Isai46
1CHAKRAMANG tek mih,“Bel hai Nebo thurai dow tim khai bowt.Amatchi kowh arup kowi dow tawncher hawmh nacham kurla kown.Babulawnuüa chupiiaah mih arup aren dow tawncher hawmh vüi nachowng kurdik kown.2Naiawngün thuraiuüa dow akrowksang natim kown.Amatni dow amatni kowh arup kowi nanowng lawngah kown nadowi,now amatni kowh arup aren dow akeng pren kowi nacham takhang kown.3“Jakawb krungchakuüa low,Israel krungchak kowi kowh ta sing miuüa low, ang laiklow sünta büa diah.U mu lak kowi enni uowi reng tak khe hownia ang khet enni khai,now uang dia kung kowi paw ang kruitown enni reng chekhai.4Enni lawngtang mowr pat ang dow aiawng uowi iawng nauowi reng kown.Enni kowh sam pau mowr pat enni kowh kurdik mih ang nakur kown.Enni kowi dow ang thawp enni mih chekhai,ang chowtaih enni kowh kurdik nakur kown.Ang chowtaih nakur enni kown,now natowkala enni kown.5“Mia hown chow enni cham tu ang kown?Mia chow ang hown tale mih uowi?Mia hown chow tu ang e ang hown tale pami enni naia tek kown?6Tawngbak miuüa dow amatni kowh kuh hai tai mih thawpla arup aren khai;amatni dow naiawngün arup aren mih arup aren thawp miuüa kowi pe thawpah khai.Akung kowi nami arup kowi dow amatni chupah iiaah khai.7Amatni dow nami arup kowi pangkawt hown cham kawtla khai,now amatni nau rah re-e cham towah khai.Nami arup dow amatni towta mih arah hownia nowng chü dowi chekhai.Nami arup tut-e maru kowkar chepaw nami arup dow hawt klangah dowi chekhai,now akawm akrat hownia paw maru kowi nowng towkala dowi chekhai.8“Maru ngakuüa low, mami laiklow kowi pe ching büa diah,now sak kowi towah hanow anikma uowi büa diah.9Achük alai kowh lawnguan enni ka tuak reng.Ang chowtaih Thurai, miapaw nadowi bowt.Ang chowtaih Thurai, ang iawng miapaw uowi dowi bowt.10Ang dow khin chur khe kowh nauang phaw kown mih lawnguan alai hownia rik tekah khai,now kawmat paw phaw dowi tak mih lawnguan alai hownia ang pe tuk enni chekhai.Ang kowh kamrütra dow anikma nauowi reng kown pami ang tek khowk;ang kowh naukrang maten ang nauang pe tachiah kown mih paw ang tek khowk.11Ang kowh kamrütra nape tachiah kownkow satlawt hownia ang nauang hawla maru lowk ia kown.Aia dow satlawt pra kowh pren hownia nga sing chak mih uakling iawng nauang kown.Ang tekta mih hai ang sangkrangta mih iawng ang nachang ngengche kown.12Lai üa kürma mih maru-uüa low,tachi tanawmra hownia alakma uowi miuüa low,ang laiklow sünta büa diah.13Lowra sia ang nathikah kown mih ang kamrütta hüah khowk.Nami dow kra dowi bowt,now ang kowh lawngra lup ang nachang kown mih paw kra dowk chekhai.Zaiawn kowi ang nalawngah kown,now Israel kowi ang napeah ringkawra kown,” pakhai.
The Seed Company