Jeremia19
1CHAKRAMANG tek pe Jeremia mih, “Bawn hown kowh uanh thawp sara tut-e kowi now kowran bawn puh lowk diah. Nami puh en kowran mih khin khe lawngtang aluchow hai uamow lawngtang kowi hawla pre sum ia diah.2Nami kung kowi dow Puh Teu Tapplawt kupra tiama re-e kowh Ben-Hinawm lawngrawi kowi kowkowi diah. Nakowi dow ang pe tek en mih laiklow kowtek diah.3En natek pe kown mih, ‘CHAKRAMANG tek mih maiawng: Aw Juda manguüa hai Jerusalem marowchakuüa, ang mukuang siphaiuüa kowh CHAKRAMANG, Israeluüa kowh Thurai laiklow sünta büa diah. Nami lawngrawi kowi dow ang nauang pawla phih kown, now nami laiklow ta miuüa dow kram kowh pikchu narü kown.4Tawngplawng kowchow panow Israeluüa dow nuata ang khai, now amatni dow nami lawngrawi kowi akeng thuraiuüa chupiiara changla büah khai. Amatni dow amatni pipu-uüa hai Juda manguüa tukah dowi mih arup aren kowi cham towk nam iungma mih maikhük büah khai. Nami klen kowi amatni kowh chauüa hown paw chang phuchua büah khai. Naiawng hai nami arah dow aprek uowi dowi miuüa vi kangowh changah büah khai.5Amatni dow Baal thurai vüi arah kroma mih kowi kowh chupiiara thawp lowk khai, now nami phuchuara kowi dow amatni kowh chauüa kowi nawmah büah khai. Tawkche naiawng nachang kown mih amatni kowi ang peah ana dowi chekhai. Naiawng natek kown mih sak kowi khowm ang ka tuak dowi chekhai.6Naiawng rakowi maiawng mih khin nauang ting kown. Nami khin khe dow mami arah kowi mih Tofet phuchuara pahai maru natek kown nadowi bowt, now Ben-Hinawm lawngrawi papaw natek kown nadowi bowt. Tawkche Maru Saira Lawngrawi padow maru natek bowt kown.7“‘Judauüa hai Jerusalem maru-uüa kowh sangkrangra dow mami arah kowi ang napiakta pe kown. Krawi paw asak kown nau miuüa kowi dow tasenra kowi ransu-uüa rut kowi ang nape kowngah kown, now amatni kowh uak dow uakling hai kaurawng uaramchak hawmh kowi ang nape cha kown.8Nami Jerusalem marow dow ang napiakta kown, now ang nachangla rensi küakau kown. Nami marow ria iawng mang miuüa dow naiawng piak mih khi hanow nakram kown, now naprawng narenah kown.9Amatni kowi kowh saiah kown nau mih amatni kowh ransu-uüa dow amatni kowi narumta lut kown. Nami khin khe amatni dow chakkham uowi dowi rakowi amatni kowh chauüa kowi nacha büah kown, now amatni kowh kimping namkhetuüa kowi paw nacha büah kown,’ pape diah.10“Nami kung kowi dow en hown kowh tawi uowi mih lawngtanguüa pur kowi nami bawn puh mih en nateuah iawm kown. Nakhowk khe amatni kowi maiawng en natek pe kown: CHAKRAMANG tek mih, ‘Nami teuta mih puh nowng chawk dowi mih iawng Juda maru-uüa kowi dow ang napiakta nak kown. Tofet süng uowi mowr amatni kowh uak dow maru nadupah kown.12Nami marow hai nakowi kowh uowi miuüa kowi dow Tofet kowi iawng ang napiakah kown.13Jerusalem kowi kowh kim maten hai Juda manguüa kowh kim ün dow Tofet iawng sürlawkma naphaw kown. Tawngplawng kowchow panow amatni kowh kimluk kowi dow sat, lama hai krek vüi kowi nam iungma mih maikhük towk büah khai, now akeng thurai vüi kowi hüngah mih uanap paw chang büa khai,’ pakhai,” pape diah.14Nami kung kowi Jeremia dow Tofet hownia uang mang khai bowt. Jeremia kowi nakowi CHAKRAMANG kowchinah mih dow aia kowh laiklow nakowtek kownkow chekhai. CHAKRAMANG kim viadawng kowi awr iowngah hanow maru kawmuüa kowi Jeremia tek pe mih,15“Mukuang siphaiuüa kowh CHAKRAMANG tek mih, ‘Sünta büa diah, Jerusalem marow hai aria aret kowi kowh kua maten luk kowi phih uang kla kown mih lawnguan kowi ang tekta khowk iawng nauang phaw kown. Tawngplawng kowchow panow amatni dow saktuak khawtma uowi khai, now ang laiklow sünta dowi chekhai,’ pakhai,” pape khai.
The Seed Company