulawnuüa rut kowi ang naap-ah kown. Amatni dow naiawngün dawngthawnguan mih Babulawn pren kowi napawla kown.6Aw Pasur, en kowi hai en kimchakuüa maten kowi khümla now Babulawn pren kowi ang napawla enni kown. Nakowi dow en nakowng hanow nadup en kown. Nami klen kowi en daiah mih en kowh auiuauüa paw en iawng napiak kown,’ pakhai,” pape khai.7Aw CHAKRAMANG, en kuan ang khai,now ang lak-e en lang kür khai rakowi en awng khai.Ang dow ni chut maru kowh rensi küakau chowng khai bowt.Naiawng rakowi ang kowi dow maru maten prawngren ang khai bowt.8Ang tek laiklow mih khin khe irsira lawnguan kowi ang phuang reng chekhai,now piakra lawnguan kowi paw atünma ang phuang reng chekhai.Naiawng CHAKRAMANG kowh laiklow ang krawi tek reng chekhai.Naiawng rakowi atungma maru pe ang rukrai hai prawngren ang khai.9“CHAKRAMANG ming ang rük dowi bowt,now CHAKRAMANG ming hown paw ang krawi tek lai dowi bowt,” pahai ang tek chepaw naia kown.Tawkche aia kowh laiklow dow ang sak kowi maih iawng lün pluplup khai;nami dow hut kowi paw maih iawng lün pluplup khai.Aia kowh laiklow dow sak kowi ang towah rengreng kowh ang kawm khai bowt.Nami dow ang sak kowi ang ia tow dowi bowt chekhai.10Ang lawnguan kowi maru kawmuüa ku tatek laisin mih ang ta;naiawngün laiklow mih ang ta hanow ang kram khai.Ang auiuauüa paw kingküa ang khai,amatni dow ang natim kown mih kowi chawng büah reng chekhai.Amatni tatek mih, “Chu, aia dow angakma mih lup chang khai pahai a-i küa dai lah;naiawng che a-i chang hanow aia kowi a-i naiata kown,now a-i naia sat klai kown towbowt,” pakhai.11Tawkche CHAKRAMANG dow tasen kiakma mih maru iawng tawi uowila ang reng;naiawng rakowi chang ang nowng powng miuüa dow natatheu kown,now amatni dow nasum kown.Amatni dow sum hanow narukrai kown,amatni ka rukrai mih dow amiapaw natamata kown nadowi.12Aw mukuang siphaiuüa kowh CHAKRAMANG,en dow achinawmma miuüa kowi chaingah reng chekhai,now maru sak hai saktuak dow en tuk bowk chekhai.Ang kowh ransu-uüa luk kowi en sat klai mih dow pe khi ang diah.Tawngplawng kowchow panow ang dow en tut-e uang chawk lai khowk chekhai.13CHAKRAMANG vüi kowi tek meng büa diah,CHAKRAMANG kowi kiow büa diah.Aia dow maru ngakuüa rut hownia ngarai miuüa kowi lawngah reng chekhai.14Ang uang dia mih ni dow pacham ka piati lah,au uang pen ang mih ni dow prasira hang pacham uowi lah.15“En ka chapa lowk ia khowk,” pami satang hownapa kowi pe awmrawmah mih maru dow pacham ka piati lah.16Nami maru dow CHAKRAMANG saksing sanaah dowi kowipiakta mih marow iawng pacham phaw lah.Aia dow rau-e khe pacham ta kar klow lah,now sat downg khe dow tasen khe kowh maru hek klow plak klow pacham ta lah.17Tawngplawng kowchow panow mu lak kowi ang uowi reng tak khe kowngta ang dowi chekhai;kowngta ang khai panü ang kowh tadupra mih au mu lak kowi towbowt diah,now katpaw ang uang dia dowi bowt tham diah.18Kratra hai ngarera nakhi kownkow tawngplawng kowchow mu lak hownia ang uang tuk dia khai?Mami lusa kowi ang khi mih srui dow krat pusara kangowh chekhai,now ang kowh chownglawng nachur kown mih dow kratra hai rukraira hown chekhai.
The Seed Company