Jeremia14
1Sat nakang kown mih lawnguan kowi CHAKRAMANG tek pe Jeremia mih,2“Juda prenchakuüa dow uowila uiting uangtak khai.Tawngplawng kowchow panow aia kowh marowchakuüa dow kür uowi dowi bowt chekhai.Nakowi kowh maru-uüa dow krawng kowi mawk se kar büah khai,now Jerusalem maru-uüa dow Thurai tut-e naka khowng kownkow atünma awr kar khai.3Maru iukuüa dow anaruüa kowi cham pe towngah tui reng chekhai.Tawkche tuikuam maten dow akangma kangowh chekhai.Naiawng rakowi anaruüa dow tuikawng akhawma plan khai,amatni dow sak ngama hown rukrai kowh mumta lumowr büah khai.4Pren kowi uang kla dowi rakowi krawng cheng khai.Naiawng rakowi üa hai laih chang miuüa dow ka tuak ka cha dowi bowt kowh phek kaucha khai.5Dowm kowi pram awm dowi bowt chekhai.Naiawng rakowi nahiuma khowm penla chah hüah now powt khai.6Kaurawng kawrngaramchük hawmh dow singh kau uowi dowi mih hungh luk kowi iowngla dawng khai,amatni dow iowng dawnglawng se brenkhui iawng taha phala büah khai.Amatni dow ka pram dowi rakowi kü mik kown mih khowm kür uowi dowi bowt chekhai,” pakhai.7Maru kawmuüa tek mih, “Aw CHAKRAMANG, anging dow en hownia cham powtta en khai,now ahuma anging chang ngak khai.Kawmat dow anging kowh ngak rakowi anging ka ripra khai.Nachenganchepaw en nakala ming iung nang iung kownkow uang khowng anging diah.8Aw CHAKRAMANG, en dow Israeluüa kowh sakowmra chekhai,en dow kla phih mih khin khe kowh lawng miia chekhai.Tawkche kawmat dow tawngplawng kowchow prenlang maru iawng en uowi khai?Tawngplawng kowchow iakla pauarchow mih khari kowi iawng anging tut-e en tuk uang khai?9Tawngplawng kowchow amawlawma mih maru iawng en tuk uowi khai?Tawngplawng kowchow kür uowi dowi mih siphai iawng en tuk uowi khai?Nachenganchepaw aw CHAKRAMANG, en dow anging tut-e tawi uowi reng,now anging dow en kowh maru chekhai.Naiawng rakowi hauang nuata anging diah,” pakhai.10Judauüa lawnguan kowi CHAKRAMANG tek mih,“Judauüa dow ang hownia alakma kowi cham krawi len kown mih lang nau khai,now amatni dow amatni kowh khawk towah phülü dowi chekhai.Naiawng rakowi amatni kowi ang maru iawng ang napawah kown nadowi bowt;khaleng dow amatni kowh angak ang naka tuak pe bowt kown,now amatni kowh ngak rakowi ang naripah bowt kown,” pakhai.11Nami kung kowi CHAKRAMANG tek ang mih,“Juda maru-uüa iung müa ang tut-e hauang lü khowng diah.12Amatni dow khang hawm se ang tut-e nauang awr lü kown,now amatni kowh kar klow dow ang nahawt sünta pe kown nadowi.Tikah mih uanap hai kawmdi uanap paw ang napaw pe kown nadowi;ang napaw pe lak dow tasenra, khown hai makowng hawi hown amatni kowi ang napiakah kown,” pakhai.13Nakhowk khe ang tek pe CHAKRAMANG mih, “Aw CHAKRAMANG Thurai, nga lai bowt kowbow! En maru-uüa kowi akeng mih risiuüa tek pe mih, ‘Tasenün enni nakrum kown nadowi, now khown hown paw enni nakawm kown nadowi. Mami arah re-e dow CHAKRAMANG mih thaulangma natow enni ngengche kown,’ pape khai,” pakhai.14Nakhowk khe CHAKRAMANG tek ang mih, “Risiuüa dow ang ming hown pur prakowi nauang phaw kown mih lawnguan kowi krawi küa dai khai. Amatni kowi dow ang uang chinah dowi chowdiah, amatni kowi dow naiawng nakrawi tek kown mih ana ang peah dowi chowdiah; tawng iawng mih laiklow paw ang tek pe dowi chowdiah. Amatni dow enni tut-e dai lai mukmang, dai lai hawra hai amatni sak nau iawng krawi tek enni mih chekhai.15Naiawng rakowi naiawng dailama mih risiuüa kowi dow ang naripah kown. Amatni kowi dow ang krawi chinah dowi chowdiah. Nachenganchepaw amatni tek mih, ‘Mami pren kowi tawng iawng mih khown paw nauang ting kown nadowi,’ pakhai. Naiawngün risiuüa dow tasenra kowi lah, khown hown lah napiak kown.16Maru kawmuüa tut-e risi iawng krawi tek lai miuüa dow naiawng nakowng kown, now amatni kowh laiklow chün miuüa paw nakowng kown. Amatni kowh uak dow Jerusalem tiama towng kowi natakuakla pan kown. Amatni, amatni kowh masi hai amatni kowh chauüa dup mih dow amiapaw nauowi kown nadowi bowt. Naiawng hai amatni kowh angak sung dow ang napeah kown.17“Maru kawmuüa kowi maiawng tek pe diah, ‘Ang kowh mik tui dow ni chut uar prowt hawr khai.Tawngplawng kowchow panow ang chenchapuüa dow ka ngarau khai,ang maru-uüa kowh chimsaima mih chama dow ka ngarau mih lainowmma hu khai.18Dowm kowi ang kowkowi mih khin khe tasen hown maru kowng mih ang khi khai,now marow kowi ang kowkowi khe paw khown hown maru kowng mih ang khi khai.Tawkche risiuüa hai uamowuüa dow pren kowi tawng chow own mih tawngpaw tuk dowi chekhai,amatni dow amatni sak nau iawng cham krawi lenla pang khai,’ pape diah,” pakhai.19Aw CHAKRAMANG, Judauüa kowi en hing nuata mih chowbowt bow?Zaiawn kowi en suiah mih chowbowt bow?Nowng iungah dowi pat mih arau tawngplawng kowchow en tuk pe anging khai?Anging hawt sakowm mih dow aiung chowdiah.Tawkche tawng iawng mih iungra paw uang ting dowi chekhai.Anging kowh arau naiung kown mih anging sakowm chowdiah.Tawkche anging luk kowi dow kramra kangowh uang ting khai.20Aw CHAKRAMANG, anging kowh angak anging uang taphuang khowk,anging pipu-uüa kowh angak lawnguan kowi paw anging uang taphuang khowk.Anging dow kingküala en mih angak changta khai nowm.21En kowh ming iung nang iung naia townla kownkow hangkow cham dangta anging diah,en kowh rowsira uowima mih mang chowm rah uowi mih Jerusalem kowi hauang pawla pe rukraira diah.Anging vüi kowi kowh en towah mih sangbowk laitawm dow ka tuakah diah;nami dow hangkow piakta diah.22Akeng chenchapuüa kowh asung uowi dowi mih arup aren dow uang nowng pawla uang dowi chekhai,mukuang paw aia low hown nowngia pe uang dowi chekhai.Aw CHAKRAMANG, naiawngün nowngia pe mih dow en chowtaih.Naiawng rakowi anging dow en luk kowi owmsak reng chekhai.Tawngplawng kowchow panow naiawng nowng chang mih dow en chowtaih chekhai.
The Seed Company