Jeremia15
1Nakhowk khe CHAKRAMANG tek ang mih, “Judauüa vüi kowi Mosi hai Samuel iüah ang pur kowi kar chepaw amatni kowi dow ang nasaksing sanaah kown nadowi. Judauüa kowi dow ang pur hownia prütta diah; amatni pacham powt lah.2Nakhowk khe amatni dow, ‘Tawng kowi chow anging napowt kown?’ pahai nalünta en kown. Nakhowk khe amatni kowi dow ang CHAKRAMANG ang kowh laiklow maiawng en natek pe kown,“‘Nakowng kownkow khowm bowkta khowk miuüa dow nakowng kown;saidawng hown nakowng kownkow khowm bowkta khowk miuüa dow tasenra kowi nakowng kown.Khown hown nakowng kownkow khowm bowkta khowk miuüa dow khown hown nakowng kown,now nar kowi uowi kown khowm bowkta khowk miuüa kowi dow maru nakhümah kown,’ pape diah,” pakhai.3CHAKRAMANG tek mih, “Amatni luk kowi dow piakra tali chaing ang nauang chin pe kown. Naiawngün dow amatni kowi nasaiah kownkow saidawng dowkma mih ransu siphaiuüa kowi ang nauang chin pe kown. Amatni uak naküngla kownkow kui hawmh kowi ang nauang chin pe kown. Amatni kowi dow uakling uaber hawmh nachaah kown, now ta lat miuüa kowi dow kaurawng uaramchak hawmh nachaah kown.4Juda pren kowi Hezekia kowh chapa Manase chowm mang mih khin khe Manase dow Jerusalem marow kowi chang angak khai. Naiawng rakowi aia kowh maru-uüa kowi dow ang naripah kown. Naiawng ang ripah mih khi hanow lusa maru maten nakram kown.5“Aw Jerusalem, amia chow nasaksing sana en kown?En vüi amia chow nakar nanguk kown?Tawng iawng chow en uowi mih amia chow nauang lünta en kown?6Ang CHAKRAMANG tek khowk, en dow nuata ang khai,now tiama ngak prakowi en cham mang khai.Naiawng rakowi ang kowh rut hown ang napiak en kown,en kowi dow ang nasaksing sana en kown nadowi.7Ang maru-uüa kowi dow marow tapplawt re-e chapli iap iawng ang naiapah kown,ang maru-uüa luk kowi dow chapa kowng mih taprüa tangukra ang nauang pawla pe kown.Ang maru-uüa kowi dow ang napiakah kown.Tawngplawng kowchow panow amatni dow ang prakowi uang plan dowi chekhai.8Juda pren kowi dow mamaimow akawmma ang nachangah kown;amatni kowi dow sata pang kowi kowh sema lak-e hu ang nachangah kown.Klanguüa hawmh kowi ang nasaita pe hanow u-uüa kowi ang nauang pawla pe kawm kratra kown.Amatni luk kowi dow takrow takraira hai akrat pusara amaisang ang nauang pawla pe kown.9Chah uowi ranit ia mih masiuüa dow namaw kown;sat uowi reng tak chepaw amatni tut-e uar naiiu bowt kown.Amatni dow chah uowi dowi mih rukrai hown nachowm phulu kown.Ta sing uowi miuüa kowi dow ransu-uüa kowh saidawng kowi ang naap-ah kown.Ang CHAKRAMANG mami laiklow ang tek khowk,” pakhai.10Uh! A-u, tawngplawng kowchow mami lusa kowi en tuk pen ang khai? Ang kowi dow lusa kowi kowh maru maten kingküa ang khai, now amatni dow sen ang khai. Ang dow cham paw lowi dowi chowdiah, now maru paw pe ang lowi dowi chowdiah. Nachenganchepaw lusa maru dow pe ang piati khai.11CHAKRAMANG tek mih, “En naiungla kownkow ang nalawng en ngengche kown. En kowh ransu-uüa dow amatni krat mih khin khe en tut-e nauang lü khowng kown.12Tawngphak pra kowh pren kowi kowh lawngha hai kri nowng piak mih amia chow uowi?13Aw Juda, en chang ngak rakowi en kowh dawngthawnguan dow cham rupah mih uanh iawng paprenma kowi aiawng ang naretah kown.14En kowi dow en tukah dowi mih pren kowi ransu-uüa kowh nar ang nachang en kown. Tawngplawng kowchow panow ang kowh kunmaraura dow maih iawng nalün kown, now nami maih dow katpaw namit kown nadowi,” pakhai.15Aw CHAKRAMANG, en dow bowkbowk tuk chekhai;naiawng rakowi ang laiklow tuakah diah,now ang prakowi pe ching diah.Chang ang anowng apowng miuüa luk kowi sat pe klai diah,amatni luk kowi dow hangkow town sak tham bowt diah.Amatni rut kowi dow hauang pe piak ang diah,en vüi kowi kowh ang kham rukrai mih dow sak kowi towah reng diah.16Ang tut-e kowh en laiklow uang ting mih dow sak kowi ang towah reng chekhai,nami en kowh laiklow dow ang kowh piawra hai ang kowh awmrawmra chekhai.Tawngplawng kowchow panow aw mukuang siphaiuüa kowh CHAKRAMANG,en dow ang kowh Thurai chekhai.17Ang dow kham rak se how sawmlawm mih thum kowi tawi uowi dowi chekhai,amatni hown dow katpaw ang tawi piaw dowi chekhai.Ang dow en ana pek iawng lang uowi phülü reng chekhai.Tawngplawng kowchow panow amatni kowh angak rakowi ang kunmarau khai.18Tawngplawng kowchow ang kowh arau iung dowi?Tawngplawng kowchow ang kowh ma lep dowi?Tawngplawng kowchow nami ma rau uowi rengreng?Satma khin khe kowh tui kang mih awchawng iawng khowng ang dowi kowi en nauowi kown bow?19Nakhowk khe CHAKRAMANG tek mih, “En che ang tut-e uang plan hanowauown khe kowh iawng ang kowh lup aiungma en naia chang kown.En che asung uowi dowi mih laiklow tek dowi hanowrisi iawng ang naplan chang en iawk kown.Naiawngün maru-uüa mih pacham sünta en laiklow lah.Tawkche amatni kowh laiklow dow en nasünta pe kown nadowi.20Naiawngün maru-uüa tut-e dow kri hown kowh akhawtma mih tap iawng ang nachang en kown.Amatni dow en kowi nasen en kown.Tawkche amatni mih naiata en kown nadowi.Tawngplawng kowchow panow ang CHAKRAMANG tek khowk,natowkala en kownkow hai nalawng en kownkow en tut-e ang natawi uowi reng kown.21Ransu-uüa hownia ang natowkala en kown,now maru ngakuüa rut hownia ang lawng en kown,” pakhai.
The Seed Company