Isai7
1Juda pren kowi Jotham kowh chapa Ahaz (Uzia kowh chu) chowm mang khe Siria pren mang Rezin mih Remalia kowh chapa Israel pren mang Peka hown tabawngah hanow nauang sen Jerusalem marow kownkow uang tarü khai. Nachenganchepaw amatchi dow nowng awng dowi chekhai.2Tawkche uang senah dowi rawn tak khe Siria siphaiuüa hown Israeluüa tabawng khai bowt pami satang Juda pren mang mih rik ta khai. Nami laiklow tata hanow mang Ahaz hai aia kowh maru-uüa dow lainowmma kram khai. Kram lai bowt kowh amatni kowh sak dow li uang khe kowh singh chü lowlow mih iawng towbowt chekhai.3Nakhowk khe risi Isai kowi CHAKRAMANG tek pe mih, “En chapa Searjasub kowi pawla now mang Ahaz hown kowtakrum diah. Dawnguan chukra dowm pra kowh mangla mih tiama kowi kowkowi diah. Nami tiama ria kowi dow aluk kowi kowh kanh hown taplawn mih tui khawng lawng uowi lowk. Nami tui khawng lawng mowr re-e aia kowi dow en nakrum kown.4Aia kowi en natek pe kown mih, ‘Kaneu diah, akhawtma uowi diah. Siria pren mang Rezin hai Remalia kowh chapa Israel pren mang Peka iüah kunmarau mih kowi hangkow kram diah. Tawngplawng kowchow panow amatchi dow mit kown chowbowt mih maih iawng chowtaih.5Siriauüa, Israeluüa hai Remalia kowh chapa Peka mih nauang piakta enni kownkow sangkrang khai.6Amatni dow Judauüa kowi nauang senah hanow awng khowk khe Tabeel kowh chapa kowi Juda pren kowi nape chowmah mang kown mih kamrüt khai.7Nachenganchepaw ang CHAKRAMANG tek khowk, naiawng naphaw kown nadowi.8Tawngplawng kowchow panow Siria pren kowi kowh marow kri Damaska dow tawngpaw nadowi chekhai, now Damaska marow mang Rezin paw tawngpaw nadowi chekhai. Now Israel dow 65 ning tuang kowi chenchap khowm uowi dowi pat natapiak kown.9Israel pren kowi kowh marow kri Samari dow tawngpaw nadowi chekhai, now Remalia kowh chapa Samari marow mang Peka paw tawngpaw nadowi chekhai. Tawkchedow enni kowh owmra mih akhawtma nadowi hanow tawng iawng paw enni naia iowng kown nadowi,’ pape dit,” pakhai.10Nami kung kowi mang Ahaz kowi CHAKRAMANG plan tek pe mih,11“Nakhowng en kown mih amatra natüng en lowk kownkow en kowh CHAKRAMANG Thurai kowi kowlü diah. Nami amatra dow makownguüa uowi rah khowt büp chepaw pana lah, now mukuang pren khowt kro chepaw pana lah,” pakhai.12Nachenganchepaw Ahaz tek pe mih, “Ang lü dowi tham; CHAKRAMANG kowi chaing kown ang nau dowi,” pakhai.13Nakhowk khe risi Isai tek pe mih, “David krungchakuüa low, sünta. Lusa maru kowi enni towk kawm mih khowm padow rawn khai bowt. Kawmat mih Thurai kowi paw enni natowkah kawm iawk kown bow?14Naiawng chekhai hanow CHAKRAMANG matia ngengche nauang tüng enni amatra lowk kown. Nami amatra dow maiawng: Malauüa chimsaima mih lowk ia nakum nau kown, aia dow napen chapa lowk ia kown, now aming dow Immanuel pahai narük pe kown.15Nami chah dow angak chap nakuakta kown mih hai aiung chap napawah kown mih tukra ka mih khin khe iawn tui bawi hai kuai tui nacha kown. Nachenganchepaw aw mang Ahaz, nami khin uang ting dowi rawn en kramah mih mang pre ia kowh pren mih akhaw aklaima nauowi bowt kown.17Juda hai Israel tabak mih ni hownia katpaw uowi dowi tak mih akrat pusara en hai en maru-uüa hown en pa krungchakuüa luk kowi CHAKRAMANG nauang pe tingah kown mih akhin nauowi kown. Nami khin khe CHAKRAMANG mih Asuria mang kowi nauang pawla enni kown,” pakhai.18Nami ni khe dow CHAKRAMANG mih Aigupta pren kowi kowh alakma mih aw hownia hai Asuria pren hownia nauang hawla enni siphaiuüa kown. Amatni dow ving hai kuai kawm iawng nauang sen enni kown.19Amatni dow nauangah hanow arema mih lawngrawi kowi, hungh cheng mih kowi, chuh mung maten kowi hai dowm maten kowi nauang krawi uowi kown.20Nami ni khe dow Iufratis aw paipra pown kowi kowh sangthünchow iawng mih Asuria mang kowi CHAKRAMANG nauang ngala enni kown, now nami Asuria mang dow enni kowh pren, enni kowh luprak hai enni kowh maru maten kowi asaima nakhaila enni kown.21Nami ni khe dow mia iawng mih kowh chünchü chiama uowi apum hai rua uowi pre pum hanow naiawngün tawncher iawn tui aduma naka cha kown. Nami pren kowi kowh uowi miuüa maten dow maru iun e lai bowt rakowi iawn tui bawi hai kuai tui alawkma naka cha reng kown.23Nami pren kowi kawmat kowh grep tut 1,000 kowi tai 1,000 iun chi asung uowi mih nami ni khe dow chuh mung hai chuh singh kangowh towbowt nauowi kown.24Nakhowk khe dow nakowi mih leba hai leba sek pawla now maru nakow mit chak bowt kown. Tawngplawng kowchow panow nakhowk khe dow nami pren mih chuh mung hai chuh singh hown atekma nauowi bowt kown.25Nakhowk khe dow parpa hown pawkah hanow maru lupah mih arah maten kowi kram chuh kowh maru mih nakowkowi kown nadowi bowt; naiawngün süng dow chia tawkra hai ruapur hawmh tawkra nachowng bowt kown.
The Seed Company