Isai48
1Aw Jakawb kowh krungchakuüa, sünta büa diah.Enni kowi dow Israel ming hown haw enni khai,now enni dow Juda krungchak hownia kowh uang phaw mih chekhai.Enni dow CHAKRAMANG ming hown kham sawi reng chekhai,now Israel kowh Thurai tut-e lü prasi reng chekhai.Tawkche anowmma hai achinawmma naiawngün enni chang dowi chekhai.2Nami kung kowi paw enni matia kowi chimsaima mih marowchak pahai enni takham khai,now mukuang siphaiuüa kowh CHAKRAMANG pami Israel kowh Thurai luk kowi enni neplawng nesak pahai enni takham khai.3CHAKRAMANG tek mih, “Tawng chow nauang phaw kown mih alai hownia ang tek enni khai,now linlanma sang nami iawng ang uang pe phawah khai.4Tawngplawng kowchow panow enni dow lai üa kürma pami ang tuk chekhai.Enni kowh ngawngtung nga dow lawngha iawng akhawtma chekhai,now enni kowh kauphang dow kri iawng amama chekhai.5Naiawng rakowi maiawngün maten dow alai hownia ang tek enni khowk,now maiawngün phaw dowi rawn ang rik phuang enni khowk chekhai.Naiawng ang rik pe tuk enni mih dow, ‘Maiawngün maten chang mih dow anging kowh arup arenuüa chekhai;maiawngün phaw mih dow anging sawnah mih hai sowah mih arup aren rakowi chekhai,’ pami enni hang paia tek lah pakowh chekhai.6“Ang tekta mih maten enni ta khowk,now ang tekta iawng uang phaw mih enni khi khowk chekhai.Nachenganchepaw enni owm kown nau dowi tak chekhai bow?Kawmat hownia dow enni tukah dowi mih asar asarma mih lawnguan kowi ang natek enni kown.7Naiawngün dow achük alai kowh lawnguan nadowi,kawmat kowh thawpah mih chekhai.Ani dowi rawn naiawngün dow enni ta dowi tak chekhai.Naiawng rakowi, ‘Ow, nami anging tuk chowdiah,’ pami enni naia tek kown nadowi bowt.8Nami dow enni ta dowi tak; tuk paw enni tuk dowi tak chekhai,now enni kowh param mih uow enni dowi tak chekhai.Mün khowt chow enni kuanla mih dow ang tuk chekhai.Enni dow uang dia hownia kingküa dawma chekhai.9Ang matia kowh ming iung nang iung hai ringkawra nauowila reng kownkow ang kowh kunmaraura mih ang townah khai.Ang rip enni dowi mih hai ang chumta enni dowi mih dow naiawng rakowi chekhai.10Achangma ang chang enni khai.Tawkche tai kowi iawng maih kowi nadowi chekhai.Akrat pusara khuang kowi ang chaing enni khai.11Lowra sia ang chang mih dow ang matia vüi chowtaih chekhai.Ang matia kowh ringkawra tawng iawng chow nape churah kown?Ang kowh rowsira akeng mih maru kowi ang nowng pe dowi chekhai,” pakhai.12CHAKRAMANG plan tek mih, “Aw Jakawb, ang lang ruiah mih Israel,ang laiklow sünta diah. Ang chowtaih auown hai achur.13Ang matia rut hown lusa chüng mih ang phükah khai,hawmlawm rut hown mukuang mih ang krawi phatah khai.Ang hawah hanow amatni dow akrowksang iowng reng chekhai.14“Enni bowkbowk arasang uowi hanow sünta büa diah.Enni kowh arup arenuüa maiawng mih lai tek khai bow?Ang CHAKRAMANG mih Sairus kowi ang lang ruiah khai;aia kowi ang lang ruiah mih dow Babulawn hai aia kowh siphaiuüa kowi napiakta pe kownkow chekhai.15Ang chowtaih tek. Sairus kowi ang hawah hanow ang kowchinah khai,now aia kowh lup nachawnla kownkow aia kowi ang nakhowngah kown.16Ang tut-e uang tatawn büah hanow sünta büa diah.Alai hownia kukpa ang tek lai dowi chekhai,now ang tekta iawng ang pe tachiah reng chekhai,” pahai CHAKRAMANG tek khai.Kawmat dow CHAKRAMANG Thurai mih aia kowh lümla hown uang chin ang khai bowt.17CHAKRAMANG enni kowh lawng miia Israel kowh chimsaima mih Thurai tek mih,“Ang CHAKRAMANG enni kowh Thurai;enni naiungla kownkow ang tüng ang sang enni khai.Tawng mih tiama kowi chow enni amang takla,nami tiama kowi ang kruila enni khai.18Enni che ang kowh ana pek kowi pe ching panü aw iawng enni nathaulang diah,now enni kowh anowm mih sata tuilowng iawng naown diah.19Nami klen kowi enni kowh krungchakuüa paw dinchow iawng nahu diah,now enni kowh chauüa mih sema iawng nowng rüaah dowi tham diah.Amatni kowh ming dow ang pur hownia katpaw taphiawk dowi tham diah,now amatni kowi mih ang piakah dowi tham diah,” pakhai.20Enni mih Babulawn kowi towla now powt diah,Babulawnuüa hownia powt büa diah.“CHAKRAMANG mih aia kowh nar Jakawb kowi lawngah khai bowt,” pami prenchur nammowt mowr krawi tek büa diah.Nami lawnguan kowi apiawma hown hekla se krawi phuang büa diah.21Süngrüp süngkangma iawng amatni kowi aia pawla mih khin khe amatni dow tui sakkrai hown bowm dowi chekhai.Tawngplawng kowchow panow aia mih huaklu hownia tui kowi uang pe lawtah khai.Huaklu mih aia teuah khai,nahanow nami hownia tui mih uang lawt iualua khai.22CHAKRAMANG tek mih, “Maru ngakuüa kowh dow mapaw thaulangra uowi dowi,” pakhai.
The Seed Company