Isai47
1CHAKRAMANG tek mih,“Aw Babulawn kowi kowh maru-uüa,adak kowi iu dowm hanow dinchow dawng kowi kowchowm diah.Aw Babulawn, towla mang chowm rah hanow krawng kowi kowchowm diah.Tawngplawng kowchow panow en mih malauüa powrchow klangiungma mih iawng en naklangiung kown nadowi bowt.2Kawmdi küa müa huaklu adikma mih dowkla hanow narma iawng dow küa kawmdi diah,now en kowh lumowr mum müa klangiungma mih lowtta bowt diah.En kowh uanklai mih thung mowr lowtah hanow pown aw diah.3En kowh tengiow tengklaima mih dow natatüng bowt kown,now en kowh rukraira dow natamum kown nadowi bowt.Naiawng hai ang napaw lu klai bowt kown;mia kowi paw ang nanangah kown nadowi bowt,” pakhai.4Anging kowh lawng miia dow Israel kowh chimsaima mih Thurai chekhai.Aia kowh ming dow mukuang siphaiuüa kowh CHAKRAMANG chekhai.5CHAKRAMANG tek mih,“Aw Babulawn, ririmma chowm phülü diah,now iiu dawng kowi cham kowi diah.En kowi dow lusa kowi kowh mangma pahai nahaw en kown nadowi bowt.6Ang kowh maru-uüa luk kowi ang kowh kunmarau lün pluplup khai,now amatni kowi dow ang pe tasür talawkah khai.Amatni kowi dow en rut kowi ang ap-ah khai,now amatni kowi dow en saksing sanaah dowi chekhai.Amatni pungmadawng kowi kowh lawngtangma mih kowi khowm en tang pe kurdik khai.7En tek mih, ‘Chowngchowng saksakma ang nachowng mangma kown,’ pakhai.Tawkche en kowh lup ngak lawnguan kowi mapaw en tuak dowi chekhai,now nami rakowi achur kowi tawng chow naphaw kown mih paw en tuak dowi chekhai.8“Aw Babulawn, en dow asowrma uowi kown lainowmma nau chekhai.Naiawng rakowi kawmat mih sünta diah.En dow thaulangma chowm se en tuak mih, ‘Ang lowkchow taih uowi;ang klen kowi miapaw uowi dowi bowt.Ang dow katpaw naphaw mamaimow kown nadowi,now mata chah mih prüa rau paw ang nakrum kown nadowi,’ pakhai.9Tawkchedow mata chauüa mih hai chowng mamaimow mih akrat pusara pamai sang linlanma en tut-e nauang ting kown.En kowh maiaklese tukra hai mantan tukra ahuma chepaw nami dow en tut-e akümma nauang ting kown.10En chang lup ngak chepaw thaulangma nauowi kown mih en tuak khai,now en tek mih, ‘Miapaw khi ang dowi,’ pakhai.En kowh prengia hai chanlaira mih piakra prakowi pawla en khai.Sakdawng kowi en tek mih, ‘Ang towbowt Thurai;ang klen kowi miapaw uowi dowi bowt,’ pakhai.11Tawkche en luk kowi akrat pusara nauang ting kown,now nami akrat pusara kowi en kowh maiaklese kür hown tawng iawng chow naia mata kown mih en natuk kown nadowi.En luk kowi phih nauang kla kown, now nami phih mih en nahawt nowng hen kown nadowi.En rik tukah dowi mih piakra dow mingmang dowi khe en luk kowi nauang ting kown.12“Sowm hownia kowh en tawngkengah mih maiaklese hai mantan dow tawngkengah reng diah.Naiawngün dow en vüi maratra uowi chepaw naia,now ransu-uüa kowi en naia krawkla chepaw naia.13En kaah mih prengia lai maten dow en bowm müa chowtaih chekhai.En kowh hawra sarauüa mih en pur kowi pauang iowng lah.Mü krek hanow la towng la towng tawng chow pur prakowi nauang ting kown mih laiklow tek miuüa pacham towkala en lah;amatni dow en luk kowi kowh nauang ting kown mih hownia pacham towkala en lah.14Amatni dow chathang iawng chekhai;naiawngün kowi dow maih nakamta kown.Amatni dow maih hownia nowng talawng dowi chekhai.Nami maih dow mairing maih nadowi.Nami dow maru nowng khawmah mih hai maru kala anowi mih maih nadowi chekhai.15Sowm hownia en taiua chang lup miuüa hai pe en prengia miuüa dow chowlowkkow tiama kowi mang khai.Amatni dow lowk iachow paw nowng lawng en mih uowi dowi chekhai,” pakhai.
The Seed Company